શુભમન ગિલની કેપ્ટનશીપ પર સેહવાગના આકરા પ્રહાર: ‘મોહમ્મદ સિરાજનો ઉપયોગ કેમ ન કર્યો? શું તમે હાર માની લીધી હતી?’
રોયલ ચેલેન્જર્સ બેંગલુરુ (RCB) સામેની હાર બાદ ગુજરાત ટાઇટન્સના કેપ્ટન શુભમન ગિલ અત્યારે ટીકાકારોના નિશાના પર છે. એમ. ચિન્નાસ્વામી સ્ટેડિયમમાં રમાયેલી આ મેચમાં ગુજરાત 205 રનનો બચાવ કરવામાં નિષ્ફળ રહ્યું એટલું જ નહીં, પણ મેચના નિર્ણાયક તબક્કે ગિલે લીધેલા ફિલ્ડિંગ અને બોલિંગના નિર્ણયોએ નવી ચર્ચા છેડી દીધી છે. અનુભવી ક્રિકેટર વીરેન્દ્ર સેહવાગે તો ત્યાં સુધી કહી દીધું કે ગિલની ગણતરીમાં મોટી ભૂલ હતી અને તેણે મેચ પૂરી થાય તે પહેલા જ હિંમત હારી દીધી હતી.
મેચનો એ વળાંક જ્યાં ગુજરાત વાપસી કરી શક્યું હોત
મેચ દરમિયાન એક સમયે વિરાટ કોહલી (81 રન) અને દેવદત્ત પડિક્કલ (55 રન) ની તોફાની બેટિંગને કારણે RCB સંપૂર્ણ રીતે હાવી હતું. જોકે, મધ્યક્રમમાં ઝડપથી વિકેટો પડતા ગુજરાત પાસે વાપસીની એક નાની તક ઊભી થઈ હતી. 16મી ઓવરના અંતે RCB નો સ્કોર 173/5 હતો અને તેમને જીતવા માટે 27 બોલમાં 33 રનની જરૂર હતી. ક્રિઝ પર નવા બેટ્સમેનો હતા અને જો અહીં એકાદ વિકેટ મળી હોત, તો મેચ છેલ્લા ઓવર સુધી ખેંચાઈ શકી હોત.
આ જ સમયે કેપ્ટન શુભમન ગિલે એક એવો નિર્ણય લીધો જેણે બધાને ચોંકાવી દીધા. ટીમના સૌથી સફળ અને અનુભવી બોલર મોહમ્મદ સિરાજની એક ઓવર બાકી હતી. સિરાજે 3 ઓવરમાં માત્ર 25 રન આપીને 1 વિકેટ લીધી હતી. તેમ છતાં, ગિલે તેને બોલિંગમાં લાવવાને બદલે 18મી ઓવરમાં યુવા સ્પિનર માનવ સુથારને બોલિંગ સોંપી.
માનવ સુથારની ઓવર અને સેહવાગનો રોષ
માનવ સુથારની એ ઓવરમાં અનુભવી ક્રુણાલ પંડ્યાએ આક્રમક વલણ અપનાવ્યું અને 15 રન ઝૂડી કાઢ્યા. આ એક જ ઓવરે મેચનું સમીકરણ બદલી નાખ્યું. હવે RCB ને 12 બોલમાં માત્ર 7 રન જ જોઈતા હતા. આ નિર્ણય પર નારાજગી વ્યક્ત કરતા વીરેન્દ્ર સેહવાગે ‘ક્રિકબઝ’ પર કહ્યું, “જ્યારે છેલ્લી ત્રણ ઓવરમાં 22-25 રન જોઈતા હોય અને તમારી પાસે મોહમ્મદ સિરાજ જેવો બોલર હોય, તો તેને જ એટેક પર લાવવો જોઈએ. જો સિરાજ તે સમયે એક વિકેટ લઈ લેત, તો કદાચ છેલ્લી બે ઓવરમાં 20 રન જોઈતા હોત. ત્યાંથી દબાણ વધ્યું હોત, પણ ગિલે મેચને છેલ્લા ઓવર સુધી પહોંચવા જ ન દીધી.”
‘શું તમે હિંમત હારી ગયા હતા?’ ગિલને આકરો સવાલ
સેહવાગે આગળ ઉમેર્યું કે, જ્યારે તમારા મુખ્ય બોલરો (પ્રસિદ્ધ કૃષ્ણા, રાશિદ ખાન અને રબાડા) રન આપી રહ્યા હોય, ત્યારે કેપ્ટનનું કામ છે કે તેમને ફરીથી વિશ્વાસમાં લેવા. સેહવાગે કડક શબ્દોમાં કહ્યું, “જો તમને લાગે છે કે કોઈ બોલરે 2 ઓવરમાં 31 રન આપ્યા છે એટલે તમે તેનો ફરીથી ઉપયોગ નહીં કરો, તો તેનો સીધો અર્થ એ છે કે તમે હાર સ્વીકારી લીધી છે. તમે મેદાન પર જ હિંમત હારી બેઠા હતા. કેપ્ટન તરીકે તમારી ગણતરી ત્યાં જ ખોટી પડી ગઈ.”
ગુજરાત માટે લેફ્ટ આર્મ સ્પિનર સામે લેફ્ટ હેન્ડર ક્રુણાલ પંડ્યાનો મુકાબલો ભારે પડ્યો. ગિલે પાછળથી બચાવમાં કહ્યું હતું કે પિચ પર બોલ ગ્રીપ થઈ રહ્યો હતો અને તેમને લાગ્યું કે સ્પિનર વિકેટ અપાવી શકશે, પરંતુ ચિન્નાસ્વામીના નાના મેદાન પર આ જોખમ ઉઠાવવું મોંઘું સાબિત થયું.
કેપ્ટન તરીકે ગિલ માટે મોટો પાઠ
શુભમન ગિલ હજુ એક કેપ્ટન તરીકે શીખી રહ્યો છે, પરંતુ IPL જેવી હાઈ-પ્રોફાઈલ ટૂર્નામેન્ટમાં એક નાની ભૂલ પણ આખી મેચ છીનવી શકે છે. ગુજરાત ટાઇટન્સ માટે આ સીઝનમાં ડેથ ઓવર્સની બોલિંગ પહેલેથી જ ચિંતાનો વિષય રહી છે. સિરાજ જેવા ‘વિકેટ ટેકર’ ને અંતિમ ક્ષણો માટે બચાવી રાખવો અને પછી તેનો ઉપયોગ જ ન કરવો, તે વ્યૂહાત્મક રીતે મોટી ખામી ગણી શકાય.
