લાઇનમાં ઊભા રહ્યા વિના ઘરે બેઠા કરો એલપીજી ઈ-કેવાયસી: જાણો સ્ટેપ-બાય-સ્ટેપ રીત<
કેન્દ્ર સરકાર અને ગેસ એજન્સીઓ દ્વારા એલપીજી (LPG) કનેક્શન ધરાવતા ગ્રાહકો માટે ઈ-કેવાયસી (e-KYC) ની પ્રક્રિયા પૂર્ણ કરવા અંગે વારંવાર સૂચનાઓ આપવામાં આવી રહી છે. જો તમે પણ ઇન્ડેન (Indane), ભારત ગેસ (Bharat Gas) કે એચપી ગેસ (HP Gas) નું કનેક્શન ધરાવો છો, તો આ સમાચાર તમારા માટે અત્યંત મહત્વના છે. ગેસ કનેક્શનની ઈ-કેવાયસી પ્રક્રિયા પૂર્ણ કરવાની અંતિમ તારીખ ૨૩ ઓગસ્ટ, ૨૦૨૬ છે. હવે સમય ખૂબ જ ઓછો બાકી રહ્યો હોવાથી જે ગ્રાહકોનું વેરિફિકેશન હજુ સુધી બાકી છે તેમણે તાત્કાલિક આ પ્રક્રિયા પૂર્ણ કરી લેવી જરૂરી છે.
સારી વાત એ છે કે આ પ્રક્રિયા માટે ગ્રાહકોએ ગેસ એજન્સીના ધક્કા ખાવાની કે લાંબી લાઈનોમાં ઊભા રહેવાની બિલકુલ જરૂર નથી. તમે તમારા સ્માર્ટફોન, આધારની વિગતો અને લિંક કરેલા રજિસ્ટર્ડ મોબાઈલ નંબરની મદદથી ઘરે બેઠા જ મિનિટોમાં ઈ-કેવાયસી પૂર્ણ કરી શકો છો.
ઈ-કેવાયસી માટે કઈ વસ્તુઓ જરૂરી છે?
ઘરે બેઠા ઓનલાઈન ચકાસણી કરવા માટે ગ્રાહક પાસે નીચે મુજબની વિગતો અને સુવિધાઓ હોવી આવશ્યક છે:
- ગ્રાહકનો ૧૨ આંકડાનો આધાર નંબર
- એલપીજી કનેક્શન સાથે લિંક થયેલો સક્રિય મોબાઈલ નંબર
- એલપીજી ગ્રાહક આઈડી (LPG Customer ID)
- ઈન્ટરનેટ કનેક્ટિવિટી ધરાવતો સ્માર્ટફોન
- જે-તે ગેસ કંપનીની ઓફિશિયલ મોબાઈલ એપ્લિકેશન
- ચહેરાના વેરિફિકેશન માટે ‘Aadhaar FaceRD’ એપ
વિવિધ ગેસ કંપનીઓના ગ્રાહકો કેવી રીતે કરશે ઈ-કેવાયસી?
૧. ઇન્ડેન ગેસ (Indane Gas):
ઇન્ડેન ગેસના ગ્રાહકોએ ગૂગલ પ્લે સ્ટોર પરથી ‘IndianOil One’ એપ ડાઉનલોડ કરવાની રહેશે. એપમાં પોતાના રજિસ્ટર્ડ મોબાઈલ નંબરથી લોગ-ઈન કર્યા બાદ મેનૂ બારમાંથી ‘My Profile’ વિકલ્પ પર જવું. ત્યાં ‘Re-KYC’ ના ઓપ્શન પર ક્લિક કરીને તમારો આધાર નંબર દાખલ કરો. ત્યારબાદ ‘Aadhaar FaceRD’ એપની મદદથી ચહેરાનું વેરિફિકેશન કરી સબમિટ પર ક્લિક કરવાથી પ્રક્રિયા પૂર્ણ થશે.
૨. ભારત ગેસ (Bharat Gas):
ભારત ગેસના ગ્રાહકો માટે ‘Hello BPCL’ એપનો ઉપયોગ કરવાનો રહેશે. એપ ડાઉનલોડ કરી રજિસ્ટર્ડ નંબરથી સાઈન-ઈન કર્યા પછી હોમપેજ પર આપેલા ‘LPG’ સેક્શનમાં જઈ પોતાના ‘LPG ID’ પર ક્લિક કરવું. ત્યાં ‘e-KYC’ અથવા આધાર પ્રમાણીકરણનો વિકલ્પ મળશે. મોબાઈલ પર આવેલો ઓટીપી (OTP) દાખલ કર્યા પછી આધાર ફેસઆરડી દ્વારા ફેસ સ્કેન કરીને વેરિફિકેશન સબમિટ કરી દેવું.
૩. એચપી ગેસ (HP Gas):
એચપી ગેસના ગ્રાહકો ‘HP Pay’ એપ દ્વારા આ ચકાસણી કરી શકે છે. એપમાં પોતાના રજિસ્ટર્ડ મોબાઈલ નંબરથી સાઈન-ઈન કરીને ડેશબોર્ડ પર આપેલા ‘LPG/Gas Connection’ વિકલ્પમાં જવું. ત્યાંથી ‘Aadhaar Authentication’ નો વિકલ્પ પસંદ કરી પોતાની સંમતિ આપવી અને ફેસ ઓથેન્ટિકેશન પ્રક્રિયા પૂરી કરવી. પ્રક્રિયા પૂરી થયા બાદ સ્ટેટસ અપડેટ થયું છે કે નહીં તે ચકાસી લેવું.
ઈ-કેવાયસી ન કરાવવાના પરિણામો
જો ગ્રાહકો ૨૩ ઓગસ્ટ સુધીમાં ઈ-કેવાયસીની પ્રક્રિયા પૂર્ણ કરવામાં નિષ્ફળ જશે તો તેમને આર્થિક નુકસાન વેઠવું પડી શકે છે. સૌથી મોટો ફટકો બેંક ખાતામાં જમા થતી સરકારી સબસિડી પર પડશે. સામાન્ય સબસિડી તેમજ પ્રધાનમંત્રી ઉજ્જવલા યોજના હેઠળ મળતી રૂ. ૩૦૦ ની સબસિડી તાત્કાલિક ધોરણે બંધ કરી દેવામાં આવશે. આ સિવાય, ગેસ કનેક્શનને ‘નિષ્ક્રિય’ (Deactivated) ગણવામાં આવશે, જેના કારણે મોબાઈલ એપ, IVR કે વોટ્સએપ દ્વારા કરાતું નવું સિલિન્ડર બુકિંગ પણ રિજેક્ટ થઈ જશે.
