મંગળવારે ગાંધીનગરમાં વેધર વોચ ગ્રુપનો વેબ સેમિનાર ઝૂમ ક્લાઉડ સોફ્ટવેરના માધ્યમથી યોજવામાં આવ્યો હતો. રાજ્યમાં તા.૧૫/૬/૨૦૨૦ સુધીમાં ૯૫.૨૫ મીમી વરસાદ થયો છે. જે પાછલાં ત્રીસ વર્ષની રાજ્યની એવરેજ ૮૩૧ મીમીની સરખામણીએ ૧૧.૪૬ % છે. રાજ્યના કચ્છ જિલ્લાના અબડાસા, લખપત તાલુકા તેમજ દેવભૂમિ દ્વારકા તાલુકામાં આજદિન સુધી વરસાદ નોંધાયો નથી. અન્ય તમામ તાલુકામાં વરસાદ ૧ મીમીથી લઈ ૨૩૨ મીમી સુધી નોંધાયો છે.
રાહત કમિશનર અને અધિક મહેસૂલ સેક્રેટરી હર્ષદ આર.પટેલે જણાવ્યું હતું કે, હવામાન વિભાગ દ્વારા સેટેલાઈટ તસવીરોના આધારે જે આંકલન રજૂ કરવામાં આવ્યું છે તે મુજબ આગામી અઠવાડિયામાં દક્ષિણ ગુજરાત, સૌરાષ્ટ્ર વિસ્તાર અને કચ્છના કેટલાક વિસ્તારમાં સામાન્યથી હળવો વરસાદ થવાની આગાહી કરવામાં આવી છે. ચાલુ વર્ષે અંદાજિત ૧૩.૯૪ લાખ હેક્ટર ખરીફ પાકોનું વાવેતર તા.૧૫/૬/૨૦૨૦ સુધીમાં થયું છે.
ગત વર્ષે સમાન સમયગાળા દરમિયાન ૨.૦૭ લાખ હેક્ટર વાવેતર થયું હતું. આ વર્ષે છેલ્લાં ત્રણ વર્ષની સરેરાશ વાવેતર વિસ્તારની સામે ૧૬.૪૨ % વાવેતર થયું છે. ઉપરાંત સિંચાઈ વિભાગ, આર એન્ડ બી વિભાગ, ફોરેસ્ટ સહિતના વિવિધ વિભાગ અને સેન્ટ્રલ વોટર કમિશન, એન.ડી.આર.એફ. તેમજ એસ.ડી.આર.એફ. દ્વારા પૂર્વ તૈયારી બાબતે સમીક્ષા કરાઈ હતી. ઉપરાંત તમામને આગામી વરસાદની સિઝનમાં સંભવિત આફતને પહોંચી વળવા સાવચેત રહેવા રાહત કમિશનર દ્વારા સૂચના આપવામાં આવી હતી.