નવરાત્રીમાં સુરક્ષાને લઈને ગુજરાત પોલીસની કડક ગાઈડલાઈન, જાણો આ નિયમો
ગુજરાતીઓની આસ્થા, ઉલ્લાસ અને પરંપરાના મહાપર્વ નવરાત્રીનો પ્રારંભ થઈ રહ્યો છે, ત્યારે સમગ્ર રાજ્યમાં શાંતિપૂર્ણ, સલામત અને આનંદદાયક વાતાવરણ જળવાઈ રહે તે માટે ગુજરાત પોલીસે વ્યાપક સુરક્ષા વ્યવસ્થા ગોઠવી છે. રાજ્યના નાગરિકો અને ખેલૈયાઓ કોઈપણ ભય વગર મોડી રાત સુધી ગરબે ઘૂમી શકે તે માટે ગૃહ રાજ્યમંત્રી હર્ષ સંઘવીના સીધા માર્ગદર્શન હેઠળ સમગ્ર રાજ્યમાં ‘થ્રી-લેયર’ સુરક્ષા કવચ તૈયાર કરવામાં આવ્યું છે.
રાજ્યના નાના ગામડાઓથી લઈને મોટા મહાનગરો સુધી નોંધાયેલા કુલ ૨૨,૦૦૦થી વધુ ગરબા મહોત્સવોમાં આ વર્ષે લાખો ખેલૈયાઓ ઉમટી પડશે. આ બાબતને ગંભીરતાથી લઈને રાજ્ય પોલીસ વડા જ્ઞાનેન્દ્રસિંહ મલિકે તમામ જિલ્લા પોલીસ વડાઓ તેમજ તમામ શહેરોના પોલીસ કમિશનરોને સતત એલર્ટ મોડ પર રહીને રાઉન્ડ ધ ક્લોક પેટ્રોલિંગ વધારવા કડક આદેશો આપ્યા છે.
શેરી ગરબાથી પાર્ટી પ્લોટ સુધી સઘન બંદોબસ્ત: પોલીસ, હોમગાર્ડ અને TRB જવાનો તૈનાત
ગુજરાતમાં યોજાતા ગરબા મહોત્સવોની ભવ્યતાને ધ્યાનમાં રાખીને સુરક્ષા બળનું મોટું વિતરણ કરવામાં આવ્યું છે. આ વર્ષે રાજ્યભરના ૩૬૪ મોટા પાર્ટી પ્લોટ, ૨,૭૨૭ જાહેર/કોમર્શિયલ ગરબા અને ૧૬,૫૨૭થી વધુ શેરી ગરબા સહિત તમામ નાના-મોટા સ્થળોએ પોલીસ અધિકારીઓ, મહિલા પોલીસ કર્મચારીઓ, હોમગાર્ડ્સ અને ટીઆરબી (TRB) જવાનોને તૈનાત કરી દેવામાં આવ્યા છે.
ભીડભાડ વાળા વિસ્તારો, ટ્રાફિક પોઈન્ટ્સ, શોપિંગ ઝોન અને મુખ્ય માર્ગો પર વાહન વ્યવહાર સુચારુ રહે તે માટે ટ્રાફિક પોલીસ દ્વારા વિશેષ આયોજન કરવામાં આવ્યું છે. સંવેદનશીલ વિસ્તારોમાં ક્વિક રિસ્પોન્સ ટીમ (QRT) અને સ્ક્વોડ સતત ગસ્ત લગાવશે.
મહિલા સુરક્ષા સર્વોચ્ચ પ્રાથમિકતા: ટ્રેડિશનલ ડ્રેસમાં ગરબા ગ્રાઉન્ડમાં સજ્જ રહેશે ‘શી-ટીમ’
નવરાત્રી દરમિયાન ગરબા પંડાલોમાં યુવતીઓ અને મહિલાઓની સુરક્ષા જાળવવી એ પોલીસ પ્રશાસન માટે સૌથી મોટી પ્રાથમિકતા છે. ગરબા ગ્રાઉન્ડ્સ તેમજ આસપાસના વિસ્તારોમાં મહિલાઓની સુરક્ષા માટે ‘શી-ટીમ’ (She-Team) સક્રિય ભૂમિકા ભજવશે.
યુનિફોર્મ તેમજ સાદા કપડાં ઉપરાંત, મહિલા પોલીસકર્મીઓ પોતે ટ્રેડિશનલ ડ્રેસ (ચણિયાચોળી) પહેરીને ગરબા ગ્રાઉન્ડ્સની અંદર ખેલૈયાઓની વચ્ચે હાજર રહેશે. ગરબા રમવાના બહાને કે ભીડનો લાભ લઈને છેડતી, અસભ્ય વર્તન, રોંગ ટચ કે વિડિયોગ્રાફી કરવાનો પ્રયાસ કરનારા અસામાજિક તત્વો સામે ‘શી-ટીમ’ દ્વારા સ્થળ પર જ કડક કાનૂની કાર્યવાહી કરવામાં આવશે.
