નિકિતા ગૌસ્વામી કેસમાં પરિવારની ન્યાય માટે લડત તેજ, સીસીટીવી તપાસ અને કડક પગલાંની માંગ
સુરતના પુણાગામ વિસ્તારમાં આવેલી સદવિચાર હોસ્પિટલ સામે આજે મૃતક પ્રસુતા નિકિતા ગૌસ્વામીના પરિવારે અને સમાજના લોકોએ તબીબી બેદરકારીના ગંભીર આક્ષેપો સાથે જોરદાર વિરોધ કર્યો હતો. મોટી સંખ્યામાં લોકો હાથમાં બેનરો તથા આવેદનપત્ર લઈને જિલ્લા કલેક્ટર કચેરીએ પહોંચ્યા હતા. પરિવારની માંગ છે કે નિકિતા ગૌસ્વામીના મોતને લઈને સંપૂર્ણ સત્ય બહાર આવે અને જવાબદારોએ કડક સજા ભોગવવી જોઈએ. ઘટનાને લઈને વિસ્તારમા ભારે રોષ જોવા મળ્યો હતો.
ડિલિવરી બાદ કલાકો સુધી માહિતી ન મળતાં આક્રોશ
ત્રણ દિવસ પહેલાં નિકિતાએ હોસ્પિટલમાં બે જોડિયા બાળકોને જન્મ આપ્યા હતા. પરંતુ ડિલિવરી પછી દોઢ કલાક સુધી તબીબો અથવા સ્ટાફ દ્વારા પરિવરને માતાની સ્થિતિ અંગે કોઈ સ્પષ્ટ માહિતી આપવામાં આવી નહોતી. પરિવારનો આક્ષેપ છે કે હોસ્પિટલ તરફથી મળેલી અસ્પષ્ટ માહિતી અને વારંવારની ટાળટૂકીને કારણે તેમને શંકા વધી ગઈ હતી. અંતે માતાનું શંકાસ્પદ રીતે મોત નીપજતા પરિવાર ભારે દુઃખ અને આક્રોશમાં આવી ગયો છે. તેમની માંગ છે કે આ વિલંબ પાછળના કારણોની પારદર્શક તપાસ થવી જોઈએ.
મૃત્યુ પછી અંગૂઠાના નિશાન લેવાતા શંકા ગાઢ બની
પરિવારના આક્ષેપો મુજબ નિકિતાના મૃત્યુ બાદ હોસ્પિટલ દ્વારા તેમના હાથમાં અંગૂઠાનું નિશાન કેટલાક દસ્તાવેજો પર લેવામાં આવ્યું હતું. મૃતકની બહેન હેતવાંસી ગૌસ્વામીએ જણાવ્યું હતું કે આ વર્તન તબીબી વ્યવહારની દ્રષ્ટીએ ગેરકાયદેસર તથા શંકાસ્પદ છે. તેમનું માનવું છે કે હોસ્પિટલ કોઈ બાબત છુપાવવાનો પ્રયાસ કરી રહી છે અને બેદરકારીનું પરિણામ જ નિકિતાના મોત રૂપે સામે આવ્યું છે. અગાઉ પણ પરિવારે હોસ્પિટલમાં જ ભારે વિરોધ કર્યો હતો, પરંતુ યોગ્ય પગલાં ન લેવાતા આ કેસ વધુ ગંભીર બની ગયો છે.
સુરત પોલીસની કામગીરી પર પણ સવાલો
પરિવાર અને સમાજના સભ્યોએ પોલીસની કામગીરી પર પણ સવાલો ઉઠાવ્યા છે. તેમનું કહેવું છે કે પોલીસ દ્વારા તાત્કાલિક પગલાં લેવાયા હોત તો ઘટના અંગે વધુ સ્પષ્ટતા મળી શકત. પરિવારનો આક્ષેપ છે કે પોલીસે માત્ર આશ્વાસન આપીને સમય ગુમાવ્યો છે અને હજી સુધી કોઈ કડક કાર્યવાહી નથી થઈ. આથી પરિવારે આજે જિલ્લાના કલેક્ટરને મુખ્યમંત્રીને ઉદ્દેશીને આવેદનપત્ર આપ્યું છે, જેમાં નિષ્પક્ષ તપાસ અને ઝડપી ન્યાયની માંગણી કરવામાં આવી છે.
સીસીટીવી ફૂટેજ અને સ્ટાફની લાયકાતની તપાસની માંગ
પરિવારે ICUના સીસીટીવી ફૂટેજની તપાસ કરવાની માંગણી કરી છે જેથી સારવાર દરમિયાન શું થયું તે સ્પષ્ટ થઈ શકે. સાથે જ તેમણે સારવાર આપનારા તબીબો તથા સ્ટાફની લાયકાતની સઘન ચકાસણી પણ કરવાની માગણી કરી છે. નિકિતાના મૃત્યુ પછી લેવામાં આવેલા અંગૂઠાના નિશાનની પણ તપાસ થાય તેવી તેઓની માંગ છે. પરિવાર સ્પષ્ટ કહે છે કે જ્યાં સુધી જવાબદાર વિરુદ્ધ કડક પગલાં નહીં લેવાય અને નિકિતાને ન્યાય નહીં મળે, તેમની લડત ચાલુ રહેશે. હવે પ્રશાસન આ સંવેદનશીલ મામલામાં કેવી કાર્યવાહી કરે છે તે સૌ માટે મહત્વપૂર્ણ બની ગયું છે.
