વૈશ્વિક પડકારો અને હવામાન સંબંધિત અનિશ્ચિતતાઓને કારણે આર્થિક વૃદ્ધિમાં મંદી સાથે, ફુગાવાના જોખમો વધી શકે છે. એપ્રિલના માસિક આર્થિક સમીક્ષા અહેવાલમાં, નાણા મંત્રાલયે સોમવારે જણાવ્યું હતું કે, વપરાશમાં સર્વાંગી વધારો થયો છે. રિયલ એસ્ટેટમાં ક્ષમતા નિર્માણ અને રોકાણ માટે આકર્ષણ વધી રહ્યું છે. પરંતુ, એપ્રિલમાં આખા વર્ષના આર્થિક પરિણામો પર કંઈપણ કહેવું વહેલું ગણાશે. જો કે, તે એક સારી શરૂઆત સારી થઇ છે.
ખરીફ સિઝનમાં વાવણી સારી થઈ શકે છે
મંત્રાલયે કહ્યું કે, સામાન્ય ચોમાસું, જળાશયોમાં વધારે પાણી, બિયારણ અને ખાતરની સારી ઉપલબ્ધતા અને ટ્રેક્ટરનું સારું વેચાણ દર્શાવે છે કે ખરીફ સિઝનમાં વાવણી સારી થશે. કમોસમી વરસાદ છતાં ઘઉંની સરળ જાહેર ખરીદી ખાદ્ય સુરક્ષા માટે સારી વાત છે. રિપોર્ટ અનુસાર, ખરીફ સિઝનમાં સારી સંભાવનાઓ, પાક માટેના ઊંચા લઘુત્તમ ટેકાના ભાવ અને સરકારના બજેટ ખર્ચમાં વધારો આવનારા સમયમાં ખેડૂતોની આવકમાં વધારો કરશે. ગ્રામીણ અર્થતંત્ર મજબૂત થશે.
ટેક્સ બેઝ અને આર્થિક પ્રવૃત્તિમાં તેજી
સ્થાનિક અર્થતંત્ર માટે, 2023-24ની શરૂઆત પાછલા નાણાકીય વર્ષના છેલ્લા ક્વાર્ટરથી મજબૂત પ્રવૃત્તિઓ સાથે થઈ હતી. એપ્રિલનું GST કલેક્શન ટેક્સ બેઝ અને આર્થિક પ્રવૃત્તિઓમાં વૃદ્ધિ દર્શાવે છે. મેન્યુફેક્ચરિંગ અને સર્વિસ સેક્ટરની જેમ કૃષિ સેક્ટરમાં પણ સંભાવનાઓ સારી છે.
રેકોર્ડ આઉટપુટ શક્ય છે
2022-23માં વિક્રમી ખાદ્યાન્ન ઉત્પાદનની અપેક્ષા અને 2023-24માં સારી ખરીફ સિઝનના કારણે આગામી મહિનાઓમાં ખાદ્ય ફુગાવો સાધારણ થવાની ધારણા છે. ગામડાઓમાં પણ માંગ વધી રહી છે.
PLI તરફથી નિકાસ સપોર્ટ
અન્ય દેશોની સખત સ્પર્ધા હોવા છતાં, PLIના સમર્થનથી કાપડ અને તૈયાર વસ્ત્રોની વૈશ્વિક હાજરી વધી રહી છે, એમ મંત્રાલયે જણાવ્યું હતું.
