US-ઈરાન વાટાઘાટો પહેલા ઈસ્લામાબાદ છાવણીમાં ફેરવાયું: આકાશમાં ફાઈટર જેટ્સનું સુરક્ષા કવચ, બે દિવસ રજા જાહેર
અમેરિકા અને ઈરાન વચ્ચે આવતીકાલે એટલે કે 11 એપ્રિલના રોજ ઈસ્લામાબાદમાં એક અત્યંત મહત્વની બેઠક યોજાવા જઈ રહી છે. મધ્ય પૂર્વમાં ચાલી રહેલા તણાવ અને નાજુક યુદ્ધવિરામ વચ્ચે આ ઐતિહાસિક વાટાઘાટો પર આખી દુનિયાની નજર છે. આ હાઈ-પ્રોફાઈલ બેઠક માટે પાકિસ્તાનની રાજધાની ઈસ્લામાબાદને અભેદ્ય કિલ્લામાં ફેરવી દેવામાં આવી છે.
રેડ ઝોન સીલ, રસ્તાઓ બ્લોક
ઈસ્લામાબાદની સુરક્ષા વ્યવસ્થા હાલમાં ટોચના સ્તરે છે. શહેરના અત્યંત સંવેદનશીલ એવા ‘રેડ ઝોન’ને સંપૂર્ણપણે સુરક્ષિત કરી દેવામાં આવ્યો છે. આ વિસ્તારમાં જ સંસદ, સરકારી ઈમારતો, દૂતાવાસો અને મોટી હોટલો આવેલી છે. સામાન્ય નાગરિકો અને વાહનો માટે આ રસ્તાઓ બંધ કરી દેવાયા છે. શહેરભરમાં ઠેર-ઠેર ચેકપોસ્ટ બનાવવામાં આવી છે અને હથિયારધારી પોલીસ જવાનોનો કડક પહેરો ગોઠવી દેવામાં આવ્યો છે. વિદેશી મહેમાનોની અવરજવરમાં કોઈ અડચણ ન આવે તે માટે ટ્રાફિકના રૂટ પણ ડાયવર્ટ કરવામાં આવ્યા છે.
રાજધાનીમાં બે દિવસની જાહેર રજા
સુરક્ષાના કારણોસર અને શહેરમાં ભીડ ઓછી કરવા માટે પાકિસ્તાન સરકાર દ્વારા ગુરુવાર અને શુક્રવારે ઈસ્લામાબાદમાં જાહેર રજા જાહેર કરવામાં આવી છે. મોટાભાગની શાળાઓ, કોલેજો અને બજારો બંધ છે, જેના કારણે રસ્તાઓ પર અત્યારે સોપો પડી ગયો છે.
અમેરિકી પ્રતિનિધિમંડળ માટે ‘ફુલપ્રૂફ’ સુરક્ષા
અહેવાલ મુજબ, પાકિસ્તાનના ગૃહમંત્રી મોહસિન નકવીએ અમેરિકી રાજદૂતને ખાતરી આપી છે કે તેમના પ્રતિનિધિમંડળને સંપૂર્ણ સુરક્ષા પુરી પાડવામાં આવશે. સુરક્ષાની આગોતરી સમીક્ષા કરવા માટે 30 સભ્યોની અમેરિકી ટીમ પહેલેથી જ ઈસ્લામાબાદ પહોંચી ગઈ છે. જોકે, વ્હાઇટ હાઉસના પૂર્વ પ્રેસ સેક્રેટરી એરી ફ્લીશરે પાકિસ્તાનની સુરક્ષા વ્યવસ્થા પર સવાલો પણ ઉઠાવ્યા છે અને પ્રતિનિધિઓની સુરક્ષા બાબતે ચિંતા વ્યક્ત કરી છે.
આકાશમાં પણ કડક જાપતો: C-130 અને ફાઈટર જેટ્સ તૈનાત
સુરક્ષા માત્ર જમીન પર જ નહીં પરંતુ આકાશમાં પણ સજ્જડ કરવામાં આવી છે. ડેટા અનુસાર, પાકિસ્તાન વાયુસેનાએ સલામત હવાઈ પ્રોટોકોલ માટે IL-78 રિફ્યુલિંગ ટેન્કર્સ અને C-130 વિમાન તૈનાત કર્યા છે. સૌથી મહત્વની વાત એ છે કે, ઈરાની પ્રતિનિધિમંડળના વિમાનને સુરક્ષા આપવા માટે પાકિસ્તાની ફાઈટર જેટ્સ ઈરાનના બંદર અબ્બાસ ઉપર ઉડતા જોવા મળ્યા છે. સંરક્ષણ નિષ્ણાતોના મતે, ઈરાની નેતાઓ પર ઈઝરાયેલના સંભવિત હુમલાને રોકવા માટે આકાશમાં એક ખાસ સુરક્ષા કવચ (AWACS પ્લેટફોર્મ) તૈયાર કરવામાં આવ્યું છે.
પ્રતિનિધિઓ માટે ‘વીઝા-ઓન-અરાઈવલ’
આ બેઠકમાં ભાગ લેનારા તમામ વિદેશી પ્રતિનિધિઓ અને પત્રકારો માટે પાકિસ્તાને ‘વીઝા-ઓન-અરાઈવલ’ની સુવિધા જાહેર કરી છે. એરપોર્ટ પર વિશેષ ડેસ્ક સ્થાપિત કરવામાં આવ્યા છે જેથી પ્રવેશ પ્રક્રિયા સરળ રહે. પાકિસ્તાનના વિદેશ મંત્રી ઈશાક ડારે કહ્યું કે આ વાટાઘાટોને સફળ બનાવવા માટે તમામ તૈયારીઓ કરી લેવામાં આવી છે.
હવે જોવાનું એ રહેશે કે પાકિસ્તાન બે કટ્ટર હરીફ દેશો વચ્ચેની આ મધ્યસ્થી કેટલી કુશળતાથી નિભાવી શકે છે.
