કેન્દ્રીય રાજ્ય મંત્રી નિમુબેન બાંભણિયા અને મંત્રી જીતુભાઈ વાઘાણીની ઉપસ્થિતિમાં ભાવનગરમાં વિકાસ કાર્યોનો કાર્યક્રમ
ભાવનગર મહાનગરપાલિકા દ્વારા શહેરના સર્વાંગી વિકાસ માટે ₹ 384.54 કરોડના વિવિધ જનસુખાકારીના પ્રકલ્પોનો ભવ્ય કાર્યક્રમ યોજાયો હતો. કેન્દ્રીય રાજ્ય મંત્રી શ્રીમતી નિમુબેન બાંભણિયા અને કેબિનેટ મંત્રી શ્રી જીતુભાઈ વાઘાણીની ઉપસ્થિતિમાં વિકાસકાર્યોનું ખાતમુહૂર્ત અને લોકાર્પણ કરવામાં આવ્યું હતું. મંત્રીશ્રીઓએ ભાવનગરની ટીમને અભિનંદન પાઠવતા જણાવ્યું કે, વડાપ્રધાન શ્રી નરેન્દ્ર મોદી અને મુખ્યમંત્રી શ્રી ભૂપેન્દ્ર પટેલના નેતૃત્વમાં ગુજરાત વિકાસનું રોલ મોડલ બન્યું છે. છેલ્લા બે દિવસમાં જ શહેરમાં ₹ 450 કરોડના કામો થવા એ વિકાસની વણથંભી યાત્રાનો પુરાવો છે.
સિદ્સરમાં 472 ગરીબ પરિવારોને મળ્યા પોતાના ઘરના ઘર
મહિલા દિવસની વિશેષ ઉજવણીના ભાગરૂપે પ્રધાનમંત્રી આવાસ યોજના (PMAY) અંતર્ગત સિદ્સર ખાતે તૈયાર થયેલા 472 આવાસોનું લોકાર્પણ કરવામાં આવ્યું હતું. આ પ્રસંગે લાભાર્થી પરિવારોને મહાનુભાવોના હસ્તે ઘરની ચાવી અને મંગળ કળશ અર્પણ કરવામાં આવ્યા હતા. પોતાનું પાકું ઘર મળતા અનેક પરિવારોમાં ખુશીની લહેર જોવા મળી હતી. મંત્રીશ્રીએ જણાવ્યું હતું કે, સરકાર માત્ર ખાતમુહૂર્ત જ નથી કરતી પરંતુ સમય મર્યાદામાં કામ પૂર્ણ કરી લોકાર્પણ પણ કરે છે, જે સામાન્ય નાગરિકો પ્રત્યેની અમારી પ્રતિબદ્ધતા દર્શાવે છે.
નવા ઉમેદવારોને નિમણૂક પત્રો અને સફાઈ કામદારોનું સન્માન
આ કાર્યક્રમ માત્ર ઈન્ફ્રાસ્ટ્રક્ચર પૂરતો મર્યાદિત ન રહ્યો, પરંતુ રોજગારી અને કર્મચારી કલ્યાણ પર પણ ભાર મૂકવામાં આવ્યો હતો. મહાનગરપાલિકાના જુદા-જુદા વિભાગોમાં પસંદગી પામેલા નવા ઉમેદવારોને મંત્રીશ્રીઓના હસ્તે નિમણૂક હુકમો એનાયત કરવામાં આવ્યા હતા. આ સાથે જ, શહેરને સ્વચ્છ રાખવામાં મહત્વનું યોગદાન આપનાર શ્રેષ્ઠ સફાઈ કામદારોને ચેક વિતરણ કરી પ્રોત્સાહિત કરવામાં આવ્યા હતા. આ અવસરે શહેરની સુરક્ષા માટે પાંચ નવા અત્યાધુનિક ફાયર ફાઈટર વાહનોને પણ લીલી ઝંડી આપી પ્રસ્થાન કરાવવામાં આવ્યું હતું.
વહીવટી તંત્ર અને પદાધિકારીઓની સંયુક્ત મહેનતથી વિકાસને ગતિ
ભાવનગરના મેયર શ્રી ભરતભાઈ બારડ, ધારાસભ્યશ્રીઓ અને મ્યુનિસિપલ કમિશનરની હાજરીમાં આયોજિત આ કાર્યક્રમમાં શહેરના ઉજ્જવળ ભવિષ્યની ઝલક જોવા મળી હતી. વિવિધ કમિટીઓના ચેરમેનો અને અધિકારીઓના સંકલનથી શહેરી સુવિધાઓ જેવી કે રસ્તા, પાણી અને ડ્રેનેજના માળખાને વધુ મજબૂત બનાવવામાં આવી રહ્યું છે. કાર્યક્રમના અંતે ડેપ્યુટી મેયર અને અન્ય અગ્રણીઓની ઉપસ્થિતિમાં મોટી સંખ્યામાં નગરજનોએ આ વિકાસલક્ષી અભિગમને આવકાર્યો હતો.
