કેયુર વાઘેલાના ડાન્સને દિગ્ગજોએ આપ્યું સ્ટેન્ડિંગ ઓવેશન
રાજકોટ શહેર હંમેશાં પ્રતિભાનો ખજાનો રહ્યું છે, અને આ વખતે શહેરના કેયુર વાઘેલાએ આંતરરાષ્ટ્રીય મંચ પર અદભૂત કમાલ કરીને સૌનું ધ્યાન પોતાની તરફ ખેંચ્યું છે. ડાન્સ ક્ષેત્રે વર્ષોથી મહેનત અને સમર્પણ દર્શાવનાર કેયુરે રાષ્ટ્રીય અને આંતરરાષ્ટ્રીય સ્તરે 70થી વધુ એવોર્ડ પ્રાપ્ત કરીને પોતાનું અનોખું સ્થાન બનાવ્યું છે. મિકેનિકલ એન્જિનિયરિંગ પૂર્ણ કર્યા પછી લંડનમાં એમ.બી.એ. કરતી વખતે પણ તેણે પોતાના ડાન્સ પ્રત્યેનો જુસ્સો યથાવત રાખ્યો હતો. આ જ જુસ્સો અને પ્રતિભાના બળ પર તેણે વર્લ્ડ ઓફ ડાન્સ લંડન 2025માં ટોચના 4માં સ્થાન મેળવીને જજોને સ્ટેન્ડિંગ ઓવેશન આપવા મજબૂર કર્યા હતા. માધુરી દીક્ષિત, સુનિલ શેટ્ટી, રેમો ડિસૂઝા અને ધર્મેશ જેવા જાણીતા કલાકારોએ પણ તેના પ્રદર્શનને દિલથી વખાણ્યું છે.
શરૂઆતના પગલા અને પ્રેરણાદાયી સફર
કેયુરની નૃત્યયાત્રા બાળપણથી જ શરૂ થઈ ગઈ હતી. લાલ બહાદુર શાસ્ત્રી સ્કૂલમાં ધોરણ 8માં અભ્યાસ કરતી વખતે જ્યારે તે પ્રથમ વખત ઇન્ટર-સ્કૂલ ઓડિશન માટે પસંદ થયો, ત્યારે તેના નૃત્યના અદ્ભુત મૂવ્સ જોઈને શિક્ષકોએ તરત કહી દીધું કે આ બાળકને કોરિયોગ્રાફી શીખવવાની કુદરતી પ્રતિભા છે. મિત્રો તેને બાળપણથી જ લીડર કહેતાં, અને એ જ લીડિંગ સ્પિરિટ આજે તેને લંડન સુધી લઈ ગઈ છે.
માધુરી અને સુનિલ સામે લિરિકલ ડાન્સનો જાદુ
લંડનમાં મળેલી સફળતા પછી કેયુરને મુંબઈમાં માધુરી દીક્ષિત અને સુનિલ શેટ્ટી સામે ઇન્ટરનેશનલ પર્ફોર્મર તરીકે ડાન્સ કરવાની વિશેષ તક મળી હતી. આ પ્રસંગે તેણે લિરિકલ ડાન્સની એવી રજૂઆત કરી કે બંને કલાકારો તેના મૂવ્સથી દંગ રહી ગયા. તેમના ચહેરા પરની ખુશી અને પ્રશંસાએ કેયુરનો આત્મવિશ્વાસ વધુ મજબૂત બનાવ્યો.
સંઘર્ષ, સપના અને સફળતા
કેયુર જણાવે છે કે તે છેલ્લાં દસ વર્ષથી સતત પ્રયત્ન કરી રહ્યો હતો અને આજે તેનું સપનું સાકાર થયું છે. ગાયકવાડી વિસ્તારમાં રહેતા કેયુરે અભ્યાસ અને ડાન્સ વચ્ચે સંતુલન જાળવી રાખ્યું છે. અત્યાર સુધીમાં તે 70થી વધુ એવોર્ડ પોતાના નામે કરી ચૂક્યો છે, જે તેની લગન અને પ્રતિભાનું દર્પણ છે.
પરિવારનો આધાર અને જાતે શીખેલી કળાનો રસ્તો
દરજી કામ કરતા પિતાની સાદી આવક હોવા છતાં, પરિવારે કેયુરને હંમેશાં સાથ આપ્યો. પરિવારના ઉત્સાહ અને પોતાની મહેનતના જોરે કેયુરે યુટ્યુબ પરથી નૃત્ય શીખ્યું. માઈકલ જેક્સન અને હૃતિક રોશનને આદર્શ માની તે સતત નવો અભ્યાસ કરતો રહ્યો. વર્લ્ડ ઓફ ડાન્સની સ્વિટ્ઝર્લેન્ડ વર્ઝનમાં ફાઇનલિસ્ટ બન્યા પછી હવે તેણે લંડન 2025માં ટોપ 4 સુધી પહોંચીને ભારતનું નામ ફરી એકવાર વૈશ્વિક સ્તરે ચમકાવ્યું છે.
