૨૦૨૯માં નરેન્દ્ર મોદી અને રાહુલ ગાંધીને ટક્કર આપશે આ સાઉથ સુપરસ્ટાર્સ? નવા સર્વેથી રાજકારણમાં મોટો ભડકો!
ભારતીય રાજકારણના મંચ પર એક દક્ષિણ ભારતીય નેતાનો અચાનક દબદબો જોવા મળી રહ્યો છે. વર્ષોથી દેશના રાજકારણમાં એવી ચર્ચા ચાલતી હતી કે દક્ષિણ ભારતમાંથી કોઈ નેતા રાષ્ટ્રીય સ્તરે વડાપ્રધાન પદના મુખ્ય દાવેદાર તરીકે ઉભરી શકશે કે નહીં? પરંતુ તમિલનાડુના મુખ્યમંત્રી સી. જોસેફ વિજયે આ માન્યતાઓને તોડી પાડી છે. ‘ઈન્ડિયા ટુડે-સીવોટર’ના તાજેતરના ‘મૂડ ઓફ ધ નેશન’ (MOTN) ઓપિનિયન પોલ અનુસાર, દેશના આગામી વડાપ્રધાન તરીકે પસંદગીની યાદીમાં વિજય ૯.૨ ટકા મત સાથે ત્રીજા સ્થાને આવી ગયા છે.
સૌથી રસપ્રદ વાત એ છે કે, સિનેમામાંથી રાજકારણમાં પ્રવેશ્યાને તેમને માત્ર બે જ વર્ષ થયા છે અને તેઓ તમિલનાડુના મુખ્યમંત્રી તરીકેની પ્રથમ ટર્મ જ સંભાળી રહ્યા છે. આટલા ટૂંકા ગાળામાં જ દેશના વર્ષો જૂના રાજકીય દિગ્ગજોને પાછળ છોડીને ટોપ-૩માં સ્થાન મેળવવું એ કોઈ સામાન્ય બાબત નથી.
વડાપ્રધાન પદની રેસમાં કોણ ક્યાં?
ઓપિનિયન પોલમાં જ્યારે લોકોને પૂછવામાં આવ્યું કે તેઓ આગામી વડાપ્રધાન તરીકે કોને જોવા માંગે છે, ત્યારે દેશના વર્તમાન વડાપ્રધાન નરેન્દ્ર મોદી ૪૮.૭ ટકા લોકોની પહેલી પસંદ સાથે ટોચ પર રહ્યા હતા. કોંગ્રેસના વરિષ્ઠ નેતા રાહુલ ગાંધી ૨૭.૧ ટકા મત સાથે બીજા સ્થાને રહ્યા છે.
પરંતુ ખરી નવાઈ ત્રીજા સ્થાન માટે થઈ હતી, જ્યાં તમિલનાડુના મુખ્યમંત્રી વિજયે ૯.૨ ટકા સમર્થન મેળવીને દેશના મોટા મોટા રાજકીય ચહેરાઓને ચોંકાવી દીધા છે.
વડાપ્રધાન પદ માટે લોકોની પસંદગી (સર્વે મુજબ):
નરેન્દ્ર મોદી: ૪૮.૭%
રાહુલ ગાંધી: ૨૭.૧%
સી. જોસેફ વિજય: ૯.૨%
મમતા બાનરજી: ૨.૦%
અખિલેશ યાદવ: ૧.૭%
અભિજીત દીપકે (કોકરોચ જનતા પાર્ટી): ૧.૩%
અરવિંદ કેજરીવાલ: ૧.૨%
આ સર્વે બતાવે છે કે વિજયે પશ્ચિમ બંગાળના મુખ્યમંત્રી મમતા બાનરજી, સપા પ્રમુખ અખિલેશ યાદવ અને આપના રાષ્ટ્રીય કન્વીનર અરવિંદ કેજરીવાલ જેવા અનુભવી નેતાઓને પણ લોકપ્રિયતામાં પાછળ રાખી દીધા છે. સર્વેના ઈતિહાસમાં આ પહેલીવાર બન્યું છે જ્યારે વિજયનું નામ દેશના ભાવિ વડાપ્રધાનના દાવેદારોમાં સામેલ થયું હોય.
વિપક્ષના ચહેરા તરીકે પણ બીજી મોટી પસંદ
સર્વેમાં માત્ર વડાપ્રધાન પદની જ વાત નહોતી કરવામાં આવી, પરંતુ વિપક્ષી ગઠબંધન ‘ઇન્ડિયા બ્લોક’ (INDIA Bloc)નું નેતૃત્વ કરવા માટે કયો નેતા સૌથી વધુ યોગ્ય છે, તે અંગે પણ સવાલો પૂછાયા હતા.
