‘આ છોકરો શું કરશે?’ T20ના અનુભવ વગરના ખેલાડી પર દિલ્હીએ લગાવ્યો હતો ₹2.6 કરોડનો દાવ; યુવરાજ સિંહને પણ પાછળ છોડી દીધો
ઇન્ડિયન પ્રીમિયર લીગે (IPL) વર્ષોથી ક્રિકેટ જગતને અનેક હીરા શોધીને આપ્યા છે. જસપ્રીત બુમરાહ અને હાર્દિક પંડ્યા જેવા ખેલાડીઓ આજે જે ઊંચાઈ પર છે, તેની પાછળ ફ્રેન્ચાઈઝીઓની સ્કાઉટિંગ ટીમની જોરદાર મહેનત રહેલી છે. આવો જ એક કિસ્સો દિલ્હી કેપિટલ્સ (તત્કાલીન દિલ્હી ડેરડેવિલ્સ) અને શ્રેયસ અય્યરનો છે, જેનો ખુલાસો દિગ્ગજ કોચ પ્રવીણ આમરેએ તાજેતરમાં કર્યો છે.
આ વાત છે વર્ષ 2015ની, જ્યારે દિલ્હીની ટીમે હરાજીમાં યુવરાજ સિંહને ₹16 કરોડમાં ખરીદીને સનસનાટી મચાવી દીધી હતી. પરંતુ તે જ હરાજીમાં એક 18 વર્ષના યુવાન પર ટીમે જે દાવ ખેલ્યો હતો, તેણે બધાને ચોંકાવી દીધા હતા.
T20 રમ્યા વગર જ મળી ₹2.6 કરોડની કિંમત
પ્રવીણ આમરેએ ‘ગ્રેટ ઇન્ડિયન ક્રિકેટ શો’માં જણાવ્યું કે, તેઓ શ્રેયસ અય્યરને 10 વર્ષથી ઓળખતા હતા. 2015ની હરાજીમાં શ્રેયસની બેઝ પ્રાઈસ માત્ર ₹10 લાખ હતી. પરંતુ જેવી બોલી શરૂ થઈ, કિંમત ₹1 કરોડ અને પછી ₹2 કરોડને વટાવી ગઈ. અંતે દિલ્હીએ તેને ₹2.6 કરોડમાં ખરીદ્યો.
આશ્ચર્યની વાત એ હતી કે શ્રેયસે તે સમય સુધી એક પણ સત્તાવાર T20 મેચ રમી નહોતી. પ્રવીણ આમરે કહે છે, “અમારા માલિક કિરણ કુમાર ગ્રંધીએ મારા પર વિશ્વાસ મૂક્યો. તેમને પણ વિચાર આવ્યો હશે કે આ 18 વર્ષનો છોકરો, જેને આપણે બેઝ પ્રાઈસ કરતા 26 ગણી વધુ રકમ આપી રહ્યા છીએ, તે શું કરશે?”
યુવરાજ સિંહ કરતા પણ ચઢિયાતું પ્રદર્શન
વર્ષ 2015ની સીઝન દિલ્હી માટે નિરાશાજનક રહી હતી અને ટીમ સાતમા નંબરે રહી હતી. પરંતુ શ્રેયસ અય્યર આ સીઝનનો સૌથી મોટો ફાયદો સાબિત થયો. તે વર્ષે ₹16 કરોડમાં વેચાયેલા યુવરાજ સિંહે આખી સીઝનમાં માત્ર 248 રન બનાવ્યા હતા, જ્યારે અનુભવ વગરના શ્રેયસ અય્યરે 439 રન ફટકારીને ‘ઇમર્જિંગ પ્લેયર’નો એવોર્ડ જીતી લીધો હતો.
આમરેના જણાવ્યા મુજબ, તેમની જવાબદારી હતી કે શ્રેયસને યોગ્ય તક મળે, કારણ કે તેમને ખબર હતી કે આ ખેલાડીમાં ટીમનું નેતૃત્વ કરવાની ક્ષમતા છે.
View this post on Instagram
દિલ્હીનો ચહેરો અને પંજાબનો સુપરસ્ટાર
પ્રવીણ આમરેનો અંદાજ સાચો પડ્યો અને શ્રેયસ અય્યર આગામી સાત વર્ષ સુધી દિલ્હી કેપિટલ્સનો ચહેરો બની રહ્યો. તેણે દિલ્હી માટે 87 મેચોમાં 2,375 રન બનાવ્યા અને IPL 2020માં ટીમને પ્રથમ વખત ફાઈનલ સુધી પહોંચાડી.
ત્યારબાદ, IPL 2024માં તેણે કોલકાતા નાઈટ રાઈડર્સને (KKR) પોતાની કેપ્ટનશીપ હેઠળ ત્રીજી વખત ચેમ્પિયન બનાવ્યું. ગયા વર્ષની હરાજીમાં પંજાબ કિંગ્સે તેના પર ₹26.75 કરોડની અત્યાર સુધીની બીજી સૌથી મોટી બોલી લગાવી હતી અને તેણે પંજાબને રનર-અપ બનાવીને ફરી એકવાર પોતાની કિંમત સાબિત કરી દીધી છે.
