અમદાવાદ: થલતેજની એવલોન હોટલના રૂમમાં દારૂ પીધેલી હાલતમાં રૂપલલના અને 3 યુવકો વચ્ચે ઝગડો થયો હતો. યુવકોએ રૂપલલનાને અસહ્ય માર માર્યો હતો. બૂમાબૂમ થતા હોટલ સ્ટાફ દોડી આવ્યો હતો. પોલીસ પહોંચી ત્યારે યુવતી દારૂ પીધેલી હાલતમાં હોવાથી તેની ધરપકડ કરવામાં આવી હતી. જ્યારે સામે પક્ષે રૂપલલનાની ફરિયાદના આધારે 3 યુવકો સામે મારામારીનો ગુનો નોંધાયો હતો.
થલતેજની એવલોન હોટલના રૂમમાંથી એક યુવતીએ બુધવારે રાતે પોલીસ કંટ્રોલ રૂમમાં ફોન કરીને જણાવ્યું કે, 3 યુવકોએ તેને બહુ માર માર્યો છે. જ્યારે એવલોન હોટલના સ્ટાફે તે ત્રણેય યુવકોને ભગાડવામાં મદદ કરી છે. આ મેસેજના આધારે વસ્ત્રાપુર પોલીસ મહિલા કર્મીઓ સાથે હોટલે પહોંચી ત્યારે એક યુવતી હાજર હતી. તેને કપાળે લોહી નીકળતું હતું તેમજ શરીરના અન્ય ભાગે ઈજાના નિશાન હતા.
આ યુવતી દારૂ પીધેલી હાલતમાં હોવાથી તેને પોલીસ સ્ટેશન લઈ જઈ દારૂ પીધેલાનો કેસ કરી તેની ધરપકડ કરી હતી. જ્યારે સામે પક્ષે યુવતીએ તેની સાથે મારામારી કરીને ભાગી ગયેલા 3 યુવકો સામે ફરિયાદ નોંધાવી હતી. જે મુજબ ગત બુધવારે રાતે એક યુવકે તેને ફોન કરીને અખબારનગર પેટ્રોલ પંપ પાસે બોલાવી હતી.
ત્યાંથી તેને બાઈક પર થલતેજની એવલોન હોટલના રૂમમાં મૂકી ગયો હતો. હોટલના રૂમમાં 3 યુવકો હતા. ત્યાં યુવતી થોડીવાર રોકાયા બાદ તે ત્રણેયે દારૂ પીને યુવતી સાથે ઝઘડો કરી માર મારી ગાળો બોલવા લાગ્યા હતા. યુવતીએ પોલીસને ફોન કરતા ત્રણેય યુવકો ત્યાંથી ભાગી ગયા હતા. યુવતીની ફરિયાદના આધારે વસ્ત્રાપુર પોલીસે નાસી છૂટેલા ત્રણેય યુવકો સામે ગુનો નોંધી તેમની શોધખોળ આદરી છે.
રૂપલલના રાતે 10 વાગે હોટલના રૂમમાં ગઈ તેના બે કલાક બાદ મારા મારી થઇ હતી. જ્યાં તેમની વચ્ચે શરીરસુખ માણ્યા બાદ પૈસા બાબતે અથવા તો દારૂ પીને તેની સાથે જોર જબરજસ્તી કરવા બાબતે મારામારી થઇ હોવાની શંકા પોલીસ સેવી રહી છે. હોટલ એવલોનના રૂમ સુધી રૂપલલનાને ગ્રાહકો પાસે લઈ જનાર યુવકનું નામ-મોબાઈલ નંબર યુવતીએ પોલીસને આપ્યા હતા.
ત્રણેય ગ્રાહક હોટલના રૂમમાં આવ્યા હોવાથી હોટલના સીસીટીવી ફૂટેજમાં તેમની તસવીરો કેદ થઇ છે જોકે ત્રણે યુવકના આઈડી લીધા કે નહીં તે હજુ સુધી પોલીસ ફોડ પાડી શકી નથી. પોલોસ પણ બીજી તરફ એવલોન હોટલના સ્ટાફ અને સંચાલકોને બચાવવાના મૂડમાં હોવાનું સ્પષ્ટ લાગી રહ્યું છે ત્યારે હોટલમાં ચાલતા આવા ગોરખ ધંધા સામે પણ ઉચ્ચ અધિકારીઓ ભૈદી મૌન સેવી રહ્યા છે.
