Nokia Layoffs: નોકિયા દ્વારા 2000 કર્મચારીઓની છટણી, આગામી સમયમાં વધુ કર્મચારીઓ પર અસર થવાની શક્યતા
Nokia Layoffs: ટેક કંપનીઓમાં છટણીનો તબક્કો અટકવાના કોઈ સંકેત દેખાતો નથી. ફેસબુક અને ઇન્સ્ટાગ્રામની પેરેન્ટ કંપની મેટા બાદ હવે નોકિયા છટણીનો સામનો કરી રહી છે. નોકિયાએ ગ્રેટર ચીનમાં લગભગ 2,000 કર્મચારીઓની છટણી કરી છે, જે કંપનીના કુલ કર્મચારીઓના લગભગ પાંચમા ભાગના છે. ખર્ચ ઘટાડવાના પ્રયાસોના ભાગરૂપે આ પગલું લેવામાં આવ્યું છે. રોઇટર્સના અહેવાલ મુજબ, નોકિયા યુરોપમાં 350 વધુ કર્મચારીઓની છટણી કરવાની પણ યોજના બનાવી રહી છે. નોકિયા બેઇજિંગ અને શાંઘાઈ તેમજ હોંગકોંગ અને તાઈવાનમાં ઓફિસ ધરાવે છે, જે કંપનીના ગ્રેટર ચાઈના ક્ષેત્રનો ભાગ છે અને જ્યાંથી તે ચાઈના મોબાઈલ જેવા ગ્રાહકોને સેવા આપે છે.
નોકિયાએ પહેલેથી જ જાહેરાત કરી હતી કે તે 2026 સુધીમાં 800 મિલિયન યુરો અને 1.2 બિલિયન યુરો વચ્ચેની બચત કરવા માટે 14,000 નોકરીઓ કાપશે. આ છટણી તે યોજનાનો એક ભાગ છે. નોકિયાના પ્રવક્તાએ પુષ્ટિ કરી કે યુરોપમાં 350 કર્મચારીઓની છટણી અંગે પરામર્શ શરૂ થઈ ગયો છે, પરંતુ ગ્રેટર ચીનમાં છટણી અંગે કોઈ ટિપ્પણી કરી નથી.
નોકિયાના કર્મચારીઓની સંખ્યા ઘટીને 78,500 થઈ ગઈ છે
ડિસેમ્બર 2023 સુધીમાં, નોકિયાના ગ્રેટર ચાઇનામાં 10,400 અને યુરોપમાં 37,400 કર્મચારીઓ હતા. જ્યારે નોકિયાએ ગયા વર્ષે નોકરીમાં કાપની જાહેરાત કરી ત્યારે તેના કુલ કર્મચારીઓ લગભગ 86,000 હતા. કંપનીએ 2026 સુધીમાં આ સંખ્યા ઘટાડીને 72,000 થી 77,000 ની વચ્ચે કરવાનું લક્ષ્ય રાખ્યું છે. હાલમાં નોકિયામાં અંદાજે 78,500 કર્મચારીઓ છે.
એક સમયે ચીન બીજા નંબરનું સૌથી મોટું બજાર હતું
ચીન એક સમયે નોકિયા માટે બીજું સૌથી મોટું બજાર હતું. પરંતુ 2019 થી Huawei પર પશ્ચિમી દેશો દ્વારા લાદવામાં આવેલા પ્રતિબંધોને પગલે, નોકિયા અને એરિક્સન માટે ચાઇનીઝ ટેલિકોમ ઓપરેટરોના કરારમાં ઘટાડો થયો. 2019માં નોકિયાના ચોખ્ખા વેચાણમાં ગ્રેટર ચાઇનાનો હિસ્સો 27% હતો, પરંતુ તાજેતરના ક્વાર્ટરમાં આ યોગદાન ઘટીને 6% કરતા પણ ઓછું થઈ ગયું છે.
સપ્ટેમ્બર ક્વાર્ટરમાં ઓપરેટિંગ નફો 9% વધ્યો
જુલાઈ-સપ્ટેમ્બર 2024 ક્વાર્ટરમાં નોકિયાનો ઓપરેટિંગ નફો 9% વધ્યો હતો, જેનું મુખ્ય કારણ ખર્ચમાં કાપ છે. જોકે, કંપનીનું ચોખ્ખું વેચાણ અંદાજ કરતાં ઓછું હતું, તેના શેરમાં 4% ઘટાડો નોંધાયો હતો. તેમણે એ પણ સ્પષ્ટ કર્યું કે આ ખર્ચમાં ઘટાડો R&D આઉટપુટને અસર કરશે નહીં.