સાયબર સેલની સતત નજર: સોશિયલ મીડિયા પર અફવા કે વૈમનસ્ય ફેલાવનારા સામે આઈ.ટી. એક્ટ હેઠળ પગલાં
તહેવારના દિવસોમાં સોશિયલ મીડિયા અને ડિજિટલ પ્લેટફોર્મ્સ દ્વારા સામાજિક સૌહાર્દ ડહોળવાનો કે કોમી તણાવ ઉભો કરવાનો પ્રયાસ કરનારા તત્વો સામે સાયબર ક્રાઈમ સેલ સંપૂર્ણપણે સજ્જ છે.
દેવી-દેવતાઓ કે ચોક્કસ સમુદાય વિરુદ્ધ વાંધાજનક ટિપ્પણીઓ, ભડકાઉ સામગ્રી કે ધાર્મિક લાગણી દુભાવતા વિડીયો-ઓડિયો વાયરલ કરનારાઓ પર આધુનિક સાયબર ટૂલ્સ અને આર્ટિફિશિયલ ઈન્ટેલિજન્સ દ્વારા ૨૪ કલાક મોનિટરિંગ રાખવામાં આવી રહ્યું છે. કોઈપણ પ્રકારની અફવા કે ખોટી માહિતી ફેલાવનાર સામે આઈ.ટી. એક્ટ (IT Act) ની કડક કલમો હેઠળ તાત્કાલિક એફઆઈઆર (FIR) નોંધી તેમની અટકાયત કરવામાં આવશે.
ગરબા આયોજકો માટે કડક ગાઈડલાઈન અને સુરક્ષા નિયમો
રાજ્ય પોલીસે તમામ જાહેર તથા કોમર્શિયલ ગરબા આયોજકો માટે સ્પષ્ટ ગાઈડલાઈન્સ જારી કરી છે. નિયમોનું પાલન ન કરનાર આયોજકો સામે પણ કાર્યવાહી થઈ શકે છે.
આયોજકો માટે ફરજિયાત નિયમો:
પ્રવેશ અને નિકાસ: ગરબા સ્થળ પર નાસભાગ ન થાય તે માટે મહિલાઓ અને પુરુષો માટે અલગ-અલગ એન્ટ્રી અને એક્ઝિટ ગેટ રાખવાના રહેશે.
CCTV સરવેલન્સ: સમગ્ર ગરબા પરિસર, પાર્કિંગ એરિયા અને એન્ટ્રી પોઈન્ટ્સને કવર કરતા હાઈ-ડેફિનેશન (HD) CCTV કેમેરા લગાવવાના રહેશે.
ચેકિંગ સાધનો: સુરક્ષા તપાસ માટે ડોરફ્રેમ મેટલ ડિટેક્ટર (DFMD) અને હેન્ડ હેલ્ડ મેટલ ડિટેક્ટર (HHMD) નો ઉપયોગ ફરજિયાત રહેશે.
દારૂબંધી અને બ્રેથ એનાલાઈઝર: નશાની હાલતમાં ગરબા ગ્રાઉન્ડમાં પ્રવેશતા તત્વોને રોકવા માટે બ્રેથ એનાલાઈઝરથી ચેકિંગ કરવાની વ્યવસ્થા આયોજકો અને પોલીસે કરવાની રહેશે.
ઇમરજન્સી હેલ્પલાઈન ‘૧૧૨’ પર સંપર્ક કરવા અપીલ
ગુજરાત પોલીસે તમામ નાગરિકો અને ખેલૈયાઓને અપીલ કરી છે કે તેઓ આસ્થા અને ભક્તિના આ પર્વની ઉજવણી ઉત્સાહભેર કરે અને સુરક્ષા જાળવવામાં પોલીસને સહકાર આપે. ગરબા સ્થળે કે આસપાસ કોઈ શંકાસ્પદ વ્યક્તિ, લાવારિસ વસ્તુ કે કટોકટીની સ્થિતિ જણાય તો તરત જ નજીકના પોલીસ કર્મચારીનો સંપર્ક કરવો અથવા ઈમરજન્સી હેલ્પલાઈન નંબર ૧૧૨ (112) કે સ્થાનિક પોલીસ કંટ્રોલ રૂમ પર તાત્કાલિક જાણ કરવી.
