હોકી વર્લ્ડ કપ 2026: ભારત અને પાકિસ્તાન વચ્ચે જંગ નક્કી, બંને ટીમોને એક જ ગ્રુપમાં મળ્યું સ્થાન
વિશ્વભરના હોકી ચાહકો માટે રોમાંચક સમાચાર સામે આવ્યા છે. આ વર્ષે 15 થી 30 ઓગસ્ટ દરમિયાન યોજાનારા હોકી વર્લ્ડ કપ 2026 માટે પુરૂષ અને મહિલા ટીમોના ગ્રુપની સત્તાવાર જાહેરાત કરી દેવામાં આવી છે. સૌથી વધુ ચર્ચાસ્પદ બાબત એ છે કે, ભારતીય પુરૂષ ટીમને કટ્ટર હરીફ પાકિસ્તાન સાથે એક જ ગ્રુપમાં રાખવામાં આવી છે, જેને કારણે મેદાન પર ફરી એકવાર હાઈ-વોલ્ટેજ મુકાબલો જોવા મળશે.
નેધરલેન્ડ અને બેલ્જિયમ કરશે સંયુક્ત યજમાની
FIH હોકી વર્લ્ડ કપ 2026નું આયોજન નેધરલેન્ડ અને બેલ્જિયમ દ્વારા સંયુક્ત રીતે કરવામાં આવશે. આ મેગા ટૂર્નામેન્ટની શરૂઆત 15 ઓગસ્ટથી થશે અને ફાઈનલ મેચ 30 ઓગસ્ટના રોજ રમાશે. 17 માર્ચના રોજ એમ્સ્ટરડેમના વેગનર સ્ટેડિયમમાં યોજાયેલી ડ્રો સેરેમનીમાં ગ્રુપ નક્કી કરવામાં આવ્યા હતા. ભારતીય પુરૂષ ટીમ પોતાના તમામ મુકાબલા નેધરલેન્ડમાં રમશે તેવી શક્યતા છે.
ગ્રુપ-ડી માં ભારત અને પાકિસ્તાન વચ્ચે ટક્કર
પુરૂષ ઈવેન્ટમાં ભારત અને પાકિસ્તાનને પૂલ-ડી (Pool-D) માં સ્થાન મળ્યું છે. આ ગ્રુપમાં ભારત અને પાકિસ્તાન ઉપરાંત ઈંગ્લેન્ડ અને વેલ્સની ટીમો પણ સામેલ છે. હોકી વર્લ્ડ કપના ઈતિહાસમાં ભારત અને પાકિસ્તાન અત્યાર સુધી 5 વખત સામસામે આવી ચૂક્યા છે, જેમાં ભારતનો હાથ ઉપર રહ્યો છે. ભારતે 3 મેચ જીતી છે, જ્યારે પાકિસ્તાનને 2 મેચમાં જીત મળી છે. છેલ્લે 2010માં નવી દિલ્હીમાં રમાયેલા મુકાબલામાં ભારતે પાકિસ્તાનને 4-1થી હરાવ્યું હતું.
પુરૂષ હોકી વર્લ્ડ કપ 2026 ના ગ્રુપ આ મુજબ છે:
- પૂલ A: નેધરલેન્ડ, આર્જેન્ટિના, ન્યુઝીલેન્ડ, જાપાન.
- પૂલ B: બેલ્જિયમ, જર્મની (ડિફેન્ડિંગ ચેમ્પિયન), ફ્રાન્સ, મલેશિયા.
- પૂલ C: ઓસ્ટ્રેલિયા, સ્પેન, આયર્લેન્ડ, દક્ષિણ આફ્રિકા.
- પૂલ D: ઈંગ્લેન્ડ, ભારત, પાકિસ્તાન, વેલ્સ.
ભારતીય મહિલા ટીમનું ગ્રુપ પણ જાહેર
મહિલા હોકી વર્લ્ડ કપમાં પણ ભારતીય ટીમે પોતાનું સ્થાન પાકું કરી લીધું છે. ભારતીય મહિલા ટીમને પણ પૂલ-ડી માં રાખવામાં આવી છે, જ્યાં તેમનો મુકાબલો ચીન, ઈંગ્લેન્ડ અને દક્ષિણ આફ્રિકા જેવી મજબૂત ટીમો સામે થશે.
મહિલા ગ્રુપ વિગતો:
- પૂલ A: નેધરલેન્ડ, ઓસ્ટ્રેલિયા, ચિલી, જાપાન.
- પૂલ B: આર્જેન્ટિના, જર્મની, USA, સ્કોટલેન્ડ.
- પૂલ C: બેલ્જિયમ, સ્પેન, ન્યુઝીલેન્ડ, આયર્લેન્ડ.
- પૂલ D: ચીન, ઈંગ્લેન્ડ, ભારત, દક્ષિણ આફ્રિકા.
