લાંચ કેસમાં ફરાર મોહમદ ઇસ્લામ ઉર્ફે પરવાનાની અંતે ધરપકડ, ACB દ્વારા તપાસનો ધમધમાટ
સુરતમાં લાંચ-રુશ્વત વિરોધી બ્યુરો (ACB) દ્વારા લાંચિયા અધિકારીઓ અને તેમને મદદગારી કરનારા વચેટીયાઓ વિરુદ્ધ હાથ ધરવામાં આવેલા અભિયાનમાં એક મોટી સફળતા મળી છે. સુરત ACBમાં વર્ષ 2025માં નોંધાયેલા લાંચના ગુનામાં છેલ્લા પાંચ મહિનાથી ફરાર કથિત પત્રકાર મોહમદ ઇસ્લામ ઉર્ફે ઇસ્માઇલ ઉર્ફે પરવાના જમીલખાન પઠાણની આખરે ધરપકડ કરવામાં આવી છે. આ આરોપી ACBના છટકા દરમિયાન લાંચની રકમ લઈને ફરાર થઈ ગયો હતો, જેની શોધખોળ માટે પોલીસ લાંબા સમયથી પ્રયત્નશીલ હતી.
કેસની વિગત: કાર્યપાલક ઇજનેર અને વચેટીયાનું કાવતરું
આ સમગ્ર કેસની શરૂઆત ત્યારે થઈ હતી જ્યારે સુરત મહાનગરપાલિકાના લીંબાયત ઝોનમાં કાર્યપાલક ઇજનેર તરીકે ફરજ બજાવતા વિપુલ ગણેશવાલા દ્વારા એક અરજદાર પાસે લાખો રૂપિયાની લાંચની માંગણી કરવામાં આવી હતી. ઇજનેરે પોતાના સરકારી કામના બદલામાં ફરિયાદી પાસેથી લાંચ માંગી હતી અને આ રકમ મેળવવા માટે તેણે પોતાના અંગત માણસ ગણાતા કથિત પત્રકાર ‘પરવાના’નો ઉપયોગ કર્યો હતો. ઇજનેરે ફરિયાદીને સ્પષ્ટ સૂચના આપી હતી કે લાંચની રકમ તેણે તેના માણસ એટલે કે પરવાનાને આપી દેવી.
ACBનું છટકું અને આરોપીની ફિલ્મી સ્ટાઈલમાં ફરારી
ભ્રષ્ટાચારથી કંટાળીને ફરિયાદીએ તાત્કાલિક સુરત ACBનો સંપર્ક કર્યો હતો. ACBએ છટકું ગોઠવ્યું અને ફરિયાદીને લાંચની રકમ લઈને આરોપીની ઓફિસે મોકલ્યા. યોજના મુજબ, ફરિયાદી જ્યારે ઓફિસે પહોંચ્યા અને કથિત પત્રકાર પરવાનાને 4 લાખ રૂપિયાની લાંચની રકમ સોંપી, ત્યારે ત્યાં હાજર ACBની ટીમે તેને રંગે હાથે ઝડપવા પ્રયાસ કર્યો હતો. જોકે, પોલીસની ગતિવિધિ પારખી જતા આ ચતુર આરોપી લાંચની રકમ લઈને ત્યાંથી ફરાર થઈ ગયો હતો. ત્યારથી લઈને છેલ્લા પાંચ મહિના સુધી આરોપી પોલીસની પકડથી દૂર હતો.
બુધવારે ACB સમક્ષ હાજરી, ધરપકડ બાદ અનેક ખુલાસાની આશા
પોલીસના સતત દબાણ અને કાયદાકીય મર્યાદાઓને જોતા અંતે બુધવારે કથિત પત્રકાર મોહમદ ઇસ્લામ ઉર્ફે પરવાનાએ સુરત ACB સમક્ષ આત્મસમર્પણ કર્યું હતું. પોલીસે તેની તાત્કાલિક ધરપકડ કરી કાયદેસરની કાર્યવાહી હાથ ધરી છે. આ ધરપકડ બાદ હવે સુરત ACB દ્વારા આ કેસના મૂળ સુધી પહોંચવા માટે તપાસનો ધમધમાટ શરૂ કરવામાં આવ્યો છે.
ACBની તપાસ કઈ દિશામાં?
હવે સૌથી મોટો પ્રશ્ન એ છે કે, છેલ્લા પાંચ મહિના દરમિયાન આ આરોપી ક્યાં છુપાયો હતો? તેને આ ફરારી સમયગાળામાં કોણે-કોણે આશ્રય આપ્યો અને કોની મદદથી તે પોલીસથી બચતો રહ્યો? આ તમામ પાસાઓ પર ACB ઊંડાણપૂર્વક તપાસ કરી રહી છે. આ ઉપરાંત, 4 લાખ રૂપિયાની જે લાંચની રકમ તે લઈને ભાગ્યો હતો, તે અત્યારે ક્યાં છે અને તે રકમમાં અન્ય કોનો હિસ્સો હતો, તે અંગે પણ આરોપીની કડક પૂછપરછ કરવામાં આવી રહી છે.
સુરત ACBની આ કાર્યવાહીથી ભ્રષ્ટ અધિકારીઓ અને વચેટીયાઓમાં ફફડાટ વ્યાપી ગયો છે. પાલિકાના કામોમાં થતી લાંચ-રુશ્વતની પ્રવૃત્તિઓમાં કથિત પત્રકારોની સંડોવણીનો આ મામલો અનેક રહસ્યો ખોલશે તેવી આશા સેવાઈ રહી છે. આરોપીના રિમાન્ડ મેળવીને પોલીસે હવે આ આખા નેટવર્કનો પર્દાફાશ કરવા માટે કમર કસી છે. શું આ લાંચના પૈસા માત્ર ઇજનેર અને પરવાના વચ્ચે જ વહેંચાવાના હતા કે પછી તેમાં કોઈ મોટા માથાઓનો પણ હાથ હતો? આ તમામ વિગતો હવે તપાસ દરમિયાન બહાર આવશે.
