GIDC ગાંધીનગર ગિફ્ટ સિટીમાં એવું કરી રહી છે કે જેનાથી આઇટી કંપનીઓને જલસા…

ગુજરાતમાં ઇન્ફોર્મેશન ટેકનોલોજી ક્ષેત્રે માળખાગત સુવિધા ઉભી કરવા તેમજ ફાયનાન્સ હબ માટે ગિફ્ટ સિટીમાં ટેકનોહબ સ્થાપવા માટે ગુજરાત ઔદ્યોગિક વિકાસ નિગમ (જીઆઇડીસી) એ તૈયારી શરૂ કરી છે. કુલ 12 લાખ ચોરસફુટની જગ્યામાં ટેકનોહબ બનાવવાનું થાય છે પરંતુ પ્રથમ તબક્કે છ લાખ ચોરસફુટમાં તેની શરૂઆત કરાશે.

જીઆઇડીસીના ઉચ્ચ અધિકારીએ કહ્યું હતું કે ગાંધીનગર સ્થિત ગિફ્ટ સિટીમાં ટેકનોહબ બનાવવા માટે બીડ પ્રોસેસ પૂર્ણ કરવામાં આવી છે જેમાં ત્રણ કંપનીઓ— શાપુરજી પલોનજી, પીએસપી પ્રોજેક્ટ્સ અને ક્યુબ કન્સ્ટ્રક્શન એ રસ દાખવ્યો હતો. આ બીડના પરિણામના આધારે જમીનની ફાળવણી તેમજ આંતર માળખાકીય સુવિધા ઉભી કરવાનો કોન્ટ્રાક્ટ અપાશે.

તેમણે કહ્યું હતું કે હાલમાં ગિફ્ટ સિટીમાં આઇટી કંપનીઓ માટે માળખગત સુવિધા ઊભી કરવા માટે પ્રથમ તબક્કામાં 6 લાખ ચોરસફુટના બાંધકામ માટેની પ્રક્રિયા પૂર્ણ કરવામાં આવી છે. પસંદ કરવામાં આવેલી કંપની ટાવર ઉભો કરશે. આ ટાવરમાં જગ્યાનો ભાવ નક્કી કરીને આઇટી કંપનીઓને ઓફર કરવામાં આવશે, જો કે આઇટી કંપનીઓએ કહ્યું છે કે અમને પોસાય તેવો ભાવ હોવો જોઇએ, એટલે ગિફ્ટ સિટીએ ભાવ નિયત કરતાં પહેલાં આઇટી કંપનીઓ સાથે પરામર્શ કરવાનું નક્કી કર્યું છે.

રાજ્યમાં આઇટી કંપનીઓ વિસ્તરણ કરે તેવા આશયથી આઇટી સોફ્ટવેર ક્ષેત્રની રાજ્યની અગ્રણી સંસ્થા ગેસિયા સાથે રાજ્ય સરકારે સમજૂતી કરાર કરેલા છે. જ્યારે કરાર થયા હતા ત્યારે 40 જેટલી આઇટી કંપનીઓએ પોતાનું યુનિટ સ્થાપવા માટે તૈયારી બતાવી હતી પરંતુ જીઆઇડીસીના અધિકારી કહે છે કે બીજી આઇટી કંપનીઓએ પણ પૃછા કરી હોવાથી હવે ડિમાન્ડ વધી રહી છે.

જીઆઇડીસીના અધિકારીના જણાવ્યા પ્રમાણે કુલ 12 લાખ ચોરસફુટ જગ્યામાં ટેક હબ સ્થપાશે, જેમાં પ્રથમ તબક્કામાં 6 લાખ ચોરસફુટ જગ્યાને જીઆઇડીસી ડેવલપ કરશે. જીઆઇડીસી એક વર્ષમાં પ્રોજેક્ટ ઊભો કરશે. રાજ્ય સરકારે અગાઉ સાણંદ કે ભાટ નજીક આઇટી કંપનીઓને આ પ્રકારની માળખાગત સુવિધા આપવા વિચાર્યું હતું પરંતુ હવે તે પ્રોજેક્ટ ગિફ્ટ સિટીમાં ખસેડવામાં આવ્યો છે.