RIL ના શેર બે દિવસમાં 5% ઘટ્યા: કેમ તૂટ્યો રિલાયન્સનો સ્ટોક? એક્સપર્ટે જણાવ્યું અસલી કારણ

RIL શેરના ઘટાડા પાછળનો અસલી ‘વિલન’ કોણ? શોર્ટ સેલર્સે કેવી રીતે કરી કમાણી, વાંચો સંપૂર્ણ રિપોર્ટ

ભારતીય શેરબજારના દિગ્ગજ સ્ટોક રિલાયન્સ ઇન્ડસ્ટ્રીઝ લિમિટેડ (RIL) માં છેલ્લા બે ટ્રેડિંગ સેશનમાં 5 ટકાનો ઘટાડો જોવા મળ્યો છે. રોકાણકારોમાં ચિંતાનો માહોલ છે કે શું કંપનીના ફંડામેન્ટલ્સમાં કોઈ ખામી છે? આ બાબતે માર્કેટ એક્સપર્ટ અને DRChoksey FinServ Pvt ના મેનેજિંગ ડિરેક્ટર દેવેન ચોક્સીએ વિગતવાર સમજૂતી આપી છે.

શું રિલાયન્સના ફંડામેન્ટલ્સ નબળા પડ્યા છે?

દેવેન ચોક્સીના જણાવ્યા મુજબ, રિલાયન્સ ઇન્ડસ્ટ્રીઝના ફંડામેન્ટલ્સ હજુ પણ મજબૂત છે. તેમણે જણાવ્યું કે:

• O2C બિઝનેસ: ઓઈલ ટુ કેમિકલ (O2C) બિઝનેસમાં કાચા માલના ભાવમાં વધઘટને કારણે થોડી પ્રતિકૂળતા આવી શકે છે, પરંતુ તેને આખી કંપની સાથે જોડી શકાય નહીં.

• Jio અને રિટેલ: રિલાયન્સ જિયો અને રિટેલ સેગમેન્ટમાં કોઈ નકારાત્મક અસર જોવા મળી નથી. આ બંને ક્ષેત્રો સતત સારું પ્રદર્શન કરી રહ્યા છે.

• FPI સેલિંગ: છેલ્લા દોઢ વર્ષમાં વિદેશી પોર્ટફોલિયો રોકાણકારો (FPIs) એ કેશ માર્કેટમાં તેમનું હોલ્ડિંગ આશરે 2 ટકા ઘટાડ્યું છે. આ વેચાણ આશરે ₹30,000 થી ₹40,000 કરોડના માર્કેટ કેપ જેટલું છે. જોકે, ભારતીય મ્યુચ્યુઅલ ફંડ્સે આ હિસ્સો ખરીદીને સ્ટોકને સ્થિર રાખવામાં મદદ કરી છે.

ઘટાડા પાછળનો અસલી ‘વિલન’: ડેરિવેટિવ માર્કેટ

સ્ટોકમાં થયેલા તાજેતરના ઘટાડા માટે દેવેન ચોક્સીએ ડેરિવેટિવ માર્કેટ (F&O) ને જવાબદાર ગણાવ્યું છે.

IT સેક્ટરમાં કડાકો: ત્રણ દિવસની તેજી બાદ કેમ જોવા મળી મોટી વેચવાલી?

ડિફેન્સ સેક્ટરમાં તેજી: Paras Defence પાસે 928 કરોડના ઓર્ડર, રોકાણકારો માટે શું છે તક?

• શોર્ટ સેલિંગ: ડેરિવેટિવ માર્કેટમાં સ્ટોક પર સતત દબાણ બનાવવામાં આવ્યું હતું. શોર્ટ સેલર્સે રિલાયન્સના શેર પર મોટો દાવ લગાવ્યો હતો.

• રૂપિયામાં ઘટાડો: શોર્ટ સેલર્સનો એવો વ્યૂ હતો કે રૂપિયો નબળો પડશે અને સ્ટોકની કિંમતમાં ઘટાડો થશે. આ ગણતરી સાચી પડતા તેમણે મોટો નફો કર્યો, પરંતુ તેનાથી શેરના ભાવને નુકસાન થયું છે.

• હેમરિંગ: માર્કેટ ડેટા દર્શાવે છે કે સ્ટોકને સતત ‘હેમર’ (નીચે લાવવાનો પ્રયાસ) કરવામાં આવ્યો છે, જેના કારણે કિંમતોમાં ડેમેજ જોવા મળ્યું છે.

રોકાણકારોએ શું કરવું?

દેવેન ચોક્સીના વિશ્લેષણ મુજબ, રિલાયન્સના શેરમાં આ ઘટાડો કામચલાઉ છે અને તે ડેરિવેટિવ માર્કેટની વોલેટિલિટીને કારણે છે. લાંબા ગાળાના રોકાણકારો માટે કંપનીના ફંડામેન્ટલ્સ હજુ પણ પોઝિટિવ છે. જ્યારે એફપીઆઈ (FPI) વેચાણ કરે છે ત્યારે સ્થાનિક સંસ્થાઓ (DII) ખરીદી કરીને બજારને ટેકો આપી રહી છે.

શેરબજારમાં રોકાણ જોખમોને આધીન છે. કોઈ પણ મોટો નિર્ણય લેતા પહેલા તમારા નાણાકીય સલાહકારની મદદ અવશ્ય લો.