હવે અલગ-અલગ એપ્સ રાખવાની ઝંઝટ ખતમ! કોડિંગ, ડિઝાઇનિંગ અને હોટેલ બુકિંગ બધું જ થશે એક જ ChatGPT પર
આર્ટિફિશિયલ ઇન્ટેલિજન્સ (AI) ની દુનિયા દરરોજ નવા આશ્ચર્યોથી ભરેલી હોય છે, પરંતુ આ વખતે ટેક જગતમાં જે હલચલ જોવા મળી રહી છે તે માનવ જીવનની દિનચર્યા અને એપ્લિકેશન્સના વપરાશને સંપૂર્ણપણે બદલી નાખશે. અત્યાર સુધી આપણે સેમ ઓલ્ટમેનની કંપની OpenAI ના સાધન ‘ChatGPT’ નો ઉપયોગ માત્ર પ્રશ્નોના જવાબો મેળવવા, ઈમેલ લખવા કે નિબંધ તૈયાર કરવા માટે કરતા હતા. પરંતુ બજારના ગણગણાટ મુજબ, હવે ચેટજીપીટી એક સાધારણ ચેટબોટ મટીને એક શક્તિશાળી ‘સુપર એપ’ બનવા તરફ ડગ માંડી રહ્યું છે. આ એક એવું પ્લેટફોર્મ હશે જ્યાં તમારી સવારના ઈમેલ શિડ્યુલિંગથી લઈને રાત્રિના હોટેલ બુકિંગ સુધીના તમામ કામ એક જ જગ્યાએ થઈ જશે.
આર્ટિફિશિયલ ઇન્ટેલિજન્સના ક્ષેત્રમાં ક્રાંતિ લાવનાર કંપની OpenAI હવે ગ્રાહકોના સ્માર્ટફોન અને લેપટોપનો ચહેરો બદલવાની તૈયારી કરી રહી છે. ફાઇનાન્શિયલ ટાઇમ્સના એક તાજેતરના અહેવાલ મુજબ, સેમ ઓલ્ટમેનની આગેવાની હેઠળ OpenAI તેના લોકપ્રિય પ્લેટફોર્મ ChatGPT ને એક ઓલ-ઇન-વન ‘સુપર એપ’ માં રૂપાંતરિત કરવા માટે મોટા પાયે આયોજન કરી રહ્યું છે. આનો અર્થ એ થયો કે ભવિષ્યમાં વપરાશકર્તાઓએ અલગ-અલગ કાર્યો માટે ઘણી બધી એપ્લિકેશનો વચ્ચે સ્વિચ કરવું નહીં પડે. કોડિંગ ટૂલ્સ, એઆઈ એજન્ટ્સ અને થર્ડ-પાર્ટી ડિજિટલ સેવાઓ બધું જ એક જ યુઝર ઇન્ટરફેસ પર ઉપલબ્ધ કરાવી દેવામાં આવશે. જોકે આ અંગે કંપની તરફથી હજુ કોઈ સત્તાવાર મહોર મારવામાં આવી નથી, પરંતુ આગામી અઠવાડિયામાં તેની વેબસાઇટ અને મોબાઇલ એપ્લિકેશન પર મોટા ફેરફારો દેખાવા લાગે તેવી પૂરેપૂરી સંભાવના છે.
ઓલ-ઇન-વન એઆઈ પ્લેટફોર્મની નવી કલ્પના
અત્યાર સુધી બજારમાં માઈક્રોસોફ્ટ, ગૂગલ અને એન્થ્રોપિક જેવી કંપનીઓ વચ્ચે સર્વશ્રેષ્ઠ ચેટબોટ બનાવવાની રેસ ચાલી રહી હતી. પરંતુ ઓપનએઆઈ હવે આ રમતનો નિયમ જ બદલવા માંગે છે. કંપનીનું નવું ધ્યાન ગ્રાહકોને એક એવો ડિજિટલ સહાયક આપવાનું છે જે માત્ર ઓર્ડર સાંભળે જ નહીં પરંતુ તેને વાસ્તવિક દુનિયામાં પૂરો પણ કરે. આ નવી વ્યૂહરચના ખાસ કરીને મોટા કોર્પોરેટ અને એન્ટરપ્રાઇઝ ગ્રાહકોને આકર્ષવા માટે ઘડવામાં આવી રહી છે, જેથી કરીને તેઓ એક જ પ્લેટફોર્મ પર પોતાની આખી ઓફિસનું કામકાજ હેન્ડલ કરી શકે.
