પતંગ પર્વ નિમિત્તે પાટીદાર સમાજના યુવા નેતા હાર્દિક પટેલે અપક્ષ ધારાસભ્ય જિજ્ઞેશ મેવાણીના ઘરે જઈને પતંગ ઉડાડવાની મજા માણી હતી. બન્ને જણાએ ગુજરાતના લોકોને મકરસંક્રાંતિની શૂભેચ્છા પાઠવી હતી. હાર્દિકે કહ્યું કે જિજ્ઞેશ મેવાણી સાથે પતંગ ઉડાડી. ભ્રષ્ટાચાર, મોંધવારી, બેરોજગારી અને ગુંડાગીરીની પતંગ કાપી છે. અમારી મિત્રતા ગુજરાતમાં સમરસતા અને ભાઈચારાની નિશાની છે. સામાજિક ન્યાયની લડત સાથે લડીએ છીએ તેમજ ગુજરાતની જનતા અને દેશહિતમાં અમે બન્ને સાથે છીએ.
ન્યૂઝ 18 ગુજરાતી ચેનલ સાથેની વાતચીતમાં હાર્દિક પટેલે સવર્ણ અનામતના અમલ અંગે ગુજરાત પ્રથમ રાજ્ય બનવા વિશે કહ્યું કે ગુજરાત ક્યા કામમા પાછળ છે. તમામ કામોમાં ગુજરાત પ્રથમ છે. ભ્રષ્ટાચારમાં પ્રથમ, એન્કાઉન્ટર કરવામાં પ્રથમ, રાજદ્રોહ લગાવવામાં પ્રથમ, ઈબીસી લગાવવામાં પણ પ્રથમ. હાલ આ મુદ્દો સુપ્રીમમાં પડતર હોવાથી સુપ્રીમનો ચુકાદો હકારાત્મક આવશે તો અમે સરકારના નિર્ણયનું સ્વાગત કરીશું.
ન્યૂઝ ચેનલને હાર્દિકે જણાવ્યુ કે, ‘અમે ખેડૂતોની વિરુદ્ધ હોય તેનો પતંગ કાપવા માટૈ તૈયાર છીએ. અમારો જે માંઝો છે એ બેરોજગારી, ભ્રષ્ટાચાર અને મોંઘવારીને કાપવા માટે છે. અમે કોઈના વિરુદ્ધમાં નથી પરંતુ સત્તાના વિરોધી એ માટે છીએ કારણ કે તેમણે લોકોને મૂર્ખ બનાવવાનું કામ કર્યું છે.’
સર્વણ અનામત પર હાર્દિકે શું કહ્યું : ‘આ પહેલા આનંદીબેન સરકારે પણ 10 ટકા ઈબીસીનો અમલ કર્યો હતો. હાલ આ મુદ્દો સુપ્રીમ કોર્ટનો પડતર છે, સુપ્રીમના આખરી નિર્ણય બાદ અમે સ્વાગત કે ઇન્કાર કરીશું તે જણાવીશું. સરકાર આ કામ ત્રણ વર્ષ પહેલા કરવું જોઈતું હતું. સરકારે પ્રમાણિકતા સાથે આ કામ કરવું હોય તો પહેલા બંધારણમાં સંશોધન કરવાની જરૂર હતી. સરકાર આવું કરીને સવર્ણોના મત લેવા માંગે છે. આ એક જૂમલો છે, કમળનું ફૂલ દર વખતે જૂમલો રજૂ કરે છે.’
આ પ્રસંગે વડગામથી અપક્ષ ધારાસભ્ય તેમજ દલિત નેતા જિજ્ઞેશ મેવાણીએ લોકોને ઉત્તરાયણની શુભેચ્છા પાઠવી હતી, તેમજ 2019ની લોકસભાની ચૂંટણીમાં ‘સાહેબ’નો પતંગ કપાશે તેમ જણાવ્યું હતું. સાથે જ મેવાણીએ એમ પણ કહ્યું હતું કે હાલ ગુજરાતમાં અમારો પતંગ સારો ચગી રહ્યો છે, દિલ્હીમાં પણ ચગશે કે નહીં એ સમય જ બતાવશે.