રાજ્યસભામાં જયા બચ્ચનનો પારો ગરમાયો: ટ્રાન્સજેન્ડર બિલ પર ચર્ચા દરમિયાન વિરોધ પક્ષના સાંસદ પર ભડક્યા, કહ્યું- “બચ્ચા બેસી જા”
સમાજવાદી પાર્ટીના સાંસદ જયા બચ્ચન ફરી એકવાર સંસદમાં તેમના આક્રમક અંદાજને કારણે ચર્ચામાં છે. બુધવારે રાજ્યસભામાં ‘ટ્રાન્સજેન્ડર પર્સન્સ એમેન્ડમેન્ટ બિલ’ પર ચાલી રહેલી ચર્ચા દરમિયાન વારંવાર થતી દખલગીરીથી નારાજ થઈને તેમણે એક સભ્યને “બચ્ચા બેસી જા” કહીને શાંત કરી દીધા હતા.
આ ઘટનાનો વીડિયો સોશિયલ મીડિયા પર વાયરલ થઈ રહ્યો છે, જેમાં જયા બચ્ચન પીઠાસીન અધિકારી (ચેર) ડો. દિનેશ શર્મા સામે પણ પોતાનો પક્ષ મજબૂતીથી રજૂ કરતા જોવા મળે છે.
ભાષણ દરમિયાન સર્જાયો હંગામો
જયા બચ્ચને જ્યારે પોતાના સંબોધનની શરૂઆત કરી ત્યારે તેમણે સૌ પ્રથમ રામ નવમીની શુભેચ્છાઓ પાઠવી હતી. જોકે, તેઓ જ્યારે બિલ પર બોલવાનું શરૂ કરી રહ્યા હતા ત્યારે જ સત્તા પક્ષ તરફથી કેટલાક સભ્યોએ તેમને અટકાવવાનો પ્રયાસ કર્યો હતો. આનાથી નારાજ થઈને જયા બચ્ચને ચેરને સંબોધતા કહ્યું, “જો કોઈ વચ્ચે બોલવાનું શરૂ કરશે તો ધ્યાન ભટકશે. જ્યારે હું બોલી રહી હોઉં ત્યારે તમારું ધ્યાન મારા તરફ હોવું જોઈએ.”
જ્યારે ચેર દ્વારા તેમને સમય મર્યાદાનું ધ્યાન રાખવા અને વિષય પર રહેવા સૂચના આપવામાં આવી, ત્યારે જયા બચ્ચને વળતો જવાબ આપતા કહ્યું કે, “મારો સમય તમારા હાથમાં છે, તમે મારો સમય કાપી ન શકો. જો આવું થશે તો હું ગૃહની વચ્ચે (વેલ) આવી જઈશ.”
બિલના વિરોધમાં આકરા પ્રહાર
ટ્રાન્સજેન્ડર બિલનો વિરોધ કરતા જયા બચ્ચને સરકારની ઉતાવળ પર સવાલો ઉઠાવ્યા હતા. તેમણે પૂછ્યું કે, “આ બિલ લાવવાની આટલી બધી ઉતાવળ શું છે? શા માટે તેને જરૂરી ઊંડાણ અને કાળજી સાથે તપાસવામાં નથી આવતું?”
વધુમાં તેમણે ઈતિહાસનો હવાલો આપતા કહ્યું કે, “જૂના સમયમાં રાજા-મહારાજાઓના મહેલોમાં મહિલાઓની સુરક્ષા માટે ટ્રાન્સજેન્ડર વ્યક્તિઓને રાખવામાં આવતા હતા. તે સમયે તેમને સુરક્ષિત માનવામાં આવતા હતા, પરંતુ આજે અચાનક સરકારને તેમની હાજરીથી અસુરક્ષિતતા અનુભવાઈ રહી છે.”
બિલને પરત ખેંચવાની માંગ
સમાજવાદી પાર્ટી સહિત વિરોધ પક્ષના અનેક સાંસદોએ આ બિલને હાલ પુરતું પાછું ખેંચવાની અથવા તેને સંસદની સિલેક્ટ કમિટી પાસે મોકલવાની માંગ કરી છે. જયા બચ્ચને વિનંતી કરી હતી કે આ બિલને ચોમાસુ સત્રમાં યોગ્ય વિચારણા બાદ ફરીથી લાવવામાં આવે.
