મેચ ટાઈ હતી કે હાર? 1 રનના લોચાએ ધોઈ નાખી ઝારખંડની ટીમની મહેનત!
ભારતીય ઘરેલુ ક્રિકેટમાં આજકાલ એક અત્યંત અનોખો અને ચોંકાવનારો વિવાદ સામે આવ્યો છે. અંડર-19 મહિલા ક્રિકેટ ટુર્નામેન્ટ સાથે જોડાયેલા આ મામલાએ સૌને ચોંકાવી દીધા છે, જ્યાં માત્ર 1 રનની ગરબડના કારણે એક આખી ટીમને ટુર્નામેન્ટમાંથી બહાર થવું પડ્યું છે. આ ઘટના બાદ ક્રિકેટ જગતમાં હલચલ મચી ગઈ છે અને ઝારખંડ ક્રિકેટ એસોસિએશન (JCA) એ સીધા BCCIના દરવાજા ખખડાવ્યા છે.
શું છે આખો મામલો?
આ સમગ્ર વિવાદ મંગળવારે નાગપુરમાં ઝારખંડ અને ઉત્તરાખંડની અંડર-19 મહિલા ટીમો વચ્ચેની મેચ દરમિયાન સર્જાયો હતો. પ્રથમ બેટિંગ કરતા, ઉત્તરાખંડની ટીમે 134 રન બનાવ્યા. તેના જવાબમાં, ઝારખંડની ટીમે સારો દેખાવ કર્યો હતો, પરંતુ આખરે તેમની આખી ટીમ 133 રનમાં ઓલઆઉટ થઈ ગઈ. સત્તાવાર સ્કોરકાર્ડ મુજબ, ઝારખંડ આ મેચ બરાબર એક રનથી હારી ગયું—જેના કારણે તેઓ ટુર્નામેન્ટમાંથી બહાર થઈ ગયા.
સ્કોરકીપરની એક ભૂલ અને બદલાઈ ગયું મેચનું પરિણામ
અહેવાલ મુજબ, ઝારખંડ ક્રિકેટ એસોસિએશને BCCIમાં જે ફરિયાદ નોંધાવી છે, તેમાં દાવો કરવામાં આવ્યો છે કે આ મુકાબલો વાસ્તવમાં હાર્યા નહોતા, પરંતુ આ મેચ ટાઈ (Tie) થઈ હતી.
ફરિયાદમાં જણાવવામાં આવ્યું છે કે ઇનિંગ્સની 30મી ઓવરના ચોથા બોલ પર ઝારખંડની એક ખેલાડી બીજો રન દોડવાના પ્રયાસમાં રનઆઉટ થઈ ગઈ હતી. ઝારખંડની દલીલ છે કે અધિકૃત સ્કોરકીપરે ખેલાડીના રનઆઉટ થવાની વિકેટ તો જોડી દીધી, પરંતુ બેટ્સમેનો દ્વારા સફળતાપૂર્વક પૂરો કરવામાં આવેલો પહેલો રન સ્કોરબોર્ડમાં જોડ્યો નહોતો.
મેદાન પર ખેલાડીઓની બોલાચાલી અને નિરાશા
મેદાન પર લાગેલા સ્કોરબોર્ડ મુજબ ઝારખંડને છેલ્લી ઓવરમાં જીત માટે 2 રનની જરૂર હતી, અને તેમના બેટ્સમેન માત્ર એક જ રન દોડી શક્યા. મેદાન પર હાજર ખેલાડીઓને લાગ્યું કે મેચ ટાઈ થઈ ગઈ છે, પરંતુ જ્યારે તેમને એક રનથી હારેલા જાહેર કરવામાં આવ્યા ત્યારે તેઓ સ્તબ્ધ થઈ ગયા. ઝારખંડની ટીમ અને સપોર્ટ સ્ટાફે તરત જ અધિકૃત સ્કોરર સાથે આ અંગે લાંબી બોલાચાલી પણ કરી, પરંતુ અમ્પાયર્સ અને સ્કોરર્સે મેચના નિર્ણયમાં કોઈ ફેરફાર કરવાનો સ્પષ્ટ ઇનકાર કરી દીધો.
JCAના એક જવાબદાર અધિકારીએ આ વિશે વાત કરતા કહ્યું કે 29.4 ઓવર દરમિયાન જ્યારે બેટ્સમેન બીજો રન લેતી વખતે આઉટ થઈ હતી, ત્યારે તેમનો પહેલો રન પૂરેપૂરો પૂરો થઈ ચૂક્યો હતો. દુર્ભાગ્યની વાત એ રહી કે સ્કોરકીપરની એક નાની લાપરવાહીએ ઝારખંડની પૂરી મહેનત પર પાણી ફેરવી દીધું અને તેમને કોઈપણ મોટી ભૂલ વગર ટુર્નામેન્ટમાંથી બહાર થવું પડ્યું. હવે જોવાનું એ રહે છે કે BCCI આ મામલે શું સંજ્ઞાન લે છે.
