IND vs SA: જે 15 વર્ષમાં ન થયું, તે ટેમ્બા બાવુમાએ કરી બતાવ્યું, ઈડન ગાર્ડન્સમાં થઈ ગયો ‘ચમત્કાર’!
ભારત અને દક્ષિણ આફ્રિકા વચ્ચે બે મેચોની ટેસ્ટ શ્રેણીની પ્રથમ મેચ ઈડન ગાર્ડન્સના મેદાન પર રમાઈ રહી છે. મહેમાન ટીમના કેપ્ટન ટેમ્બા બાવુમાએ તેવો કારનામો કરી બતાવ્યો છે, જે છેલ્લા 15 વર્ષમાં પ્રોટિયાઝ ટીમનો કોઈ પણ કેપ્ટન કરી શક્યો ન હતો.
ટેમ્બા બાવુમાએ ઈડન ગાર્ડન્સના મેદાન પર તે કરી બતાવ્યું જે 15 વર્ષમાં નહોતું થયું. બાવુમાએ દક્ષિણ આફ્રિકા માટે 2010 થી ચાલી રહેલા દુકાળનો કોલકાતાના મેદાન પર અંત આણ્યો છે. શ્રેણીની પ્રથમ ટેસ્ટ મેચમાં ટોસનો સિક્કો પ્રોટિયાઝ ટીમની તરફેણમાં ઉછળ્યો.
બાવુમાએ ટોસ જીતીને પહેલા બેટિંગ કરવાનો નિર્ણય લીધો છે. ભારતની ધરતી પર દક્ષિણ આફ્રિકાએ સાત ટેસ્ટ મેચો પછી ટોસ જીત્યો છે. જોકે, મહેમાન ટીમ તેમના મુખ્ય ઝડપી બોલર કગિસો રબાડા વિના મેદાનમાં ઉતરી છે, જે ઈજાને કારણે આ મેચમાં રમી રહ્યા નથી.
બાવુમાએ વર્ષોનો ઇન્તજાર સમાપ્ત કર્યો
હકીકતમાં, દક્ષિણ આફ્રિકાએ ભારતની ધરતી પર છેલ્લે 2010 માં ઈડન ગાર્ડન્સના મેદાન પર જ ટોસ જીત્યો હતો. તે મેચમાં ટીમની કમાન ગ્રીમ સ્મિથ સંભાળી રહ્યા હતા. પરંતુ ત્યાર પછીના 15 વર્ષોમાં પ્રોટિયાઝ ટીમ ભારત સામે તેમની જ ધરતી પર એક પણ વાર ટેસ્ટમાં ટોસ જીતી શકી નહોતી.
જોકે, હવે આ દુકાળનો અંત ટેમ્બા બાવુમાએ ઈડન ગાર્ડન્સના મેદાન પર લાવી દીધો છે. બાવુમાની કપ્તાનીમાં દક્ષિણ આફ્રિકાનો છેલ્લા બે વર્ષમાં ટેસ્ટ રેકોર્ડ શાનદાર રહ્યો છે. ટીમે આ જ વર્ષે ફાઈનલમાં ઓસ્ટ્રેલિયાને હરાવીને વર્લ્ડ ટેસ્ટ ચેમ્પિયનશિપનો ખિતાબ પોતાના નામે કર્યો હતો.
ચાર સ્પિનરો સાથે ઉતરી છે ટીમ ઈન્ડિયા
દક્ષિણ આફ્રિકા સામેની પ્રથમ ટેસ્ટમાં ટીમ ઈન્ડિયાની પ્લેઈંગ ઈલેવન જોઈને સૌ કોઈ આશ્ચર્યચકિત થઈ ગયા છે. કોલકાતામાં કેપ્ટન શુભમન ગીલ એક કે બે નહીં, પરંતુ ચાર સ્પિનરો સાથે મેદાનમાં ઉતર્યા છે. કુલદીપ યાદવ અને અક્ષર પટેલને તો અંતિમ ઈલેવનમાં જગ્યા મળી જ છે, સાથે જ રવીન્દ્ર જાડેજા અને વોશિંગ્ટન સુંદરને પણ રાખવામાં આવ્યા છે. કુલ મળીને, પ્રથમ ટેસ્ટમાં ટીમ ઈન્ડિયા છ બોલરો સાથે રમી રહી છે.
સૌથી ચોંકાવનારી વાત એ છે કે વોશિંગ્ટન સુંદર બોલિંગની સાથે સાથે નંબર ત્રણ પર બેટિંગ કરતા જોવા મળશે. સઈ સુદર્શનને પ્લેઈંગ ઈલેવનમાં સ્થાન આપવામાં આવ્યું નથી અને સુંદરને બેટિંગ ઓર્ડરમાં પ્રમોટ કરવાની પૂરી તૈયારી છે. ઈડન ગાર્ડન્સની પિચ પરથી સામાન્ય રીતે સ્પિન બોલરોને બહુ ટર્ન મળતો નથી. આ જ કારણ છે કે એકસાથે ચાર સ્પિનરોને રમાડવાનો નિર્ણય સૌ કોઈની સમજની બહાર જણાઈ રહ્યો છે.
