શું 60 દિવસનો નિયમ પણ થશે રદ? અમેરિકામાં ભારતીય IT એન્જિનિયરો માટે સ્થિતિ બની ગંભીર.
અમેરિકામાં સ્થાયી થયેલા ભારતીય ટેકનોલોજી પ્રોફેશનલ્સ માટે વર્તમાન સમય અત્યંત પડકારજનક સાબિત થઈ રહ્યો છે. યુએસ પ્રશાસન દ્વારા ઈમિગ્રેશન નિયમોમાં કરવામાં આવી રહેલી કડકાઈ અને H-1B વીઝા અંગે વધતી અનિશ્ચિતતાને કારણે અનેક ભારતીય પરિવારો ભારે આર્થિક અને માનસિક દબાણ હેઠળ આવી ગયા છે. તાજેતરમાં સોશિયલ મીડિયા પર વાયરલ થયેલી એકપોસ્ટે આ કટોકટી તરફ સૌનું ધ્યાન દોર્યું છે, જેમાં દાવો કરવામાં આવ્યો છે કે નોકરીઓ ગુમાવ્યા બાદ ડઝનબંધ ભારતીય પરિવારો પોતાનું સર્વસ્વ અમેરિકામાં જ છોડીને ભારત પરત ફરી રહ્યા છે.
સોશિયલ મીડિયા પ્લેટફોર્મ પર ‘Anttsinc’ નામના યુઝર દ્વારા શેર કરવામાં આવેલી આ વાયરલ પોસ્ટ મુજબ, ટેક્સાસ રાજ્યના દલાસ (Dallas) શહેરના ઉપનગરો જેવા કે સેલિના (Celina) અને મેલિસા (Melissa)માં રહેતા ૧૦થી વધુ H-1B વીઝા ધારક પરિવારોએ પોતાની નોકરીઓ ગુમાવી દીધી છે. નોકરી જતી રહેતા તેમની આવકનો સ્ત્રોત બંધ થઈ ગયો છે, જેના કારણે તેઓ પોતાના મકાનના હપ્તા (Mortgage) અને સ્થાનિક પ્રોપર્ટી ટેક્સ ભરવામાં અસમર્થ બન્યા છે. પરિણામે, પરિસ્થિતિ એટલી હદે વણસી ગઈ છે કે આ પરિવારો પોતાના આલીશાન મકાનો, કિંમતી કાર અને અન્ય ઘરવખરી સામાન વેચ્યા વગર કે ત્યાં જ છોડીને ભારત પાછા ફરવા મજબૂર બન્યા છે.
The DFW housing market is hitting a silent tech sector breaking point, and Irving is ground zero. 📉💻
I spent the afternoon running foreclosure calls in Irving, and the shift on the ground is undeniable: the number of H-1B visa holder surnames on these default listings has… pic.twitter.com/TEioOXf7wJ
— Anttsinc (@anttsinc) September 5, 2026
રિયલ એસ્ટેટ માર્કેટનો મિશ્ર પ્રતિસાદ અને વધતું આર્થિક દબાણ
વાયરલ પોસ્ટમાં એવો પણ ઉલ્લેખ કરવામાં આવ્યો છે કે આમાંથી ઘણા પરિવારો છેલ્લા સાતથી દસ વર્ષથી વધુ સમયથી અમેરિકામાં વસવાટ કરી રહ્યા હતા. નોકરી ગુમાવ્યા બાદ તેમણે પોતાના મકાનો વેચવાનો પ્રયાસ કર્યો હતો, પરંતુ ઉત્તર ટેક્સાસના અમુક વિસ્તારોમાં પ્રોપર્ટીના ભાવમાં થયેલા ઘટાડાને કારણે ઘરની કિંમત તેના પર લેવાયેલી લોન કરતાં પણ ઓછી થઈ ગઈ હતી. આવી સ્થિતિમાં ઘર વેચવું આર્થિક રીતે ફાયદાકારક ન રહેતા, તેમણે નુકસાન સહન કરીને પણ દેશ છોડવાનો વારો આવ્યો છે.
