ગુજરાત સહિત પાંચ રાજ્યોમાં શીત લહેર માટે હવામાન વિભાગની ચેતવણી
બંગાળની ખાડીના દક્ષિણ વિસ્તારોમાં હવામાન પ્રણાલીઓમાં સતત ફેરફાર નોંધાઈ રહ્યો છે. તમિલનાડુની નજીકના દરિયાકાંઠે હાલમાં સાયક્લોનિક સર્ક્યુલેશન સક્રિય હોવાનું હવામાન નિષ્ણાતો જણાવી રહ્યા છે. શનિવારથી આ વિસ્તારમાં હવામાનમાં વધુ બદલાવ આવવાની શક્યતા છે અને તેના પરિણામ રૂપે લો પ્રેશર એરિયાનું નિર્માણ થવાની સંભાવના છે. આ પરિસ્થિતિને કારણે તમિલનાડુ, કેરળ, માહે, રાયલસીમા અને દરિયાકાંઠાના આંધ્રપ્રદેશમાં ભારે વરસાદ પડવાની આગાહી કરવામાં આવી છે.
કેટલાક રાજ્યોમાં ઠંડીમાં વધારો, કોલ્ડ વેવ માટે ચેતવણીઓ જારી
હવામાન વિભાગના અહેવાલ મુજબ રાજસ્થાનના સીકર વિસ્તારમાં 5.5 ડિગ્રી સેલ્સિયસ જેટલું નીચું તાપમાન નોંધાયું છે. ગુજરાત, મધ્ય મહારાષ્ટ્ર, છત્તીસગઢ, તેલંગાણા અને પૂર્વી રાજસ્થાનમાં વધતી ઠંડીની અસરને ધ્યાનમાં રાખીને કોલ્ડ વેવની ચેતવણીઓ જાહેર કરવામાં આવી છે. ઉત્તરપૂર્વ ચોમાસાની અસર આ વર્ષે દક્ષિણ ભારતમાં ઓછી જોવા મળી છે, પરંતુ બંગાળની ખાડીમાં સર્જાતા લો પ્રેશરના કારણે આગામી અઠવાડિયામાં ભારે વરસાદ પડી શકે તેવી શક્યતા છે. આંદામાન-નિકોબારમાં પણ આજે ભારે વરસાદની આગાહી કરવામાં આવી છે.
શીત લહેર યથાવત, કેટલાક વિસ્તારોમાં અનિયમિત ઠંડીની સ્થિતિ
હવામાન નિષ્ણાતો જણાવે છે કે હાલ પાંચ રાજ્યોમાં વધતી ઠંડીનો સૌથી વધુ પ્રભાવ જોવા મળી રહ્યો છે. મધ્યપ્રદેશના ભાગોમાં મધ્યમથી ગંભીર શીત લહેરની સ્થિતિ માટે ખાસ ચેતવણી અપાઈ છે. આગામી 24 કલાક દરમિયાન મધ્ય મહારાષ્ટ્ર, પૂર્વી મધ્યપ્રદેશ અને તેલંગાણાના કેટલાક વિસ્તારોમાં પણ શીત લહેર યથાવત રહેવાની સંભાવના વ્યક્ત કરવામાં આવી છે. આવનારા દિવસોમાં આ ઠંડીનો વ્યાપ વધુ વિસ્તરે તેવું જણાઈ રહ્યું છે.
ગુજરાતમાં શુષ્ક હવામાન યથાવત, તાપમાન સામાન્યથી ઓછું નોંધાયું
અમદાવાદ હવામાન વિભાગે જણાવ્યું છે કે સૌરાષ્ટ્ર-કચ્છ, દીવ, દમણ અને દાદરા નગર હવેલીમાં હાલ હવામાન સંપૂર્ણપણે શુષ્ક રહ્યુ છે. લઘુત્તમ તાપમાનમાં ખાસ કોઈ વધારો કે ઘટાડો નોંધાયો નથી, જોકે કેટલાક વિસ્તારોમાં સામાન્યથી ઓછું તાપમાન જોવા મળ્યું છે. હાલ ગુજરાતમાં પૂર્વીય પવનો ફૂંકાઈ રહ્યા છે, જેના કારણે ઠંડીની અસર વધુ સ્પષ્ટ બની રહી છે. આગામી દિવસોમાં રાજ્યમાં વરસાદની કોઈ સંભાવના નથી.
તાપમાનમાં ધીમે ધીમે વધારો થશે, હવામાન સ્થિર રહેવાની આશા
આગામી ચાર દિવસ દરમિયાન તાપમાનમાં બેથી ત્રણ ડિગ્રી સેલ્સિયસનો વધારો થઈ શકે છે, તેવું હવામાન વિભાગે જણાવ્યું છે. આ વધારાને બાદ કરતાં હવામાનમાં કોઈ મોટો ફેરફાર થવાની શક્યતા નથી. ઠંડીની તીવ્રતા થોડી ઓછી થશે પણ પ્રભાવ યથાવત રહેશે, એમ અનુમાન વ્યક્ત કરાયું છે.
