મહારાષ્ટ્ર વિધાનસભા ચૂંટણી માટે ભાજપે રવિવારે (20 ઓક્ટોબર) બપોરે તેના ઉમેદવારોની પ્રથમ યાદી જાહેર કરી છે. જેમાં ભાજપે 99 ઉમેદવારોની જાહેરાત કરી છે. મહારાષ્ટ્રની તમામ 288 વિધાનસભા બેઠકો માટે 20 નવેમ્બરે એક જ તબક્કામાં મતદાન થશે અને 23 નવેમ્બરે મતગણતરી થશે.
ભાજપે નાગપુર દક્ષિણ-પશ્ચિમથી નાયબ મુખ્યપ્રધાન દેવેન્દ્ર ફડણવીસ અને રાજ્ય ભાજપ પ્રમુખ ચંદ્રશેખર બાવનકુલેને કામથી (નાગપુર શહેર)થી મેદાનમાં ઉતાર્યા છે. જ્યારે મંત્રી ગિરીશ મહાજનને જામનેરથી, મંત્રી સુધીર મુનગંટીવારને બલ્લારપુરથી, શ્રીજય અશોક ચવ્હાણને ભોકરથી, આશિષ શેલારને બાંદ્રા પશ્ચિમથી, મંગલ પ્રભાત લોઢાને મલબાર હિલથી, રાહુલ નાર્વેકરને કોલાબાથી અને છત્રપતિ શિવેન્દ્ર રાજે ભોસલેને સાતારાથી ટિકિટ આપવામાં આવી છે.
મહારાષ્ટ્રમાં હાલમાં મહાયુતિ ગઠબંધન સરકાર છે, જેમાં ભાજપ, શિવસેનાના એકનાથ શિંદેના નેતૃત્વવાળા જૂથ અને NCPના અજિત પવારના નેતૃત્વવાળા જૂથનો સમાવેશ થાય છે. મહાયુતિની સીધી સ્પર્ધા વિપક્ષી ગઠબંધન મહા વિકાસ અઘાડી (MVA) સાથે છે, જેમાં કોંગ્રેસ, ઉદ્ધવ ઠાકરેની શિવસેના (UBT) અને વરિષ્ઠ નેતા શરદ પવારની આગેવાની હેઠળની NCP (SP)નો સમાવેશ થાય છે.
જો આપણે 2019ની મહારાષ્ટ્ર વિધાનસભા ચૂંટણીના પરિણામો પર નજર કરીએ તો, ભાજપ રાજ્યમાં સૌથી મોટી પાર્ટી તરીકે ઉભરી આવી છે. જો કે, ત્યારબાદ ભાજપ અને અવિભાજિત શિવસેનાએ એનડીએના બેનર હેઠળ એકસાથે ચૂંટણી લડી હતી. ત્યારે ભાજપે 165 બેઠકો પર પોતાના ઉમેદવારો ઉભા રાખ્યા હતા અને તેમાંથી 105 બેઠકો જીતી હતી. જ્યારે અવિભાજિત શિવસેનાએ 126 બેઠકો પર ચૂંટણી લડી હતી અને 56 બેઠકો જીતી હતી. બીજી તરફ, કોંગ્રેસે 147 બેઠકો પર તેના ઉમેદવારો ઉભા રાખ્યા હતા અને 44 બેઠકો જીતી હતી, જ્યારે અવિભાજિત એનસીપીએ 121 બેઠકો પર ચૂંટણી લડી હતી અને 54 બેઠકો જીતવામાં સફળ રહી હતી.