જોકે, રિયલ એસ્ટેટ ક્ષેત્રના નિષ્ણાતોનું માનવું છે કે દલાસ અને તેના આસપાસના વિસ્તારોમાં મકાનોની કિંમતોમાં થયેલા ફેરફાર પાછળ માત્ર H-1B વીઝા ધારકોનું પરત ફરવું જવાબદાર નથી. હોમ લોનના ઊંચા વ્યાજદર, નવું બાંધકામ, મકાનોનો સપ્લાય અને સ્થાનિક આર્થિક સ્થિતિ જેવા અનેક પરિબળો પ્રોપર્ટી માર્કેટને અસર કરે છે. તેમ છતાં, આ ઘટાડાએ નોકરી ગુમાવનારા ભારતીય એન્જિનિયરો અને આઈટી વર્કર્સની મુશ્કેલીઓમાં બળતામાં ઘી હોમાવાનું કામ ચોક્કસ કર્યું છે. આ પરિસ્થિતિની સરખામણી ૨૦૦૦ના દાયકાના ‘Y2K’ સમયગાળા સાથે કરવામાં આવી રહી છે, જ્યારે આઈટી ક્ષેત્રમાં આવેલી મંદીને કારણે અનેક પ્રોફેશનલ્સ બેરોજગાર બન્યા હતા અને તેમણે દેવાના ડુંગર હેઠળ દબાવું પડ્યું હતું.
૬૦ દિવસનો ગ્રેસ પીરિયડ અને રદ થવાની અફવાઓ
અમેરિકાના વર્તમાન ઈમિગ્રેશન નિયમો અનુસાર, જો કોઈ H-1B વીઝા ધારકની નોકરી જતી રહે, તો તેને કાયદેસર રીતે અમેરિકામાં રહેવા માટે ૬૦ દિવસનો ‘ગ્રેસ પીરિયડ’ (Grace Period) આપવામાં આવે છે. આ બે મહિનાના સમયગાળા દરમિયાન તે કર્મચારી નવી નોકરી શોધી શકે છે, નવો સ્પોન્સર શોધી શકે છે અથવા પોતાના વીઝાનું સ્ટેટસ બદલી શકે છે. જો આ સમય દરમિયાન નવી નોકરી ન મળે, તો તેણે કાયદાકીય રીતે અમેરિકા છોડવું પડે છે.
છેલ્લા કેટલાક સમયથી ડિપાર્ટમેન્ટ ઓફ હોમલેન્ડ સિક્યુરિટી (DHS) દ્વારા આ ૬૦ દિવસનો ગ્રેસ પીરિયડ નાબૂદ કરવામાં આવશે તેવી ચર્ચાઓએ જોર પકડ્યું છે. જોકે, રાહતની વાત એ છે કે આ નિયમમાં હજુ સુધી કોઈ સત્તાવાર ફેરફાર કરવામાં આવ્યો નથી અને વર્તમાન નિયમો યથાવત છે. પરંતુ, બજારમાં ફેલાયેલી આ અનિશ્ચિતતા અને કડક નીતિઓના ડરથી ભારતીય આઈટી વ્યાવસાયિકોમાં ભારે ફાળ પડી છે, જેના કારણે ઘણા લોકો સમયમર્યાદા પૂરી થાય તે પહેલા જ ભારત પરત ફરવાનો નિર્ણય લઈ રહ્યા છે.
સંગઠનાત્મક પડકારો અને ભારતીય કમ્યુનિટી પર અસર
સોશિયલ મીડિયા પર વાયરલ થયેલી ઘટનાઓ કદાચ કેટલાક ચોક્કસ પરિવારોની વ્યક્તિગત આર્થિક તંગી દર્શાવતી હોઈ શકે છે અને તેને સમગ્ર અમેરિકામાં વસતા તમામ ભારતીયોનું સામાન્ય ચિત્ર ગણી શકાય નહીં. પરંતુ, એ વાત ચોક્કસ છે કે આ પ્રકારના કિસ્સાઓથી અમેરિકામાં વસતી ભારતીય કમ્યુનિટીમાં ભારે ચિંતાનો માહોલ સર્જાયો છે.
ગ્રીન કાર્ડ માટેનો દાયકાઓ લાંબો રાહ જોવાનો સમય અને તેની સાથે નોકરીની અસ્થિરતા વચ્ચે ઝોલા ખાતા ભારતીય પ્રોફેશનલ્સ માટે હવે અમેરિકન ડ્રીમ પૂરું કરવું મુશ્કેલ બની રહ્યું છે. બીજી તરફ, ભારતમાં આઈટી અને ટેકનોલોજી ક્ષેત્રે ઊભી થઈ રહેલી નવી તકોને કારણે ઘણા પ્રોફેશનલ્સ હવે સ્વદેશ પાછા ફરીને નવી શરૂઆત કરવા તરફ પણ વિચારતા થયા છે.
