૮માં પગાર પંચમાં ફિટમેન્ટ ફેક્ટર વધારવાની માંગ: કેન્દ્રીય કર્મચારીઓ અને પેન્શનરો માટે મોટા સમાચાર
કેન્દ્ર સરકારના લાખો કર્મચારીઓ અને પેન્શનરો માટે આઠમા પગાર પંચ (8th Pay Commission) ને લઈને અત્યંત મહત્વપૂર્ણ સમાચાર સામે આવ્યા છે. રાષ્ટ્રવ્યાપી પરામર્શ પ્રક્રિયાના ભાગરૂપે કમિશન દ્વારા સપ્ટેમ્બર ૨૦૨૬ માં ભારતભરના મુખ્ય શહેરોમાં કર્મચારી સંગઠનો અને પેન્શનર એસોસિએશનો સાથે મહત્વપૂર્ણ બેઠકો યોજવા માટેનું સંપૂર્ણ સમયપત્રક જાહેર કરવામાં આવ્યું છે.
આ પરામર્શ પ્રક્રિયા કેન્દ્રીય કર્મચારીઓ માટે તેમની પડતર માંગણીઓ, પગાર સુધારણા અને સેવાની શરતો અંગેના સૂચનો સીધા કમિશન સમક્ષ રજૂ કરવાની સુવર્ણ તક પૂરી પાડશે.
ન્યાયાધીશ રંજના પ્રકાશ દેસાઈની અધ્યક્ષતામાં યોજાશે બેઠકો
સુપ્રીમ કોર્ટના ભૂતપૂર્વ ન્યાયાધીશ રંજના પ્રકાશ દેસાઈની અધ્યક્ષતામાં આઠમું પગાર પંચ રચવામાં આવ્યું છે. આ કમિશન દેશના વિવિધ ઝોન અને શહેરોની મુલાકાત લઈને કેન્દ્રીય સંસ્થાઓ, સંરક્ષણ દળો, રેલવે યુનિયનો અને અન્ય કર્મચારી સંગઠનોના પ્રતિનિધિઓને મળશે અને તેમના મંતવ્યો સાંભળશે.
જાહેર કરવામાં આવેલા સમયપત્રક મુજબ, ઓગસ્ટ અને સપ્ટેમ્બર ૨૦૨૬ દરમિયાન દેશના પાંચ મુખ્ય સ્થળોએ આ મેરેથોન બેઠકો યોજાશે:
૧. જયપુર (રાજસ્થાન): ૩૧ ઓગસ્ટ અને ૧ સપ્ટેમ્બર, ૨૦૨૬ (સોમવાર અને મંગળવાર)
૨. ચેન્નાઈ (તમિલનાડુ): ૭ અને ૮ સપ્ટેમ્બર, ૨૦૨૬ (સોમવાર અને મંગળવાર)
૩. પુડુચેરી: ૯ સપ્ટેમ્બર, ૨૦૨૬
૪. ચંદીગઢ: ૧૬ થી ૧૮ સપ્ટેમ્બર, ૨૦૨૬
૫. બેંગલુરુ: ૭ અને ૮ ઓક્ટોબર, ૨૦૨૬ (તાજેતરમાં જારી કરાયેલી નવી સૂચના મુજબ)
આ મુલાકાતો ઉપરાંત, કમિશન મુંબઈમાં સેન્ટ્રલ રેલવે ઝોન હેઠળના વિવિધ રેલવે વિભાગોની પ્રત્યક્ષ મુલાકાત લેવાનું પણ આયોજન કરી રહ્યું છે, જેથી રેલવે કર્મચારીઓની વાસ્તવિક કામગીરી અને સ્થિતિ વિશે સચોટ માહિતી મેળવી શકાય.
અરજી કરવાની પ્રક્રિયા અને મહત્વપૂર્ણ તારીખો
કમિશનની બેઠકોમાં ભાગ લેવા માટે અરજી કરવાની ચોક્કસ તારીખો નક્કી કરવામાં આવી હતી. જયપુર, ચેન્નાઈ અને પુડુચેરી ખાતે યોજાનારી બેઠકોમાં હાજરી આપવા માટે એપોઈન્ટમેન્ટ અને અરજી સબમિટ કરવાની અંતિમ તારીખ ૧૮ ઓગસ્ટ, ૨૦૨૬ હતી, જે હવે પૂર્ણ થઈ ચૂકી છે.
જ્યારે ચંદીગઢ ખાતે ૧૬ થી ૧૮ સપ્ટેમ્બર દરમિયાન યોજાનારી બેઠકો માટે કર્મચારી પ્રતિનિધિમંડળો માટે અરજી સબમિટ કરવાની અંતિમ તારીખ ૨૫ ઓગસ્ટ, ૨૦૨૬ (એટલે કે આજે) છે.
શું હશે આ મેરેથોન બેઠકોનો મુખ્ય એજન્ડા?
જોકે પંચ દ્વારા કોઈ સત્તાવાર લેખિત એજન્ડા જાહેર કરવામાં આવ્યો નથી, પરંતુ આ બેઠકોનો મુખ્ય હેતુ કર્મચારીઓની આર્થિક અને સેવાકીય બાબતોને આવરી લેવાનો છે. કમિશન મુખ્યત્વે કેન્દ્રીય કર્મચારીઓના નવા પગાર માળખા (Pay Matrix), વિવિધ ભથ્થાં, લઘુત્તમ વેતન, ફિટમેન્ટ ફેક્ટર અને પેન્શન સુધારણા જેવા મહત્વના મુદ્દાઓ પર વ્યાપક ચર્ચા કરશે.
હાલમાં કર્મચારી સંગઠનો અને પેન્શનર મંડળો આઠમા પગાર પંચ હેઠળ ફિટમેન્ટ ફેક્ટરને હાલના ૨.૫૭ થી વધારીને ૩.૮૩ થી ૪.૦ સુધી કરવાની આક્રમક માંગ કરી રહ્યા છે. જો ફિટમેન્ટ ફેક્ટરમાં આ મુજબનો સુધારો કરવામાં આવે, તો કેન્દ્રીય કર્મચારીઓના મૂળ પગાર અને પેન્શનમાં મોટો ઉછાળો આવી શકે છે.
