જયપુરમાં સિરીયલ બૉમ્બ બ્લાસ્ટનું કાવતરું નિષ્ફળ: 12 કિલો RDX સાથે 3 આતંકવાદીઓ ઝડપાયા 

રાજસ્થાનના જયપુરમાં સિરિયલ બોમ્બ વિસ્ફોટ કરી મોટી જાનહાનિ કરવાના કાવતરાનો પર્દાફાશ થયો છે રાજસ્થાન પોલીસે ચિત્તોડગઢના નિમ્બાહેડા માંથી મધ્યપ્રદેશના સુફા સંગઠનના 3 આતંકવાદીઓને દબોચી લઇ તેઓની કારની લીધેલી તલાશી દરમિયાન બોમ્બ બનાવવાની સામગ્રી, ટાઈમર અને 12 કિલો RDX મળી આવતા પોલીસ ચોંકી ઉઠી હતી.
આરોપીઓ નિમ્બાહેડામાં બોમ્બ બનાવીને અન્ય ગેંગને આપવાના હોવાની વાતનો પર્દાફાશ થયો છે.
આતંકીઓ નો ઈરાદો જયપુરમાં 3 સ્થળોએ સિરિયલ બ્લાસ્ટ કરવાનો હતો.
આ ઘટનાને અંજામ આપે તે પહેલા જ પોલીસે આતંકીઓ ને દબોચી લીધા હતા.
અત્રે નોંધનીય છે કે રાજદ્રોહના કેસમાં કુખ્યાત સુફા સંગઠન 2012-13માં મધ્યપ્રદેશના રતલામમાં સક્રિય થયું હતું. ઘણા વર્ષો સુધી શાંત રહ્યા બાદ આ આતંકવાદી સંગઠન ફરી આતંકી ઘટનાને એંજામ આપવાની ફિરાકમાં છે.
આરોપીઓના નામ ઝુબેર, અલ્તમસ અને સરફુદ્દીન ઉર્ફે સૈફુલ્લાહ છે. તેઓ રતલામથી ભાગી ગયા હતા અને નિમ્બાહેડા નજીક રાણીખેડામાં રહેતા હતા. રાજસ્થાનમાં પકડાયેલા આરોપીઓની સૂચના પર રતલામમાંથી પણ બે લોકોને કસ્ટડીમાં લઇ વધુ તપાસ કરવામાં આવી રહી છે.