પાકિસ્તાની ખેલાડી થયો ગંભીર ઈજાગ્રસ્ત, સ્ટ્રેચર પર મેદાનની બહાર લઈ જવો પડ્યો
નેશનલ ટી-20 કપ 2026: પાકિસ્તાન સુપર લીગ (PSL) ની આગામી સીઝન શરૂ થાય તે પહેલા પાકિસ્તાન ક્રિકેટ બોર્ડ દ્વારા ‘નેશનલ ટી-20 કપ 2026’ નું આયોજન કરવામાં આવ્યું છે. આ ટૂર્નામેન્ટમાં પાકિસ્તાનના અનેક દિગ્ગજ અને ઉભરતા ખેલાડીઓ પોતાની પ્રતિભા બતાવી રહ્યા છે. જોકે, શનિવારે રમાયેલી એક મેચ દરમિયાન પાકિસ્તાનનો સ્પીડ સ્ટાર જમાન ખાન ગંભીર રીતે ઈજાગ્રસ્ત થતા રમત પ્રેમીઓમાં ચિંતા ફેલાઈ છે.
મેદાન પર સર્જાયો ગંભીર અકસ્માત
નેશનલ ટી-20 કપના 13મા મુકાબલામાં ફેસલાબાદ અને પેશાવરની ટીમો આમને-સામને હતી. આ મેચમાં ફેસલાબાદ તરફથી રમી રહેલા જમાન ખાનને ફિલ્ડિંગ દરમિયાન ખભાના ભાગે ગંભીર ઈજા થઈ હતી. ઈજા એટલી ગંભીર હતી કે જમાન પોતાની જાતે ઊભો પણ થઈ શક્યો નહોતો અને આખરે મેડિકલ સ્ટાફે તેને સ્ટ્રેચર પર સુવડાવીને મેદાનની બહાર લઈ જવો પડ્યો હતો.
પાકિસ્તાન ક્રિકેટ બોર્ડ (PCB) એ આ મામલે સત્તાવાર પુષ્ટિ કરતા જણાવ્યું છે કે, જમાન ખાનને ખભામાં ‘એક્રોમિયોક્લેવિક્યુલર જોઈન્ટ’ (ACJ) ડિસલોકેશનની સમસ્યા થઈ છે.
તબીબી તપાસ અને રિકવરી પ્લાન
PCB ના લેટેસ્ટ અપડેટ અનુસાર, જમાન ખાન 14 માર્ચના રોજ લાહોર સ્થિત નેશનલ ક્રિકેટ એકેડમી (NCA) પહોંચશે. ત્યાં નિષ્ણાત ડોક્ટરો દ્વારા તેની વિગતવાર મેડિકલ તપાસ કરવામાં આવશે. આ તપાસના રિપોર્ટના આધારે જ નક્કી કરવામાં આવશે કે તેની રિકવરીમાં કેટલો સમય લાગશે અને તેના માટે કેવા પ્રકારનો રિહેબિલિટેશન પ્રોગ્રામ તૈયાર કરવો.
I hope he’s fine but reports state that Zaman Khan has broken his arm during fielding in the NT20 Cup. pic.twitter.com/BZHpkWFqRE
— Mohammad Aizaz (@SeedaBalla93) March 13, 2026
PSL 2026 માં રમવા પર લટકતી તલવાર
આઈપીએલ 2026 ની જેમ જ પાકિસ્તાન સુપર લીગ (PSL) પણ 28 માર્ચથી શરૂ થવા જઈ રહી છે. જમાન ખાન આ વખતે નવી ટીમ ‘પિંડીઝ’ (Pindis) નો ભાગ છે. જો તેની ઈજા સમયસર ઠીક નહીં થાય, તો તે આખી સીઝન ગુમાવી શકે છે. જમાન ખાન તેની અનોખી બોલિંગ એક્શન અને ડેથ ઓવરોમાં સચોટ યોર્કર નાખવા માટે જાણીતો છે. જોકે, છેલ્લા કેટલાક સમયથી તે રાષ્ટ્રીય ટીમની બહાર છે, તેમ છતાં લીગ ક્રિકેટમાં તેની ભારે માંગ રહે છે.
