ભારત પાણીને હથિયાર બનાવી શકે છે: સિંધુ નદી મુદ્દે પાકિસ્તાની મંત્રીએ વ્યક્ત કર્યો મોટો ડર

સિંધુ નદીના પાણીના વપરાશ અને સંચાલન અંગે ભારતના કડક અને મક્કમ નિર્ણયથી પાકિસ્તાનની મુશ્કેલીઓમાં ભારે વધારો થયો છે. એક તરફ પાકિસ્તાન સરકાર અને તેના મંત્રીઓ ભારત સામે ધમકીભર્યા નિવેદનો આપી રહ્યા છે, તો બીજી તરફ અંદરખાને ભારે ફફડાટ જોવા મળી રહ્યો છે. તાજેતરમાં પાકિસ્તાનના આયોજન મંત્રી અહેસાન ઈકબાલે ઈસ્લામાબાદને ભારતથી અત્યંત સાવધ રહેવાની ચેતવણી આપતા મોટો દાવો કર્યો છે કે, ભારત હવે પાણીનો ઉપયોગ એક શક્તિશાળી હથિયાર તરીકે કરી શકે છે.

એશિયા સોસાયટી દ્વારા આયોજિત એક વિશેષ કાર્યક્રમમાં બોલતા પાકિસ્તાનના આયોજન મંત્રી અહેસાન ઈકબાલે સિંધુ જળ સંધિ પર ભારત સરકારના એકપક્ષીય નિર્ણયને પડકાર્યો હતો. તેમણે જણાવ્યું હતું કે, આધુનિક ઇતિહાસમાં પ્રથમ વખત એવો ભય ઊભો થયો છે કે પાણીને એક યુદ્ધ હથિયાર તરીકે વાપરવામાં આવી રહ્યું છે. ભારતે સિંધુ જળ સંધિને અટકાવીને એક નવો જ આંતરરાષ્ટ્રીય પડકાર ઊભો કર્યો છે.

ઈકબાલે પોતાનો ડર વ્યક્ત કરતા ઉમેર્યું હતું કે, “હવે આપણને એ મોટો ખતરો છે કે જ્યારે પાકિસ્તાનને ખેતી કે પાક માટે પાણીની તાતી જરૂરિયાત હશે, ત્યારે ભારત પાણીનો પુરવઠો રોકી શકે છે. જ્યારે આપણને પાણીની બિલકુલ જરૂર નહીં હોય ત્યારે અચાનક વધુ પ્રમાણમાં પાણી છોડીને મુશ્કેલી ઊભી કરી શકે છે.” તેમણે વધુમાં માહિતી આપી હતી કે આ પરિસ્થિતિ સામે બફર સ્ટોરેજ તરીકે કામ કરવા માટે પાકિસ્તાન નવા ડેમ (બંધ) બનાવી રહ્યું છે અને આ મુદ્દા પર તમામ ઉપલબ્ધ રાજદ્વારી માર્ગોનો ઉપયોગ કરી રહ્યું છે.

આ અગાઉ પાકિસ્તાનના વડા પ્રધાન શાહબાઝ શરીફે પણ સિંધુ નદીના પાણી મુદ્દે ભારતને ચીમકી આપી હતી. એપી ન્યૂઝ સાથેની ખાસ વાતચીતમાં શાહબાઝ શરીફે કહ્યું હતું કે, “પાણીનું દરેક ટીપું પાકિસ્તાન માટે લાલ રેખા (Red Line) સમાન છે. જો ભારત પાણી રોકવાનો પ્રયાસ કરશે તો પાકિસ્તાન તેનો કડક જવાબ આપશે.” શાહબાઝે ઉમેર્યું હતું કે તેમનો દેશ યુદ્ધ નહીં પરંતુ શાંતિ ઈચ્છે છે, પરંતુ ભારત પાકિસ્તાનની શાંતિની ઈચ્છાને તેની નબળાઈ ન ગણે. પાકિસ્તાનની સાર્વભૌમત્વ સામેના કોઈપણ ખતરાનો સજ્જડ જવાબ આપવામાં આવશે.

ઉલ્લેખનીય છે કે, પહેલગામમાં થયેલા આતંકવાદી હુમલા બાદ ભારતે મે ૨૦૨૫માં પાકિસ્તાનમાં આવેલા આતંકવાદી ઠેકાણાઓ પર સફળ સૈન્ય કાર્યવાહી કરી હતી. તે લશ્કરી મુકાબલા બાદ ભારતે પાકિસ્તાન સાથેની સિંધુ જળ સંધિ સમીક્ષા હેઠળ મૂકીને કડક વલણ અપનાવ્યું છે, જેના કારણે હાલ પાકિસ્તાન આર્થિક અને કૃષિ ક્ષેત્રે મોટા સંકટની ભીતિ સેવી રહ્યું છે.