ICC T20 રેન્કિંગ: સૂર્યકુમાર યાદવને રમ્યા વગર જ થયો મોટો ફાયદો, જાણો કેવી રીતે બદલાયું સમીકરણ
આઈસીસી (ICC) દ્વારા તાજેતરમાં જાહેર કરવામાં આવેલા લેટેસ્ટ ટી20 રેન્કિંગમાં મોટો ફેરફાર જોવા મળ્યો છે. સૌથી ચોંકાવનારી વાત એ છે કે ભારતીય ટીમના સ્ટાર બેટ્સમેન સૂર્યકુમાર યાદવે છેલ્લા કેટલાક સમયથી કોઈ મેચ રમી નથી, તેમ છતાં તેમને રેન્કિંગમાં ફાયદો થયો છે. સૂર્યા હવે ફરી એકવાર આંતરરાષ્ટ્રીય રેન્કિંગમાં ઉંચી ઉડાન ભરીને સાતમા ક્રમે પહોંચી ગયા છે.
અભિષેક શર્મા હજુ પણ નંબર-1 ના સ્થાને યથાવત
આઈસીસીના નવા રેન્કિંગ અનુસાર, ભારતીય ઓપનર અભિષેક શર્મા 875ની રેટિંગ સાથે વિશ્વના નંબર વન ટી20 બેટ્સમેન તરીકે પોતાનું સ્થાન જાળવી રાખવામાં સફળ રહ્યા છે. બીજા ક્રમે ઇશાન કિશન (871 રેટિંગ) અને ત્રીજા ક્રમે પાકિસ્તાનના સાહિબજાદા ફરહાન (848 રેટિંગ) છે. ટોપ-6 બેટ્સમેનોની યાદીમાં કોઈ ફેરફાર થયો નથી, જેમાં ઇંગ્લેન્ડના ફિલ સોલ્ટ ચોથા, શ્રીલંકાના પથુમ નિસાન્કા પાંચમા અને ભારતનો તિલક વર્મા છઠ્ઠા ક્રમે છે.
સૂર્યકુમાર યાદવને બે સ્થાનનો થયો ફાયદો
ભારતીય કેપ્ટન સૂર્યકુમાર યાદવ હવે રેન્કિંગમાં બે સ્થાનની છલાંગ લગાવીને 7મા નંબર પર આવી ગયા છે. તેમની રેટિંગ 722 છે. આશ્ચર્યની વાત એ છે કે સૂર્યાની રેટિંગમાં કોઈ વધારો થયો નથી, પરંતુ અન્ય ખેલાડીઓના ન રમવાને કારણે તેમને આ ફાયદો મળ્યો છે. આઈસીસીના નિયમો મુજબ, જો કોઈ ટીમ સિરીઝ રમી રહી હોય અને તેનો મુખ્ય ખેલાડી તે મેચોમાં ભાગ ન લે, તો તેની રેટિંગ પોઈન્ટ્સમાં ઘટાડો થાય છે.
ન્યૂઝીલેન્ડના ટિમ સિફર્ટને કારણે સૂર્યા બન્યા ‘નંબર 7’
સૂર્યકુમાર યાદવને આ ફાયદો ન્યૂઝીલેન્ડના બેટ્સમેન ટિમ સિફર્ટને કારણે મળ્યો છે. હાલમાં ન્યૂઝીલેન્ડ અને દક્ષિણ આફ્રિકા વચ્ચે ટી20 શ્રેણી રમાઈ રહી છે, પરંતુ સિફર્ટ આ શ્રેણીનો ભાગ નથી. મેચ ન રમવાને કારણે સિફર્ટની રેટિંગ ઘટીને 719 થઈ ગઈ છે. પરિણામે, સૂર્યા પોતાની જૂની રેટિંગ સાથે જ સિફર્ટ કરતા આગળ નીકળી ગયા છે. આવી જ રીતે દક્ષિણ આફ્રિકાના ડેવાલ્ડ બ્રેવિસને પણ ન રમવાને કારણે નુકસાન થયું છે અને તેઓ 10મા ક્રમે સરકી ગયા છે, જ્યારે જોસ બટલર 9મા સ્થાને પહોંચી ગયા છે.
