ભાવનગરમાં ગુજરાત ગેસ લિમિટેડ દ્વારા ઇમરજન્સી મોક ડ્રીલનું આયોજન

મોક ડ્રિલ દ્વારા ઇમરજન્સી પ્રતિસાદ ક્ષમતા મજબૂત કરવાની કવાયત

ભાવનગરમાં મંત્રેશ સર્કલ પાસે ગુજરાત ગેસ લિમિટેડ દ્વારા આકસ્મિક પરિસ્થિતિઓને પહોંચી વળવા માટે એક વિશેષ ઓફ-સાઇટ મોક ડ્રીલ યોજવામાં આવી હતી. આ ડ્રીલમાં ૩૦૦૦ લિટરની ક્ષમતા ધરાવતી સી.એન.જી. ભરેલી આઈસર એલ.સી.વી. કાસ્કેડમાં ૨૦૦ બારના ભારે દબાણ સાથે ગેસ લીકેજ થવાની કલ્પિત ઘટના ઊભી કરવામાં આવી હતી. આ કવાયતનો મુખ્ય ઉદ્દેશ્ય ગેસ લીકેજ કે આગ જેવી ગંભીર ઘટનાઓ સમયે વિવિધ સુરક્ષા એજન્સીઓ વચ્ચેનું સંકલન તપાસવાનો અને કર્મચારીઓની પ્રતિસાદ ક્ષમતામાં વધારો કરવાનો હતો.

ગેસ લીકેજ અને બ્લાસ્ટની કલ્પિત ઘટનાનું જીવંત નિદર્શન

મોક ડ્રીલની વિગતો મુજબ, જ્યારે સી.એન.જી. કાસ્કેડ મંત્રેશ સર્કલથી ટોપથ્રી સર્કલ તરફ જઈ રહી હતી, ત્યારે અચાનક હાઈ બેન્કની ડિસ્ક ફાટવાથી મોટા અવાજ સાથે કુદરતી ગેસ લીક થવા લાગ્યો હતો. ડ્રાઈવરે સમયસૂચકતા વાપરીને વાહન રોડ સાઈડ ઊભું રાખ્યું અને વાલ્વ બંધ કરવાનો પ્રયાસ કર્યો, પરંતુ અજાણ્યા સ્ત્રોતથી આગ લાગતા નાનો બ્લાસ્ટ થયો હતો. આ કલ્પિત દુર્ઘટનામાં ડ્રાઈવર દાજી જવાની સ્થિતિ સર્જાતા તાત્કાલિક કંપનીનો ઇમરજન્સી પ્લાન એક્ટિવેટ કરવામાં આવ્યો હતો અને તમામ મેન્ટેનન્સ ટીમોને સાઇટ પર રવાના કરવામાં આવી હતી.

વિવિધ સુરક્ષા એજન્સીઓ અને વહીવટી તંત્રનું સંયુક્ત ઓપરેશન

ઘટનાની ગંભીરતાને જોતા અને જાહેર વિસ્તારમાં આશરે ૪૦૦ કિલો ગેસ હોવાથી ગુજરાત ગેસ દ્વારા જિલ્લા આપાતકાલીન વિભાગની મદદ લેવામાં આવી હતી. થોડી જ મિનિટોમાં ફાયર બ્રિગેડ, ૧૦૮ એમ્બ્યુલન્સ, પોલીસ કાફલો અને ડિઝાસ્ટર મેનેજમેન્ટની ટીમો ઘટનાસ્થળે પહોંચી ગઈ હતી. આ ટીમોએ સંયુક્ત રીતે ટ્રાફિક કંટ્રોલ, રેસ્ક્યૂ ઓપરેશન અને ફાયર ફાઈટિંગની કામગીરી હાથ ધરીને પરિસ્થિતિ પર કાબૂ મેળવ્યો હતો. આ પ્રદર્શન દ્વારા બતાવાયું કે કેવી રીતે આધુનિક સાધનો અને ચોક્કસ આયોજનથી મોટી જાનહાનિ ટાળી શકાય છે.

ભાવનગરમાં કેન્દ્રીય ઉડ્ડયન મંત્રી કે. રામમોહન નાયડુનો ભવ્ય અભિવાદન સમારોહ

કે. રામમોહન નાયડુના હસ્તે ભાવનગર-નવી મુંબઈ સીધી ફ્લાઇટ સેવાનો શુભારંભ

કર્મચારીઓમાં સલામતી જાગૃતિ અને પ્રતિસાદ ક્ષમતા મજબૂત કરવાનો ઉદ્દેશ્ય

આ મોક ડ્રીલમાં ડિઝાસ્ટર મેનેજમેન્ટ વિભાગના પ્રતિનિધિઓ, ફેક્ટરી ઇન્સ્પેક્ટર, બી.એમ.સી.ના ફાયર ઓફિસર જયેશભાઈ રબારી અને ભાવનગર પોલીસના અધિકારીઓ હાજર રહ્યા હતા. અધિકારીઓએ જણાવ્યું હતું કે આવી પ્રેક્ટિસથી કર્મચારીઓમાં સલામતી પ્રત્યે જાગૃતિ વધે છે અને વાસ્તવિક આપત્તિ સમયે ગભરાટ વગર કામ કરવાની ક્ષમતા કેળવાય છે. કાર્યક્રમના અંતે તમામ વિભાગોની કામગીરીની સમીક્ષા કરવામાં આવી હતી, જેથી ભવિષ્યમાં સુરક્ષા વ્યવસ્થાને વધુ સજ્જ અને અભેદ્ય બનાવી શકાય.