અફઘાનિસ્તાનની રાજધાની કાબુલમાં ગુરુદ્વારા પર સશસ્ત્ર બંદૂકધારીઓ દ્વારા હુમલો કરવાના અહેવાલો છે.
અફઘાનિસ્તાનની રાજધાની કાબુલમાં એક ગુરુદ્વારા પર સશસ્ત્ર બંદૂકધારીઓ દ્વારા ફાયરિંગ કરવાના સમાચાર સામે આવી રહ્યા છે. આ ઘટનામાં ઓછામાં ઓછા 25 લોકોના મોતની પણ આશંકા છે. અખબાર ઈન્ડિયન એક્સપ્રેસે ગુરુદ્વારા પ્રમુખ ગુરનામ સિંહને ટાંકીને આ માહિતી આપી છે. ગુરનામ સિંહે જણાવ્યું કે બંદૂકધારીઓએ અચાનક ગુરુદ્વારામાં ઘૂસીને અંધાધૂંધ ગોળીબાર શરૂ કરી દીધો. કેટલાક લોકો બિલ્ડિંગની બીજી બાજુ છુપાયેલા છે. તે જ સમયે, ઓછામાં ઓછા 25 લોકોને પોતાનો જીવ બચાવવાનો મોકો ન મળ્યો અને તેઓ આતંકવાદીઓની ગોળીઓનો ભોગ બન્યા. ગુરુદ્વારા કર્તા પરવાન એ કાબુલમાં શીખ સમુદાયનું કેન્દ્રિય ગુરુદ્વારા છે. ઓછામાં ઓછા 150 અફઘાન શીખો હજુ પણ તાલિબાન દ્વારા કબજે કર્યા બાદ દેશમાં ફસાયેલા છે. તેઓ છેલ્લા કેટલાક મહિનાઓથી ભારતમાંથી વિઝા માંગી રહ્યા હતા.
કાબુલ ગુરુદ્વારા પર હુમલો કરનાર બંદૂકધારીઓ સંભવતઃ તાલિબાનના પ્રતિસ્પર્ધી દાઈશ જૂથના હોવાનું કહેવાય છે, બીજી તરફ તાલિબાન લડવૈયાઓ સ્થળ પર પહોંચી ગયા છે અને તેમની વચ્ચે લડાઈ ચાલુ છે. ગુરુદ્વારાને નુકસાન થયું છે અને ચાર શીખો લાપત્તા છે. પંજાબના રાજ્યસભા સાંસદ વિક્રમ સાહનીએ આ માહિતી આપી હતી.
નોંધનીય છે કે ગત ઑક્ટોબરમાં તાલિબાન સત્તામાં આવ્યાના મહિનાઓ બાદ અજ્ઞાત બંદૂકધારીઓએ ગુરુદ્વારા કાર્તે પરવાન પર હુમલો કર્યો અને સંપત્તિની તોડફોડ કરી હતી ત્યારથી અફઘાન શીખો ભારતને બચાવવા માટે અપીલ કરી રહ્યુ છે.
