E0 કે E10 પર પાછા ફરવાનો કોઈ ઈરાદો નથી: જાણો સંસદમાં પેટ્રોલિયમ મંત્રાલયે શું કરી સ્પષ્ટતા
દેશમાં છેલ્લા કેટલાક સમયથી E20 પેટ્રોલ (૨૦% ઇથેનોલ મિશ્રિત ઇંધણ) ને લઈને સોશિયલ મીડિયા અને વાહનચાલકો વચ્ચે ભારે ચર્ચા અને આશંકાઓ જોવા મળી રહી હતી. ઘણા લોકોનો દાવો હતો કે ઇથેનોલ મિશ્રિત પેટ્રોલ વાહનોના એન્જિનને નુકસાન પહોંચાડી રહ્યું છે, જેથી સરકાર આ નીતિ પાછી ખેંચી લેશે. પરંતુ સંસદના ચોમાસું સત્ર દરમિયાન કેન્દ્ર સરકારે આ તમામ અટકળો પર વિરામ મૂકતા સ્થિતિ સ્પષ્ટ કરી દીધી છે.
દેશભરમાં પેટ્રોલના ભાવ અને ઇંધણમાં ઇથેનોલના મિશ્રણને લઈને વાહનચાલકોમાં મોટો વિવાદ અને ચિંતાનો માહોલ સર્જાયો હતો. દાવો કરવામાં આવી રહ્યો હતો કે ૨૦ ટકા ઇથેનોલ ધરાવતું E20 પેટ્રોલ જૂના અને નવા વાહનોના એન્જિન, રબર અને પ્લાસ્ટિકના ભાગોને નુકસાન પહોંચાડી રહ્યું છે, જેના કારણે ગાડીઓ વારંવાર બંધ પડી જાય છે. આ વિરોધ વચ્ચે એવી અફવાઓ વહેતી થઈ હતી કે સરકાર E20 નીતિ પાછી ખેંચીને જૂનું E0 કે E10 પેટ્રોલ ફરી શરૂ કરશે.
હાલમાં ચાલી રહેલા સંસદના ચોમાસું સત્ર દરમિયાન સરકારે આ તમામ આશંકાઓ અને પ્રશ્નોના લેખિત અને સ્પષ્ટ જવાબો આપીને નીતિ પાછી ખેંચવાની વાતને સ્પષ્ટપણે ફગાવી દીધી છે.
શું સરકાર E20 નીતિ પર પાછીપાની કરશે?
સંસદમાં પૂછવામાં આવેલા પ્રશ્નનો જવાબ આપતાં સરકારે સ્પષ્ટ કર્યું છે કે E20 પેટ્રોલ પરથી પાછા હટવાનો કે જૂનું E0 અથવા E10 પેટ્રોલ પુનઃ રજૂ કરવાનો સરકારનો કોઈ જ ઈરાદો નથી.
સરકારે જણાવ્યું હતું કે E20 ઇંધણ સંપૂર્ણપણે સુરક્ષિત, વૈજ્ઞાનિક રીતે સાબિત થયેલું અને કઠિન પરીક્ષણોમાંથી પસાર થયેલું છે. ઓટોમોબાઇલ મેન્યુફેક્ચરિંગ કંપનીઓ આ રાષ્ટ્રીય પહેલમાં સરકારને પૂરો સહયોગ આપી રહી છે અને E20 પર ચાલતા વાહનો પર નિયમિત વોરંટી પણ આપી રહી છે.
વાહનો બગડવાની એક પણ સત્તાવાર ફરિયાદ મળેલ નથી
સરકારે સંસદમાં આંકડાકીય માહિતી આપતાં જણાવ્યું હતું કે દેશમાં E20 કે ઇથેનોલ મિશ્રિત પેટ્રોલના ઉપયોગથી વાહનનું એન્જિન બગડ્યું હોય કે ભંગાણ સર્જાયું હોય તેવી એક પણ સત્તાવાર ફરિયાદ મળી નથી.
મંત્રાલયના જણાવ્યા મુજબ, ભારતમાં છેલ્લા સાડા ત્રણ વર્ષથી E15+ પેટ્રોલ અને છેલ્લા અઢી વર્ષથી E19 તથા E20 પેટ્રોલનો વ્યાપકપણે ઉપયોગ થઈ રહ્યો છે. હાલમાં દેશભરમાં આશરે ૨૦ કરોડ ટુ-વ્હીલર્સ અને ૩ કરોડથી વધુ ફોર-વ્હીલર (પેટ્રોલ કાર) કોઈ પણ એન્જિન ફેલ્યોર કે મોટી ખામી વગર સફળતાપૂર્વક આ ઇંધણ પર દોડી રહ્યા છે.
નીતિ આયોગ અને BIS ધોરણો મુજબ સફળ પરીક્ષણ
સરકારે સ્પષ્ટતા કરી હતી કે આ ઇંધણને બજારમાં મુકતા પહેલા નીતિ આયોગ (NITI Aayog) ની વિશેષ સમિતિ અને રિસર્ચ ઇન્સ્ટિટ્યૂટ્સ દ્વારા તેનું ઊંડું પરીક્ષણ કરવામાં આવ્યું હતું. ઓઇલ માર્કેટિંગ કંપનીઓ (OMCs) ને ભારતીય માનક બ્યુરો (BIS) ના ચોક્કસ ધોરણો અનુસાર જ ૨૦% સુધી ઇથેનોલ મિશ્રિત પેટ્રોલ સપ્લાય કરવાનો આદેશ આપવામાં આવ્યો છે.
આ સંશોધનોમાં સાબિત થયું છે કે જૂના વાહનોમાં પણ કાર કે બાઇક સ્ટાર્ટ કરવામાં, ડ્રાઇવિંગ પરફોર્મન્સમાં કે એન્જિનના મેટલ, રબર અને પ્લાસ્ટિક પાર્ટ્સ પર E20 ઇંધણની કોઈ વિપરીત કે હાનિકારક અસર પડતી નથી. આથી દેશની ઊર્જા સુરક્ષા, ક્રૂડ ઓઇલની આયાત ઘટાડવા અને પર્યાવરણ રક્ષણ માટે E20 નીતિ દેશભરમાં યથાવત રીતે ચાલુ રહેશે.
