મોટો ખુલાસો: ઈરાનના ક્રૂડ ઓઈલનું પરિવહન કરવા બદલ અમેરિકાએ આ ભારતીય કંપની પર લગાવ્યો પ્રતિબંધ!
અમેરિકાએ ઈરાનના ઓઇલ નેટવર્કને ખતમ કરવા માટે અનેક દેશોની 17 કંપનીઓ, વ્યક્તિઓ અને જહાજો પર પ્રતિબંધ લગાવ્યો છે. આમાં ભારતની શિપિંગ ફર્મ ‘આરએન શિપ મેનેજમેન્ટ પ્રાઇવેટ લિમિટેડ’નામની કંપનીનો સમાવેશ થાય છે. આ કંપની પર ઈરાની ક્રૂડ ઓઈલનું પરિવહન કરવા બદલ પ્રતિબંધ મૂકવામાં આવ્યો છે.
અમેરિકાએ ઈરાન પર દબાણ વધારવા અને તેના પરમાણુ કાર્યક્રમને રોકવાના ઉદ્દેશ્યથી મોટું પગલું ભર્યું છે. અમેરિકાએ ઈરાનના ઓઇલ નેટવર્ક સાથે જોડાયેલી 17 કંપનીઓ, લોકો અને જહાજો પર પ્રતિબંધો લગાવ્યા છે, જેમાંથી એક ભારતીય શિપિંગ કંપની છે.
ભારતીય કંપની પર પ્રતિબંધનું કારણ
ભારતની શિપિંગ ફર્મ ‘આરએન શિપ મેનેજમેન્ટ પ્રાઇવેટ લિમિટેડ’ પર અમેરિકાના ટ્રેઝરી વિભાગે પ્રતિબંધો લગાવ્યા છે. આ કંપની પર આરોપ છે કે તે ઈરાનના ક્રૂડ ઓઇલનું પરિવહન (ટ્રાન્સપોર્ટ) કરી રહી હતી, જે અમેરિકાના હાલના પ્રતિબંધોનું ઉલ્લંઘન છે.
અમેરિકન એક્શનનો ઉદ્દેશ્ય
અમેરિકન ટ્રેઝરી વિભાગના જણાવ્યા અનુસાર, આ કાર્યવાહીનો મુખ્ય ઉદ્દેશ્ય ઈરાનના આવકના સ્રોતોને સીમિત કરીને તેના પરમાણુ કાર્યક્રમની ક્ષમતાને અટકાવવાનો છે. અમેરિકા ઈરાનને આંતરરાષ્ટ્રીય બજારોમાંથી ઓઇલ વેચીને નાણાં એકઠા કરવાથી રોકવા માંગે છે.
પ્રતિબંધોની અસર
અમેરિકન ટ્રેઝરી વિભાગે પ્રતિબંધિત કંપનીઓની તમામ અમેરિકન સંપત્તિઓ ફ્રીઝ કરી દીધી છે. આ સાથે, અમેરિકન નાગરિકો માટે હવે તેમની સાથે કોઈપણ પ્રકારનો વ્યવહાર કરવો કે લેવડ-દેવડ કરવી મનાઈ છે.
આ કાર્યવાહી બતાવે છે કે અમેરિકા ઈરાન સાથે વેપાર કરતા દેશો અને કંપનીઓ પર કડક નજર રાખી રહ્યું છે અને વૈશ્વિક સપ્લાય ચેઇનને ઈરાનના ઓઇલ નેટવર્કથી અલગ કરવા માટે કટિબદ્ધ છે.
