ભારતમાં કોરોના વાઈરસ (Corona Virus)ના કેસો ઝડપથી વધી રહ્યાં છે. છેલ્લા 24 કલાકમાં દેશમાં કોરોનાના અત્યાર સુધી સૌથી વધુ 69,652 નવા કેસ સામે આવ્યા છે. આ સાથે જ ભારતમાં કોરોના સંક્રમિતોની સંખ્યા 28 લાખની પાર થઈ ચૂકી છે. આટલું નહી, દેશમાં છેલ્લા એક દિવસમાં દેશમાં 977 લોકોએ પોતાનો જીવ પણ ગુમાવ્યો છે.
કેન્દ્રીય સ્વાસ્થ્ય મંત્રાલય તરફથી રજૂ કરવામાં આવેલા આંકડા અનુસાર, આજના નવા કેસો ઉમેરાવા સાથે જ દેશભરમાં કોરોના સંક્રમિતોનો કુલ આંકડો વધીને 28,36,926 પર પહોંચી ગયો છે. જ્યારે અત્યાર સુધીમાં 53,866 લોકોએ કોરોનાના કારણે પોતાનો જીવ ગુમાવ્યો છે.
હાલ દેશમાં 6,86,395 કોરોનાના એક્ટિવ કેસો છે. જો કે રાહતની વાત છે કે, અત્યાર સુધી 20,96,665 દર્દીઓ સ્વસ્થ થઈ જતાં તેમને હોસ્પિટલમાંથી રજા આપી દેવામાં આવી છે.
આ દરમિયાન દેશમાં પ્રથમ વખત કોરોનાનો પોઝિટિવટી રેટ નીચે ઉતરતો જોવા મળી રહ્યો છે. એટલે કે, ટેસ્ટિંગ વધવા છતાં પણ સંક્રમિતોની સંખ્યા ઓછી સામે આવી રહી છે.
જણાવી દઈએ કે, 9 ઓગસ્ટ સુધી દેશમાં પોઝિટિવિટી રેટ 9 ટકાની આસપાસ હતો. જો કે બાદમાં આ દર સતત ઘટતો રહ્યો છે. મંગળવાર સુધીના આંકડાની વાત કરીએ, આ દર 8.72 ટકા રહી ગયો છે. આ પ્રકારે હવે દરરોજ મળનારા સંક્રમિતોના આંકડામાં સ્થિરતા આવી છે. હાલ ભારતમાં કોરોનાના કેસ બમણાં થવાનો દર 30 દિવસની આસપાસ છે.