PM મોદીએ ઈરાનના રાષ્ટ્રપતિ મસૂદ પેઝેશ્કિયન સાથે કરી વાતચીત: પશ્ચિમ એશિયામાં શાંતિ અને સુરક્ષિત શિપિંગ રૂટ માટે કરી અપીલ
ભારતના વડાપ્રધાન નરેન્દ્ર મોદીએ શનિવારે ઈરાનના રાષ્ટ્રપતિ ડૉ. મસૂદ પેઝેશ્કિયન સાથે ટેલિફોનિક વાતચીત કરી હતી. આ વાતચીત દરમિયાન PM મોદીએ ઈદ અને નવરોઝની શુભેચ્છાઓ પાઠવવાની સાથે પ્રદેશમાં ચાલી રહેલા ગંભીર સૈન્ય તણાવ અને દરિયાઈ સુરક્ષા અંગે ઊંડી ચિંતા વ્યક્ત કરી હતી.
સોશિયલ મીડિયા પ્લેટફોર્મ ‘X’ પર આ અંગે માહિતી આપતા વડાપ્રધાને જણાવ્યું હતું કે, “રાષ્ટ્રપતિ ડૉ. મસૂદ પેઝેશ્કિયન સાથે વાત કરી અને તેમને ઈદ તથા નવરોઝની શુભકામનાઓ આપી. અમે આશા વ્યક્ત કરી છે કે આ તહેવારોની મોસમ પશ્ચિમ એશિયામાં શાંતિ, સ્થિરતા અને સમૃદ્ધિ લાવશે.”
દરિયાઈ સુરક્ષા અને વૈશ્વિક સપ્લાય ચેઈન પર ભાર
વાતચીત દરમિયાન વડાપ્રધાન મોદીએ ખાસ કરીને દરિયાઈ માર્ગોની સુરક્ષા (Maritime Security) પર ભાર મૂક્યો હતો. તેમણે જણાવ્યું હતું કે જહાજોની અવરજવર માટે ‘ફ્રીડમ ઓફ નેવિગેશન’ જાળવી રાખવી અત્યંત આવશ્યક છે. નોંધનીય છે કે ઈરાન અને અમેરિકા-ઈઝરાયેલ વચ્ચેના યુદ્ધને કારણે દરિયાઈ વેપાર માર્ગો પર મોટું જોખમ ઊભું થયું છે.
વડાપ્રધાને પ્રદેશમાં મહત્વપૂર્ણ માળખાગત સુવિધાઓ પર થઈ રહેલા હુમલાઓની સખત નિંદા કરી હતી. તેમણે સ્પષ્ટ કર્યું કે આવા હુમલાઓ માત્ર પ્રાદેશિક સ્થિરતાને જ જોખમમાં નથી મૂકતા, પરંતુ વૈશ્વિક સપ્લાય ચેઈનને પણ ખોરવે છે, જેની અસર ભારત સહિત સમગ્ર વિશ્વના અર્થતંત્ર પર પડી રહી છે.
ભારતીય નાગરિકોની સુરક્ષા અંગે ચર્ચા
PM મોદીએ ઈરાનમાં વસતા ભારતીય નાગરિકોની સુરક્ષા અને સલામતી માટે ઈરાન સરકાર દ્વારા આપવામાં આવી રહેલા સતત સહયોગની પ્રશંસા કરી હતી. યુદ્ધની આ પરિસ્થિતિમાં વિદેશમાં રહેલા ભારતીયોની સુરક્ષા ભારત સરકાર માટે પ્રાથમિકતા રહી છે.
ઉલ્લેખનીય છે કે ૨૮ ફેબ્રુઆરીએ અમેરિકા અને ઈઝરાયેલ દ્વારા ઈરાન પર કરવામાં આવેલા હુમલા બાદ બંને દેશો વચ્ચે યુદ્ધ ફાટી નીકળ્યું છે. આ સંઘર્ષ શરૂ થયા પછી વડાપ્રધાન મોદી અને ઈરાની રાષ્ટ્રપતિ વચ્ચે આ બીજી ટેલિફોનિક વાતચીત હતી. અગાઉ ૧૨ માર્ચના રોજ પણ રાષ્ટ્રપતિ પેઝેશ્કિયને PM મોદીને ઈરાનની વર્તમાન સ્થિતિ વિશે માહિતગાર કર્યા હતા.
સંવાદ અને ડિપ્લોમસી જ એકમાત્ર ઉકેલ
ભારતના વિદેશ મંત્રાલયના જણાવ્યા અનુસાર, વડાપ્રધાને ફરી એકવાર ભારતનું સત્તાવાર વલણ દોહરાવ્યું છે કે કોઈપણ વિવાદનો ઉકેલ યુદ્ધ દ્વારા નહીં, પરંતુ સંવાદ (Dialogue) અને મુત્સદ્દીગીરી (Diplomacy) દ્વારા જ આવવો જોઈએ. પ્રદેશમાં બગડતી જતી સુરક્ષા સ્થિતિ અંગે ભારતે તેની ગંભીર ચિંતા વ્યક્ત કરી છે અને તમામ પક્ષોને સંયમ જાળવવા અપીલ કરી છે.
