ખુશીનો માહોલ પળભરમાં માતમમાં ફેરવાયો: જેલના સળિયા પાછળ પહોંચી લગ્ન ઉજ્જડ કરનારી આ સાયલન્ટ કિલર
કેટલીક ઘટનાઓ એટલી આઘાતજનક હોય છે કે તે માનવતા પરથી વિશ્વાસ ઉઠાવી દે છે. આવી જ એક અત્યંત દુઃખદ અને હૃદયદ્રાવક ઘટના અમેરિકાના સાઉથ કેરોલિનામાં વર્ષ 2023 માં બની હતી, જ્યાં લગ્નના થોડા જ કલાકોમાં એક નવવધૂનું કાર અકસ્માતમાં મોત થયું હતું. તાજેતરમાં આ કેસ સાથે જોડાયેલો એક નવો પોલીસ સ્ટેશનનો વીડિયો ફૂટેજ સોશિયલ મીડિયા પર બહાર આવ્યો છે, જેમાં અકસ્માત સર્જનારી નશામાં ધૂત ૨૭ વર્ષની યુવતી જેમી લી કોમોરોસ્કી (Jamie Lee Komoroski) ની અમાનવીય અને ચોંકાવનારી વર્તણૂક જોવા મળી રહી છે.
પોલીસ કસ્ટડી દરમિયાનનો આ વીડિયો વાયરલ થતાં જ લોકોમાં ભારે રોષ જોવા મળી રહ્યો છે. વીડિયોમાં તે પોતાના હાથે નિર્દોષ દુલ્હનનો સંસાર ઉજ્જડ કર્યાના પસ્તાવાને બદલે પોલીસ સામે રડતા-રડતા બહાના બનાવતી અને ‘મારે બસ ઘરે જવું છે’ તેવી જીદ કરતી જોવા મળે છે.
ખુશીનો માહોલ પળભરમાં માતમમાં ફેરવાયો
આ કરુણ ઘટના 28 એપ્રિલ 2023 ની રાત્રે બની હતી. 34 વર્ષની સામન્થા (Samantha) અને 36 વર્ષના એરિક હચિસન (Aric Hutchinson) ના લગ્ન ખૂબ જ ધૂમધામથી થયા હતા. ફોલી બીચ (Folly Beach) ના કિનારે લગ્નનું ભવ્ય રિસેપ્શન રાખવામાં આવ્યું હતું. પરિવાર અને મિત્રોની હાજરીમાં બંનેએ સાથે જીવવા-મરવાના સોગંદ લીધા હતા. રિસેપ્શન પૂરું થયા બાદ, નવપરિણીત યુગલ અને અન્ય બે મહેમાનો એક નાની ગોલ્ફ કાર્ટ (Golf Cart) માં બેસીને હોટેલ તરફ જઈ રહ્યા હતા. આખો પરિવાર ખુશ હતો, પરંતુ તેમને ખબર નહોતી કે થોડી જ મિનિટોમાં તેમની ખુશીઓ કાયમ માટે છીનવાઈ જવાની છે.
Now: Bodycam shows drunk driver Jamie Lee Komoroski, 27, whining “Can I just go home?” after killing bride Samantha Hutchinson in 2023 Folly Beach crash. Speeding 65 in a 25 with 3x legal BAC. Serving 25 years. pic.twitter.com/VEsg4Mknt6
— Uncover Report (@UncoverReport) August 7, 2026
બીજી તરફ, જેમી લી કોમોરોસ્કી તે રાત્રે ફોલી બીચના કેટલાક બારમાં અતિશય દારૂ પીને નશામાં ચૂર થઈ ગઈ હતી. તે સંપૂર્ણપણે ભાન ગુમાવી ચૂકી હોવા છતાં તેણે એક રેન્ટેડ (ભાડાની) ટોયોટા કેમરી કાર ચલાવવાનું નક્કી કર્યું. રસ્તા પર કારની સ્પીડ લિમિટ માત્ર 25 માઈલ પ્રતિ કલાકની હતી, પરંતુ નશામાં ધૂત જેમી લગભગ 65 માઈલ પ્રતિ કલાકની તોફાની ઝડપે કાર દોડાવી રહી હતી. તેણે નિયંત્રણ ગુમાવ્યું અને તેની હાઈ-સ્પીડ કાર સીધી નવદંપતીની ગોલ્ફ કાર્ટ સાથે પાછળથી ધડાકાભેર અથડાઈ.
