કચ્છ સહિત રાજ્યભરમાં લોકો આકરી ગરમીનો સામનો કરી રહ્યા છે તેની વચ્ચે આજે કચ્છના ભચાઉના કેટલાક વિસ્તારમાં ગાજવીજ સાથે કમોસમી વરસાદ વરસતા મહામારી વચ્ચે લોકોની મુસીબત વધી છે.ભચાઊમાં આજે દિવસભરના ઉકળાટભર્યા વાતાવરણ બાદ સાંજના સમયે ગાજવીજ સાથે વરસાદ શરૂ થયો હતો. પ્રથમ સામાન્ય ઝાપટું પડ્યું હતું. પરંતુ, બાદમાં એક કલાકના વિરામ બાદ ગાજવીજ સાથે વરસાદ વરસતા શેરીઓમાં પાણી વહેતા થયા હતા. ભારે પવન સાથે વરસેલા વરસાદના કારણે વિસ્તારમાં વીજળી પણ ગૂલ થઈ હતી.તો બીજી તરફ ભચાઉ તાલુકાના કાંઠા વિસ્તારમાં કમોસમી વરસાદ સાથે કરા પડયાના અહેવાલ સાંપડ્યા છે. જેમાં જંગી ગામે ભારે પવન અને ગાજવીજ સાથે સાંજે સાડા પાંચના અરસામાં કરાં સાથેનો વરસાદ વરસ્યો હતો.જંગી ગામના સરપંચ રણછોડ કાના અને ભાજપ અગ્રણી શેરમામદ રાઉમાએ જણાવ્યું હતું કે, આજે ગામમાં કરા સાથે વરસાદ વરસ્યો છે. કોરોના મહામારી વચ્ચે કમોસમી વરસાદ થતા ગામલોકોએ બીમારી વધવાની ભીતિ વ્યકત કરી હતી.ભચાઉની ઉતર દિશાએ આવેલા ખારોઈ અને ચોબારીમાં કમોસમી વરસાદ વરસ્યો હતો તો આજ વિસ્તારના લીલીયાના, વવાઢીયા, અને રાષ્ટ્રીય ધોરીમાર્ગના રામદેવપીર સામાખીયાળી વચ્ચેના માર્ગે પણ જોરદાર વરસાદથી સિક્સ લેન પર પાણી ફરી વળ્યાં હતા. આકરી ગરમી વચ્ચે ભચાઉ તાલુકામાં બપોર બાદ વાતાવરણમાં અચાનક પલટાએ લોકોને પણ વિચારતા કરી મૂક્યા હતા.કમોસમી વરસાદના કારણે વાડી વિસ્તારમાં બાગાયતી પાકને નુકશાનની ભીતિ ખેડૂતોએ સેવી છે. આજે બપોર બાદ ભચાઉમાં વરસેલા કમોસમી વરસાદના કારણે ભચાઉ માર્કેટીંગ યાર્ડના વેપારીઓએ નુકસાન સહન કરવાનો વારો આવ્યો છે. ભચાઉ માર્કેટીંગ યાર્ડમાં કેટલાક વેપારીઓના ખુલ્લા મેદાનમાં એરંડા પડ્યા હોય કમોસમી વરસાદના કારણે પલળતા લાખો રૂપિયાનું નુકસાન થયાનો અંદાજ છે.
