મેયર દક્ષેશભાઈ માવાણીની ઉપસ્થિતિમાં સેવાસેતુ કાર્યક્રમ, સ્થળ પર જ અરજીઓનો નિકાલ કરી નાગરિકોને મળી રાહત
ગુજરાત સરકારની યોજનાઓ સામાન્ય નાગરિકો સુધી ઝડપથી અને પારદર્શક રીતે પહોંચાડવા માટે સુરત મહાનગરપાલિકાના સરથાણા (નવો પૂર્વ) ઝોન ખાતે મેયર દક્ષેશભાઈ માવાણીની ઉપસ્થિતિમાં ૧૦૧મો ‘સેવાસેતુ’ કાર્યક્રમ યોજાયો હતો. આ કાર્યક્રમનો મુખ્ય ઉદ્દેશ્ય છેવાડાના માનવીને સરકારી કચેરીઓના ધક્કા ખાવામાંથી મુક્તિ અપાવી ‘સ્થળ પર જ સેવા’ પૂરી પાડવાનો છે. આ પ્રસંગે રાજ્ય સરકારના જનકલ્યાણના અભિગમ હેઠળ કુલ ૨૧૧૯ લાભાર્થીઓએ વિવિધ યોજનાઓનો સીધો લાભ મેળવી સંતોષ વ્યક્ત કર્યો હતો.
૫૮ જેટલી સરકારી સેવાઓનો સ્થળ પર જ નિકાલ
આ સેવાસેતુ કાર્યક્રમમાં કુલ ૫૮ જેટલી વિવિધ સરકારી સેવાઓનો સમાવેશ કરવામાં આવ્યો હતો. જેમાં આવકના દાખલા, જાતિના પ્રમાણપત્રો, આધાર કાર્ડ અપડેશન, રેશનકાર્ડની કામગીરી અને પી.એમ. સ્વાનિધિ જેવી યોજનાઓ માટે ખાસ ડેસ્ક બનાવવામાં આવ્યા હતા. વહીવટી તંત્ર દ્વારા સ્થળ પર જ અરજીઓ સ્વીકારીને તેનો તાત્કાલિક નિકાલ કરવામાં આવ્યો હતો. અત્યાર સુધીમાં ૧૧ તબક્કાના આ અભિયાન દ્વારા સુરતમાં કુલ ૨,૦૫,૪૩૨થી વધુ લોકોને કલ્યાણકારી યોજનાઓનો લાભ આપવામાં આવ્યો છે.
મહાનુભાવોના હસ્તે સહાય પત્રોનું વિતરણ અને જનસુખાકારીનો સંકલ્પ
કાર્યક્રમ દરમિયાન મેયર દક્ષેશભાઈ માવાણીના હસ્તે વિવિધ લાભાર્થીઓને સહાય પત્રો અને પ્રમાણપત્રો એનાયત કરવામાં આવ્યા હતા. મેયરશ્રીએ જણાવ્યું હતું કે, વહીવટી તંત્ર જનતાના દ્વારે પહોંચીને કામ કરે તે સરકારની પ્રાથમિકતા છે. આ પ્રસંગે કોર્પોરેટરો, વહીવટી અધિકારીઓ અને વિવિધ વિભાગના પદાધિકારીઓ મોટી સંખ્યામાં ઉપસ્થિત રહ્યા હતા. નાગરિકોમાં આ પારદર્શક કાર્યશૈલીને લઈને ભારે ઉત્સાહ જોવા મળ્યો હતો અને સરકારની આ કટિબદ્ધતાને બિરદાવવામાં આવી હતી.
