વલસાડ જિલ્લાના કપરાડામાં અસ્થિર મગજની યુવતી ઉપર બળાત્કાર કરવાની કોશિશ કરનાર હવસખોરને પડકારનાર વ્યક્તિની હત્યા થતા ભારે ચકચાર મચી ગઇ છે.યુવતી ઉપર બળાત્કાર કરવા આવેલા આરોપીએ યુવતીને બચાવવા આવેલા યુવકના ગુપ્તાંગના ભાગે ઉપરાછાપરી લાતો મારતા તેમનું મોત થયું હોવાનું સામે આવ્યું છે.
કપરાડાના ડુંગરી ફળિયામાં રહેતો 55 વર્ષીય નવસુ જમસુભાઇ વઢાળીની દાનત બગડતા અને હવસ સંતોષવા માટે બુધવારે મોડી રાત્રિએ એક નાનકડા કાચા ઘરમાં રહેતી માનસિક અસ્થિર નિરૂ નામક યુવતી ઉપર બળાત્કાર કરવા ઘરમાં ઘુસી ગયો હતો પણ યુવતીએ બૂમાબૂમ કરતા તેને બચાવવા દોડી આવેલા રામદાસના ગુપ્ત ભાગે લાતો મારી આરોપી નવસુ એ હત્યા કરી નાખી હતી.
વિગતો મુજબ ગવટખા ગામની હરખમાળ ફળિયાની યુવતી નિરૂબેન છેલ્લા એક માસથી 65 વર્ષીય સુંદરીબેન રામજીભાઈ વાજવડીયાએ આશરો આપતા તે તેમના ઘરમાં જ રહેતી હતી દરમિયાન બુધવારે રાત્રિએ નિરૂ અને સુંદરી ઘરમાં સુતા હતા ત્યારે રાત્રિના સમયે હવસખોર નવસુ વઢાળી ઘરમાં ઘુસી ગયો હતો અને નિરુને ઉંઘમાં જ પકડી લઇ લાજ લેવાનો પ્રયાસ કરતા ગભરાયેલી નિરૂએ સુંદરીબેનને બુમો પાડતા સુંદરી ઉંઘમાંથી જાગી ગઈ હતી તેણે નિરૂનું મોઢું દબાવીને બેસેલો નવસુને જોતા સુંદરીબેને પડોશમાં રહેતા તેમના પુત્ર રામદાસને બુમો પાડતા પોતાની માતાની બૂમો સાંભળીને રામદાસ દોડી આવ્યો હતો અને રામદાસ અને આરોપી નવસુ વચ્ચે ઝપાઝપી થઈ હતી.
જોકે, મારામારીમાં નવસુએ તક જોઈને 42 વર્ષીય રામદાસ રામજી વાજવડીયાને નીચે પાડી તેમના ગુપ્તાંગમાં જોરદાર લાત મારતા તેઓ ઢળી પડ્યા હતા.
ઝઘડો અને મારામારીથી આજુબાજુના લોકો દોડી આવીને ઇજાગ્રસ્ત રામદાસને સરકારી હોસ્પિટલમાં લઇ ગયા હતા જ્યા ફરજ ઉપરના તબીબે તેમને મૃત જાહેર કર્યો હતો. એક માનસિક યુવતીની લાજ બચાવવામાં મોતને ભેટેલો 45 વર્ષીય રામદાસ વાજવડિયા અગાઉ કપરાડા તાલુકા પંચાયતનો સભ્ય પણ ચૂંટાયો હતો.
મૃતક રામદાસની માતાએ માનવતાના ધોરણે માનસિક અસ્થિર યુવતી નીરૂને પોતાના ઘરમાં આશરો આપ્યો હતો. જોકે, જે યુવતીને આશરો આપ્યો હતો તેની લાજ બચાવવા જતા માતા સુંદરીબેને પોતાનો જુવાનજોધ પુત્ર ગુમાવવો પડ્યો હતો. રામદાસની થયેલી હત્યાના પગલે સ્થાનિક રહીશોમાં આક્રોશ જોવા મળ્યો હતો.ઘટનાની જાણ કપરાડા પોલીસ સ્ટેશનમાં કરાતા પીએસઆઈ જી.એસ.પટેલ ટીમ સાથે ઘટના સ્થળે પહોંચ્યા હતા.
આરોપી નાસી છૂટે તે પહેલાં જ દબોચી લઈ જેલના સળિયા પાછળ ધકેલી દીધો હતો આ ઘટનાને લઈ બજારો સ્વંયભુ બંધ રહયા હતા.