અહીં પણ વિજયે શાનદાર પ્રદર્શન કર્યું છે. વિપક્ષના ચહેરા તરીકે રાહુલ ગાંધી ૨૯ ટકા મત સાથે પ્રથમ સ્થાને રહ્યા, પરંતુ વિજય ૧૨.૨ ટકા વોટ મેળવીને સીધા બીજા સ્થાને આવી ગયા છે. તેમણે મમતા બાનરજી (૮.૫%), અરવિંદ કેજરીવાલ (૭.૫%) અને અખિલેશ યાદવ (૬.૯%) જેવા મોટા રાષ્ટ્રીય ચહેરાઓને પાછળ છોડી દીધા છે.
આ સર્વે કેવી રીતે અને ક્યારે કરવામાં આવ્યો?
આ આંકડા કોઈ અટકળો પર આધારિત નથી. ‘ઈન્ડિયા ટુડે અને સીવોટર’ દ્વારા આ ઓપિનિયન પોલ ૧ જુલાઈથી ૨૫ ઓગસ્ટ દરમિયાન હાથ ધરવામાં આવ્યો હતો, જેમાં દેશભરના ૨૫,૧૮૪ લોકોના સીધા ઈન્ટરવ્યુ લેવામાં આવ્યા હતા. આ ઉપરાંત, સીવોટરના નિયમિત ટ્રેકરના ભાગરૂપે છેલ્લા છ મહિનામાં લેવાયેલા ૯૧,૭૯૫ ઈન્ટરવ્યુના ડેટાનો પણ આ નિષ્કર્ષ તૈયાર કરવામાં ઉપયોગ કરવામાં આવ્યો હતો.
ટીવીકે (TVK)ની રાષ્ટ્રીય મહત્વાકાંક્ષા અને રાજકીય ગરમાવો
તમિલ તમિઝાગા વેટ્રી કઝગમ (TVK) નામના નવા પક્ષની સ્થાપના કરીને રાજકારણમાં ઉતરેલા વિજયના આ જંગી પોપ્યુલેરિટી ચાર્ટ બાદ તેમની પાર્ટીમાં ભારે ઉત્સાહ છે. હાલમાં જ પાર્ટીના નેતાઓએ વિજયને ૨૦૨૯ની લોકસભા ચૂંટણીમાં દેશના વડાપ્રધાન પદના ઉમેદવાર તરીકે પ્રોજેક્ટ કરવાની ખુલ્લેઆમ ચર્ચા શરૂ કરી છે.
તાજેતરમાં ૧૮ ઓગસ્ટે તમિલનાડુ વિધાનસભામાં માનવ સંસાધન વ્યવસ્થાપન મંત્રી સરથકુમારે સરેઆમ કહ્યું હતું કે, “અમારા નેતા વિજય જ દેશના આગામી વડાપ્રધાન બનશે”. તેના એક દિવસ પહેલા જ તમિલનાડુના જાહેર બાંધકામ મંત્રી આધવ અર્જુનાએ નિવેદન આપ્યું હતું કે, હવે સમય આવી ગયો છે કે ભારતને દક્ષિણમાંથી કોઈ વડાપ્રધાન મળે અને તે નેતા તમિલનાડુની ધરતી પરથી જ હોવો જોઈએ.
જોકે, આ નિવેદનો અને વિજયની વધતી રાષ્ટ્રીય લોકપ્રિયતાને કારણે કોંગ્રેસ છાવણીમાં થોડી અકળાટ અને તીખી પ્રતિક્રિયાઓ પણ જોવા મળી રહી છે.
ફિલ્મી પડદાથી રાજકારણના શિખર સુધીની ઝડપી સફર
વિજય તમિલ સિનેમાના સૌથી મોટા સુપરસ્ટાર્સમાંથી એક રહ્યા છે. વર્ષ ૨૦૨૪માં તેમણે પોતાની રાજકીય પાર્ટી ‘તમિઝાગા વેટ્રી કઝગમ’ (TVK) ની રચના કરીને સક્રિય રાજકારણમાં ઝંપલાવ્યું હતું. માત્ર બે જ વર્ષના ટૂંકા ગાળામાં તેમણે પોતાની લોકપ્રિયતાના જોરે તમિલનાડુમાં સત્તા સર કરી અને મુખ્યમંત્રીની ખુરશી સુધી પહોંચી ગયા.
હજુ તો તેમની સરકારને કેન્દ્રમાં આવ્યાને થોડા જ મહિના થયા છે, ત્યાં જ તેમનું નામ દેશના વડાપ્રધાન પદની દાવેદારીની રેસમાં ટોપ-૩માં આવી જવું એ ભારતીય રાજકારણની એક આશ્ચર્યજનક ઘટના માનવામાં આવી રહી છે.
શું ૨૦૨૯માં દક્ષિણમાંથી વડાપ્રધાન મળશે?
જોકે, ૨૦૨૯ની લોકસભા ચૂંટણીને હજુ ત્રણ વર્ષથી વધુનો સમય બાકી છે. રાજ્યના રાજકારણમાં જીત મેળવવી અને આખા દેશના વિવિધ રાજ્યોના સમીકરણો સાધીને રાષ્ટ્રીય સ્તરે ગઠબંધન બનાવવું એ બે તદ્દન અલગ બાબતો છે.
