રોસેટા કાફે અને બાપુ નો ઓટલો હોટલ સામે કાર્યવાહી, એક-એક લાખનો દંડ ફટકારાયો
કરમસદ આણંદ મહાનગરપાલિકાના કમિશનરના સીધા માર્ગદર્શન હેઠળ શહેરના એસ્ટેટ અને ટાઉન પ્લાનિંગ વિભાગ દ્વારા ખાસ તપાસ ઝુંબેશ હાથ ધરવામાં આવી છે. આ કાર્યવાહીનો મુખ્ય ઉદ્દેશ્ય શહેરમાં વધી રહેલા અનઅધિકૃત બાંધકામો અને નિયમોના ઉલ્લંઘન સામે લાલ આંખ કરવાનો છે. પાલિકાની ટીમો દ્વારા શહેરના મુખ્ય માર્ગો પર આવેલી વ્યાપારી મિલકતોની ચકાસણી કરવામાં આવી રહી છે, જેથી જાહેર સુવિધામાં નડતરરૂપ દબાણો દૂર કરી શકાય અને કાયદાનું પાલન સુનિશ્ચિત કરી શકાય.
બાપુનો ઓટલો અને રોસેટા કાફેમાં આકસ્મિક તપાસણી
આ ઝુંબેશ અંતર્ગત ૮૦ ફૂટ રોડ પર આવેલા સરદાર બેન્કવેટ હોલ પાસેની ‘બાપુનો ઓટલો’ હોટલ અને સંકેત રોડ પર દેવ શ્રી ગોલ્ડ કોમ્પ્લેક્સમાં સ્થિત ‘રોસેટા કાફે’ ખાતે આકસ્મિક ચેકિંગ કરવામાં આવ્યું હતું. તપાસ દરમિયાન જાણવા મળ્યું હતું કે રોસેટા કાફેએ માર્જિનની જગ્યામાં અનઅધિકૃત દબાણ અને ગેરકાયદેસર બાંધકામ કર્યું હતું. જ્યારે બાપુનો ઓટલો હોટલ પાસે બિન ખેતી પરવાનગી, બાંધકામ મંજૂરી કે ફાયર એનઓસી (NOC) જેવી અનિવાર્ય મંજૂરીઓનો અભાવ જોવા મળ્યો હતો.
પુરાવા રજૂ ન કરી શકતા બંને હોટલ સીલ અને લાખોનો દંડ
મહાનગરપાલિકા દ્વારા અગાઉ આ બંને એકમોને નોટિસ આપીને જરૂરી દસ્તાવેજો રજૂ કરવા જણાવવામાં આવ્યું હતું. જોકે, હોટલ અને કાફેના માલિકો પૂરતા પુરાવા કે મંજૂરીના કાગળો રજૂ કરવામાં નિષ્ફળ રહ્યા હતા. કોઈપણ પ્રકારની સરકારી પરવાનગી વગર વ્યાપારી પ્રવૃત્તિઓ ચલાવવામાં આવતી હોવાનું સ્પષ્ટ થતા તંત્ર દ્વારા તાત્કાલિક અસરથી બંને સ્થળોને સીલ કરી દેવામાં આવ્યા છે. આ ઉપરાંત, નિયમોના ભંગ બદલ બંનેને એક-એક લાખ રૂપિયાનો માતબર દંડ પણ ફટકારવામાં આવ્યો છે.
ફાયર સેફ્ટી અને બીયુ પરમિશન વગરના એકમો સામે કાર્યવાહી ચાલુ રહેશે
પાલિકાના એસ્ટેટ વિભાગના અધિકારીઓએ સ્પષ્ટ કર્યું છે કે આગામી સમયમાં પણ આ તપાસ અભિયાન તેજ ગતિએ ચાલુ રહેશે. જે હોટલ કે રેસ્ટોરન્ટ પાસે બીયુ (Building Use) પરમિશન અથવા ફાયર સેફ્ટીની એનઓસી નહીં હોય, તેમની સામે કડક કાયદાકીય પગલાં લેવામાં આવશે. સુરક્ષાના નિયમોનું પાલન ન કરનાર એકમોને સીલ કરીને દંડનીય કાર્યવાહી કરવામાં આવશે. તંત્રની આ કડક કાર્યવાહીથી અન્ય વેપારીઓમાં ફફડાટ ફેલાયો છે અને નિયમોના પાલન માટે જાગૃતિ વધવાની અપેક્ષા છે.
