હૈદરાબાદના મકાનમાંથી 6 લીટર ઝેર મળ્યું, રાઈસિન હુમલાનો દેશવ્યાપી પ્લાન નિષ્ફળ
ગુજરાત એટીએસે એક એવા રાસાયણિક આતંકી કાવતરાનો ઉકેલ કર્યો છે, જેણે રાષ્ટ્રીય સુરક્ષા એજન્સીઓને સંપૂર્ણ સતર્ક બનાવી દીધી છે. ધરપકડ કરાયેલા મુખ્ય આરોપી ડો. અહમદ મોહિઉદ્દીન સૈયદે ચીનમાંથી એમબીબીએસ પૂર્ણ કર્યા બાદ હૈદરાબાદ સ્થિત પોતાના મકાનમાં એક મિની કેમિકલ લેબ બનાવેલી. આ લેબમાં તે રાઈસિન નામનું અત્યંત ઘાતક જૈવિક ઝેર તૈયાર કરી રહ્યો હતો, જેનો ઉપયોગ મોટા શહેરોમાં હુમલો કરવા માટે થવાનો હતો. તપાસ મુજબ આ લેબ માત્ર 1 લાખ રૂપિયામાં તૈયાર કરવામાં આવી હતી, અને આ રકમ ISKP (ISIS ખુરાસાન પ્રાંત)ના હેન્ડલર અબૂ ખબીજાએ મોકલેલી.
હૈદરાબાદના મકાન નંબર-9માંથી 6 લીટર રાઈસિન મળ્યું: સાયનાઈડ કરતા વધુ ખતરનાક ઝેર
ATSની ટીમ જ્યારે અસલમ મંજિલના મકાન નંબર-9 પર પહોંચી, ત્યારે ત્યાં સંપૂર્ણ રીતે સજ્જ રાસાયણિક લેબ જોવા મળી. અહીંથી કેમિકલ્સ, ગ્લાસ કંટેનર, મિક્સિંગ સાધનો અને જોખમી મિશ્રણો જપ્ત કરવામાં આવ્યા. એફએસએલ ટીમે લેબમાંથી 6 લીટર રાઈસિન ઝેર રિકવર કર્યું, જે હજારો લોકોના જીવન માટે પ્રાણઘાતક બની શકે એટલું શક્તિશાળી છે. નિષ્ણાતોના જણાવ્યા મુજબ રાઈસિનની ઝેરી અસર સાયનાઈડ કરતા અનેક ગણી વધારે હોય છે અને થોડા જ સમયમાં શરીરના અંગોને નિષ્ફળ બનાવી દે છે. આતંકી સૈયદ આ ઝેરને ખાદ્ય પદાર્થો અથવા પાણીમાં ફેલાવવા કાવતરું રચી રહ્યો હતો, જેથી કોઈ અવાજ વિના મોટા પાયે નુકસાન થઈ શકે.
ISKP નેટવર્કનો ખુલાસો: ચાર સ્તરીય યોજના અને ભારતમાં રાસાયણિક હુમલાની તૈયારી
તપાસમાં બહાર આવ્યું છે કે સૈયદ અને તેના સાથીઓ—મોહમ્મદ સુહેલ અને આઝાદ સૈફી—સંપૂર્ણપણે ISKPના પ્રભાવ હેઠળ હતા. સુહેલ મિશ્રણ તૈયાર કરવાની પ્રક્રિયામાં જોડાયેલો હતો, જ્યારે આઝાદ સૈફી દિલ્હી અને યુપીમાં લોજિસ્ટિક સપોર્ટ સંભાળી રહ્યો હતો. દુબઈથી ફંડિંગ કરનાર અબૂ ખબીજા આ સમગ્ર મોડ્યુલનો કી હેન્ડલર હતો. મૂળ યોજના અમદાવાદ, લખનઉ અને દિલ્હી જેવા શહેરોમાં રાઈસિનનો ઉપયોગ કરીને નિઃશબ્દ હુમલા કરવાનો હતો.
શું છે રાઈસિન અને કેમ છે અતિ જોખમી?
રાઈસિન એક બિનગંધ અને બિન સ્વાદવાળું અત્યંત ઝેરી જૈવિક પદાર્થ છે, જે એરંડાના બીજમાંથી બનાવવામાં આવે છે. માત્ર 1 મિલીગ્રામ માત્રા પણ માણસના જીવન માટે પૂરતી હોય છે. શરીરમાં પ્રવેશતા જ થોડા કલાકોમાં આંતરિક અંગોને નુકસાન પહોંચાડી શકે છે. આ કારણસર વિશ્વભરમાં તેને બાયો-ટેરરિઝમના ખતરા તરીકે નિયંત્રિત કરવામાં આવે છે. એટીએસનો મત છે કે દેશમાં હજુ અનેક સ્લીપર સેલ્સ સક્રિય છે અને વધુ તપાસ ચાલુ છે.
