દેશમાં ચોમાસાનું રૌદ્ર સ્વરૂપ: ૨૦ રાજ્યોમાં મુશળધાર વરસાદની ચેતવણી, ૭૫ કીમીની ઝડપે પવન ફૂંકાવાની શક્યતા
દેશના પૂર્વીય અને ઉત્તરીય રાજ્યોમાં ચોમાસાની સક્રિયતાને કારણે વાતાવરણમાં અચાનક મોટો પલટો આવ્યો છે. ભારતીય હવામાન વિભાગ (IMD) દ્વારા જારી કરવામાં આવેલા તાજેતરના બુલેટિન મુજબ, દેશના ૨૦ જેટલા રાજ્યોમાં આગામી કેટલાક કલાકો દરમિયાન ભારેથી અતિભારે વરસાદની શક્યતા વ્યક્ત કરવામાં આવી છે. આ સમયગાળા દરમિયાન કલાકના ૭૫ કિલોમીટરની ઝડપે તેજ પવન ફૂંકાઈ શકે છે. પહાડી રાજ્યોમાં ભૂસ્ખલન (લેન્ડસ્લાઈડ)ની ગંભીર ચેતવણીને પગલે પ્રવાસીઓ અને સ્થાનિક લોકોને અનાવશ્યક પ્રવાસ ટાળવા સલાહ આપવામાં આવી છે.
હવામાન નિષ્ણાતોના જણાવ્યા અનુસાર, બંગાળની ખાડીમાં એક ઊંડો ડિપ્રેશન (દબાણ) સર્જાયું છે, જે પશ્ચિમ-મધ્ય બંગાળની ખાડી સુધી વિસ્તરેલું છે. આ ઉપરાંત, ઉત્તર-પૂર્વ આસામ પર ઉપરી હવાનું ચક્રવાતી પરિભ્રમણ અને મધ્ય ઉત્તર પ્રદેશમાં સ્પષ્ટ નીચા દબાણનો વિસ્તાર સક્રિય હોવાથી દેશના મોટાભાગના વિસ્તારોમાં ચોમાસું ફરી એકવાર જોર પકડી રહ્યું છે.
દરિયાકાંઠાના વિસ્તારોમાં વાવાઝોડાનું જોખમ
દક્ષિણ છત્તીસગઢ, ઓડિશા, પશ્ચિમ બંગાળ અને આંધ્રપ્રદેશમાં વાવાઝોડા સાથે ભારે વરસાદ પડે તેવી સંભાવના છે. પશ્ચિમ-મધ્ય બંગાળની ખાડીમાં સર્જાયેલી સ્થિતિને કારણે માછીમારો અને ખેડૂતોને દરિયાકાંઠાના અને નીચાણવાળા વિસ્તારોથી દૂર રહીને સુરક્ષિત સ્થળોએ ખસી જવાની કડક સૂચના આપવામાં આવી છે.
ભારે વરસાદની ચેતવણી ધરાવતા ૨૦ રાજ્યોમાં ઉત્તર પ્રદેશ, બિહાર, દિલ્હી, હરિયાણા, રાજસ્થાન, ઉત્તરાખંડ, પંજાબ, હિમાચલ પ્રદેશ, જમ્મુ અને કાશ્મીર, છત્તીસગઢ, ઓડિશા, ઝારખંડ, પશ્ચિમ બંગાળ, મધ્ય પ્રદેશ, મહારાષ્ટ્ર, ગુજરાત, આંધ્ર પ્રદેશ, તેલંગાણા, કેરળ અને આંદામાન-નિકોબાર ટાપુઓનો સમાવેશ થાય છે.
ઉત્તર પ્રદેશ, બિહાર અને દિલ્હીમાં હવામાનની સ્થિતિ
દિલ્હી-એનસીઆરમાં આજે મધ્યમ વરસાદ અને ગાજવીજ સાથે પવન ફૂંકાવાની શક્યતા છે, જ્યાં મહત્તમ તાપમાન ૨૯ ડિગ્રી અને લઘુત્તમ ૨૩ ડિગ્રી સેલ્સિયસ રહેવાની ધારણા છે.
ઉત્તર પ્રદેશમાં બિજનોર, રામપુર, બરેલી, મુરાદાબાદ, સહારનપુર, ગોરખપુર, કાનપુર, પ્રયાગરાજ અને આગ્રા સહિત અનેક જિલ્લાઓમાં ૪૦ થી ૫૦ કિલોમીટરની ઝડપે ફૂંકાતા પવન સાથે મધ્યમથી ભારે વરસાદની ચેતવણી આપવામાં આવી છે.
બિહારના પટના, પશ્ચિમ ચંપારણ, સિવાન, દરભંગા, પૂર્ણિયા અને ભાગલપુર જેવા વિસ્તારોમાં ૬૦ થી ૬૫ કિલોમીટર પ્રતિ કલાકની ઝડપે વાવાઝોડું અને ભારે વરસાદ પડી શકે છે.
પહાડી રાજ્યો અને પૂર્વ ભારતના હાલ
ઉત્તરાખંડના હરિદ્વાર, રુદ્રપ્રયાગ, ચમોલી અને નૈનીતાલમાં તેમજ હિમાચલ પ્રદેશના કુલ્લુ, મનાલી, સોલન અને લાહૌલ-સ્પીતિમાં મુશળધાર વરસાદ અને પહાડો પરથી પથ્થરો ખસવાની ઘટનાઓ બની શકે છે. જમ્મુ અને કાશ્મીરના રાજૌરી, બારામુલ્લા અને ડોડામાં પણ ગાજવીજ સાથે વરસાદની સંભાવના છે.
ઝારખંડ, છત્તીસગઢ અને ઓડિશામાં ૭૦ થી ૭૫ કિલોમીટરની ઝડપે જોરદાર પવન ફૂંકાશે. રાંચી, રાયપુર અને ભુવનેશ્વર સહિતના વિસ્તારોમાં હવામાન વિભાગે સતર્ક રહેવા જણાવાયું છે. મધ્ય પ્રદેશના ભોપાલ, ઈન્દોર અને ઉજ્જૈન સહિતના જિલ્લાઓમાં પણ યલો એલર્ટ જારી કરવામાં આવ્યું છે.