કોડિંગ અને હોટેલ બુકિંગ થશે ચપટી વગાડતા
આ અપગ્રેડમાં સૌથી મહત્વપૂર્ણ બાબત ઓપનએઆઈના એઆઈ-આધારિત કોડિંગ ટૂલ ‘કોડેક્સ પ્લેટફોર્મ’ પર કેન્દ્રિત હોઈ શકે છે. આ નવી ડિઝાઇનના આગમનથી ડેવલપર્સ સીધા ચેટજીપીટીમાં જ એડવાન્સ કોડ લખી શકશે. આ ઉપરાંત સામાન્ય યુઝર્સ માટે રસપ્રદ વાત એ છે કે, બજારમાં ચર્ચા છે કે ટેક જાયન્ટ્સ બુકિંગ ડોટ કોમ (Booking.com) અને કેનવા (Canva) જેવી અગ્રણી વૈશ્વિક સેવાઓ સાથે કરાર કરી રહ્યા છે.
આનાથી મોટો ફાયદો એ થશે કે જો તમારે કોઈ પ્રવાસ પર જવું હોય, તો તમે ચેટજીપીટીને કહી શકો છો કે તે તમારા માટે આખો પ્લાન તૈયાર કરે અને પ્લેટફોર્મની અંદરથી જ હોટેલ કે ફ્લાઇટ પણ બુક કરી આપે. તેમજ કોઈ ઓફિસ પ્રેઝન્ટેશન કે સોશિયલ મીડિયા પોસ્ટ ડિઝાઇન કરવી હોય, તો અન્ય એપ ખોલ્યા વગર ચેટબોક્સમાં જ આખું સર્જન થઈ જશે.
ચીનની સુપર એપ્સ સામે વૈશ્વિક સ્પર્ધા
જ્યારે પશ્ચિમી દેશો માટે આ કન્સેપ્ટ નવો હોઈ શકે, પરંતુ એશિયન માર્કેટમાં, ખાસ કરીને ચીનમાં સુપર એપ મોડેલ પહેલેથી જ ધૂમ મચાવી રહ્યું છે. ‘ધ ઇકોનોમિસ્ટ’ ના અહેવાલ મુજબ બાઇટડાન્સ, ટેન્સેન્ટ અને અલીબાબા જેવી ચીની દિગ્ગજ કંપનીઓએ પોતાના ઇકોસિસ્ટમમાં એઆઈ એજન્ટોને બહુ પહેલાથી જોડી દીધા છે. ચીનમાં લોકો વીચેટ (WeChat), ડાઉયિન (Douyin) અને તાઓબાઓ (Taobao) જેવી એપ્સની અંદર હાજર એઆઈ આસિસ્ટન્ટ્સ દ્વારા જ સવારનો નાસ્તો ઓર્ડર કરવાથી માંડીને ટ્રેનની ટિકિટ અને કપડાંની ખરીદી સુધીનું બધું કામ પતાવી લે છે.
હવે ઓપનએઆઈ પણ ચેટજીપીટીને એ જ સ્તર પર લઈ જવા માંગે છે. નિષ્ણાતો સ્પષ્ટ માને છે કે એઆઈ ઉદ્યોગનું આગામી યુદ્ધ એ વાત પર નથી કે કોણ સચોટ માહિતી આપે છે, પરંતુ એ વાત પર છે કે કોની એપ્લિકેશન માનવીની રોજિંદી જિંદગીનો સૌથી ઉપયોગી ડિજિટલ સાથી બને છે. આ રેસમાં જો ChatGPT સુપર એપ બનવામાં સફળ રહેશે, તો તે ટેકનોલોજીના ઇતિહાસનો સૌથી મોટો ગેમ ચેન્જર સાબિત થશે.
