છેલ્લા દિવસોમાં પોલીસ ઉપર ટ્રક ચડાવી દેવાના વધેલા બનાવો વચ્ચે વડોદરા પોલીસની જીપને પણ ટ્રક ચાલકે કચડી નાખવાનો પ્રયાસ કરતા ભારે ચકચાર મચી જવા પામી છે.
વિગતો મુજબ નંદેસરી પોલીસ મથકની પીસીઆર વાન મોડી રાત્રે પેટ્રોલિંગમાં હોતી તે વખતે દશરથ ગામ ક્રોસ કરી ફાજલપુર બ્રિજ તરફ શંકાસ્પદ ટ્રક પસાર થઇ રહી હોવાનો કંટ્રોલમાંથી મેસેજ મળતા પીસીઆર વાન ઇન્ચાર્જ એ.એસ.આઇ ભિમસીંગ મનુભાઈ, પોલીસ કોન્સ્ટેબલ જયેશભાઈ ફતાભાઈ અને કોન્ટ્રાક્ટના ડ્રાઇવર તરીકે ફરજ બજાવતા રામદાસ મેડાએ વર્ણન મુજબની ટ્રકનો પીછો કરી તેને રોકવાનો પ્રયાસ કરતા ટ્રકના ક્લિનરે ડ્રાઇવરને વાન પર ટ્રક ચઢાવી દેવા ઇશારો કર્યો હતો.
જોકે, ટ્રક ડ્રાઇવરે પીસીઆર વાનને ઓવરટેક કરી ફુલ સ્પીડે હંકારી હતી અને પોલીસે ટ્રકનો પીછો કરતા ટ્રક ડ્રાઇવરે વાસદ ટોલનાકા પહેલા ડિવાઈડરના કટમાંથી યુ ટર્ન લઈ ટ્રકને વડોદરા તરફ દોડાવી હતી. ફાજલપુર પાસે પોલીસની પીસીઆર વાને ટ્રકને ઓવરટેક કરી ફરી એક વખત રોકવાનો પ્રયાસ કર્યો હતો. ટ્રકમાં સવાર એક શખ્સ ચાલકને પીસીઆર વાન ઉપર ટ્રક ચડાવી દેવા ઈશારો કરતો જોઈ લેતા ડ્રાઇવરે સાવચેતી વાપરી પોતાની પીસીઆર વાન હટાવી લેતા ટ્રક ફુલ સ્પીડે પસાર થઈ ગયો હતો પદમલા બ્રિજ નજીક ટ્રક ચાલકે પીસીઆર વાનને દબાવવાનો પ્રયાસ કરતા પોલીસ વાન ડિવાઇડર સાથે અથડાતા ડ્રાઇવરને ગંભીર ઇજાઓ પહોંચતા તેને સારવાર અર્થે નજીકની ખાનગી હોસ્પિટલ ખસેડાયો હતો. આ અકસ્માતમાં પીસીઆર વાનને પણ નુકસાન પહોંચ્યું હતું.
દરમિયાન કંટ્રોલમાં મેસેજ કરતા છાણી પોલીસે ટ્રકનો પીછો કરી ઝડપી પાડી ટ્રકમાં સવાર શખ્સોની સઘન પૂછપરછ હાથ ધરી હતી.
પોલીસની પ્રાથમિક પૂછપરછમાં આરોપી ટ્રક ચાલક યુનુસ રમજાની અને મોસીન હસનભાઈ મીઠા (બંને રહે. ગોધરા) હોવાનું બહાર આવ્યું હતું. જ્યારે ટ્રકમાં સવાર અન્ય સુફિયાન મોડાસાવાલા, સોયેબ શેખ તેમજ એક અજાણ્યો શખ્સ નાસી છૂટવામાં સફળ રહ્યો હતો. જ્યારે ટ્રકમાં ભરેલો સામાન ચોરીના ટાયરો હોવાની વિગતો સપાટી પર આવી છે. પીસીઆર વાન ડ્રાઇવરની ફરિયાદના આધારે નંદેસરી પોલીસે આરોપીઓ વિરુદ્ધ હત્યાનો પ્રયાસ, સરકારી કર્મચારી ઉપર હુમલો, સરકારી મિલકતને નુકસાન સહિતની કલમો હેઠળ ગુનો નોધી કાયદેસરની કાર્યવાહી હાથ ધરી છે.
આમ,પોલીસને કચડી નાખવાના આ હીંચકારા બનાવને લઈ ભારે ચકચાર મચી જવા પામી હતી.