આ અકસ્માત એટલો ભયાનક હતો કે ગોલ્ફ કાર્ટ હવામાં ફંગોળાઈ ગઈ હતી. લગ્નના કપડાં પહેરેલી સામન્થાનું ઘટનાસ્થળે જ કમકમાટીભર્યું મોત નીપજ્યું હતું, જ્યારે તેનો પતિ એરિક અને અન્ય બે મહેમાનો ગંભીર રીતે ઘાયલ થયા હતા. તબીબી તપાસમાં બહાર આવ્યું કે જેમીના લોહીમાં આલ્કોહોલનું પ્રમાણ કાયદાકીય મર્યાદા કરતા ત્રણ ગણું વધારે હતું.
‘મેં શું ખોટું કર્યું છે? મારે ઘરે જવું છે’ – પોલીસ સ્ટેશનમાં બેશરમીની હદ
તાજેતરમાં જે વિડીયો બહાર આવ્યો છે તે ફોલી બીચ પોલીસ સ્ટેશનની અંદરનો છે, જ્યાં અકસ્માતની થોડી જ વાર બાદ જેમીને હથકડી લગાવીને ખુરશી પર બેસાડવામાં આવી હતી. સામાન્ય રીતે આવી ગંભીર ઘટના પછી કોઈ પણ વ્યક્તિ આઘાતમાં હોય કે પસ્તાવો અનુભવે, પરંતુ જેમીના વર્તનમાં સંવેદનશીલતાનો એક અંશ પણ નહોતો.
વીડિયોમાં જોઈ શકાય છે કે તે પોલીસ અધિકારીઓ સામે રડવાનું નાટક કરી રહી છે અને વારંવાર એક જ સવાલ પૂછે છે, “હું બસ આ બધું જલ્દી પતાવીને મારા ઘરે જવા માંગુ છું. શું હું ઘરે જઈ શકું?” જ્યારે એક મહિલા પોલીસ અધિકારીએ તેને સ્પષ્ટ શબ્દોમાં કહ્યું કે તું અત્યારે ઘરે જઈ શકે નહીં અને તને ફોન કરવાની પણ મંજૂરી નથી, ત્યારે જેમી બેશરમીથી દલીલ કરવા લાગી.
તેણે પોલીસને પૂછ્યું, “પણ મેં શું કર્યું છે? તમે લોકો મને અહીં કેમ રાખી રહ્યા છો?” તેણે અકસ્માતની જવાબદારી સ્વીકારવાનો સાવ ઇનકાર કરી દીધો અને એવો દાવો કર્યો કે પોલીસે હજી સુધી એ સાબિત નથી કર્યું કે તેણે કંઈ ખોટું કર્યું છે. એટલું જ નહીં, પોલીસ સ્ટેશનના સીસીટીવી કેમેરા સામે જોઈને તે નાટક કરવા લાગી અને પોતાના જ વર્તનની મજાક ઉડાવતા બોલી, “ઓહ, હું તો એક નાનકડા બાળકની જેમ વર્તી રહી છું.” અકસ્માત સ્થળે ધરપકડ વખતે પણ તેણે પોલીસને કહ્યું હતું કે, “મેં કંઈ જ ખોટું નથી કર્યું.”
કોર્ટે ફટકારી 25 વર્ષની કડક જેલની સજા
આ કેસ કોર્ટમાં ચાલ્યો ત્યારે જેમી લી કોમોરોસ્કીના વકીલોએ તેનો બચાવ કરવાનો ઘણો પ્રયાસ કર્યો, પરંતુ પુરાવા અને સાક્ષીઓ એટલા મજબૂત હતા કે તેનો બચાવ શક્ય નહોતો. આખરે ગુનાની ગંભીરતાને સમજીને જેમીએ કોર્ટ સામે પોતાનો ગુનો કબૂલી લીધો હતો.
તેના પર નશામાં ધૂત થઈને ડ્રાઇવિંગ કરવાનો ગંભીર ગુનો (Felony DUI), બે લોકો પર જીવલેણ હુમલો કે મૃત્યુનું કારણ બનવું અને બેદરકારીથી નરહત્યા (Reckless Homicide) કરવાના આરોપો સાબિત થયા હતા. આ તમામ ગુનાઓ હેઠળ કોર્ટે તેને 25 વર્ષની જેલની સજા ફટકારી છે.
જે વરરાજા એરિકે પોતાની લગ્નની રાત્રે જ પત્નીને ગુમાવી દીધી હતી, તે શારીરિક ઈજાઓમાંથી તો સાજો થઈ ગયો છે, પરંતુ માનસિક આઘાતમાંથી તે ક્યારેય બહાર આવી શકશે નહીં. આ ઘટનાએ અમેરિકામાં ડ્રંક એન્ડ ડ્રાઈવ (નશામાં વાહન ચલાવવું) ના કાયદાઓને વધુ કડક બનાવવાની ચર્ચા જગાવી છે. એક બેજવાબદાર વ્યક્તિના નશાના કારણે એક હસતો-ખેલો પરિવાર કાયમ માટે બરબાદ થઈ ગયો.
