Video: મુંબઈના વરલી સી-ફેસ પર દેખાયો અદભૂત નજારો, શું તમે જોયો ડોલ્ફિનનો આ વાયરલ વીડિયો?
મુંબઈનું વરલી સી-ફેસ (Worli Sea Face) હંમેશા તેના સુંદર દરિયા કિનારા અને શાંત વાતાવરણ માટે જાણીતું છે, પરંતુ અત્યારે આ વિસ્તાર એક ખાસ કારણસર ચર્ચાના કેન્દ્રમાં છે. મુંબઈગરાઓ માટે આશ્ચર્યની વાત એ છે કે અહીં અરબી સમુદ્રના કિનારે રમતિયાળ ડોલ્ફિન (Dolphin) જોવા મળી છે. આ અદભૂત નજારાનો વીડિયો સોશિયલ મીડિયા પર જોરદાર વાયરલ થઈ રહ્યો છે, જેને જોઈને લોકો મંત્રમુગ્ધ થઈ ગયા છે.
વીડિયોમાં શું છે ખાસ?
સચિન ચવ્હાણ નામના ઇન્સ્ટાગ્રામ યુઝરે પોતાના એકાઉન્ટ પર આ વીડિયો શેર કર્યો છે. વીડિયોમાં જોઈ શકાય છે કે વરલીના વિશાળ દરિયામાં ડોલ્ફિનની જોડી મોજાઓ સાથે રમી રહી છે અને હવામાં કુદકા મારી રહી છે. સામાન્ય રીતે મુંબઈ જેવા પ્રદૂષિત અને ભીડભાડવાળા શહેરના કિનારે ડોલ્ફિન દેખાવી લગભગ અશક્ય માનવામાં આવે છે, પરંતુ આ નજારો જોઈને મુંબઈગરાઓની ખુશીનો પાર રહ્યો નથી.
સચિને વીડિયોના કેપ્શનમાં લખ્યું છે, “કોંક્રિટ અને અફરાતફરીની વચ્ચે… ડોલ્ફિનની પ્યારી પળો.”
મુંબઈગરાઓની ઉમટી ભીડ
આ વીડિયો વાયરલ થતાની સાથે જ વરલી સી-ફેસ પર ડોલ્ફિનને પોતાની નજરે જોવા માટે લોકોની ભારે ભીડ ઉમટી પડી છે. લોકો કલાકો સુધી દરિયા કિનારે ઉભા રહીને આ મનોહર દ્રશ્યની રાહ જોઈ રહ્યા છે. સોશિયલ મીડિયા પર પણ આ અંગે ખૂબ ચર્ચાઓ થઈ રહી છે.
View this post on Instagram
નેટિઝન્સની પ્રતિક્રિયા: કોરોના કાળની યાદ તાજી થઈ
વીડિયો જોયા બાદ સોશિયલ મીડિયા યુઝર્સે અલગ-અલગ પ્રકારની કોમેન્ટ્સ કરી છે:
- એક યુઝરે લખ્યું, “મને ૫ વર્ષ પછી આ પળનો અનુભવ કરવાની તક મળી. કોરોના કાળમાં જ્યારે પ્રદૂષણ ઓછું હતું ત્યારે પણ અહીં ડોલ્ફિન જોવા મળી હતી.”
- બીજા એક યુઝરે રમૂજમાં લખ્યું, “કદાચ તે રણવીર સિંહની ફિલ્મ ‘ધુરંધર’ જોવા આવી હશે!”
- અન્ય એક યુઝરે ગંભીરતાથી નોંધ્યું કે, “દરિયાનું પાણી સાફ રાખવાના સકારાત્મક પરિણામો હવે દેખાઈ રહ્યા છે.”
જોકે, કેટલાક લોકોએ આ વીડિયોને AI (આર્ટિફિશિયલ ઇન્ટેલિજન્સ) દ્વારા બનાવેલો ગણાવી તેની સત્યતા પર સવાલ પણ ઉઠાવ્યા છે. પરંતુ સ્થાનિક લોકોનો દાવો છે કે તેમણે ખરેખર ડોલ્ફિનને ત્યાં જોઈ છે.
શા માટે આ વિસ્તારમાં દેખાઈ ડોલ્ફિન?
નિષ્ણાતોના મતે, વરલી અને આસપાસના દરિયા કિનારે જ્યારે પાણીનું પ્રદૂષણ ઓછું હોય અને માછલીઓનો પૂરતો જથ્થો ઉપલબ્ધ હોય, ત્યારે ઇન્ડો-પેસિફિક હમ્પબેક ડોલ્ફિન (Indo-Pacific Humpback Dolphin) કિનારાની નજીક આવી જતી હોય છે. આ મુંબઈની દરિયાઈ જીવસૃષ્ટિ માટે ખૂબ જ સારા સંકેત માનવામાં આવે છે.
