સાવધાન! જો તમારું ડ્રાઇવિંગ લાયસન્સ 2026 માં એક્સપાયર થઈ રહ્યું છે, તો ઘરે બેઠા આ રીતે કરો રિન્યૂ; જાણો ઓનલાઇન પ્રોસેસ અને ફી
જો તમારું ડ્રાઇવિંગ લાયસન્સ (DL) વર્ષ 2026 માં એક્સપાયર થવાનું છે અથવા થઈ ગયું છે, તો તમારા માટે આ સમાચાર ખૂબ જ મહત્વપૂર્ણ છે. ભારતમાં રસ્તા પર વાહન ચલાવવા માટે માન્ય ડ્રાઇવિંગ લાયસન્સ હોવું અનિવાર્ય છે. નિયમો મુજબ, એક્સપાયર થયેલા લાયસન્સ સાથે ગાડી ચલાવવા બદલ તમારે 5,000 રૂપિયા સુધીનો ભારે દંડ ભરવો પડી શકે છે અને કાયદાકીય મુશ્કેલીનો સામનો કરવો પડી શકે છે. આ ઉપરાંત, અકસ્માતની સ્થિતિમાં તમારો વીમો (Insurance Claim) પણ નકારી શકાય છે.
માર્ગ પરિવહન અને રાજમાર્ગ મંત્રાલયે હવે લાયસન્સ રિન્યૂ કરવાની પ્રક્રિયાને સંપૂર્ણપણે ડિજિટલ અને સરળ બનાવી દીધી છે. હવે તમે RTO ના ધક્કા ખાધા વગર ઘરે બેઠા સારથિ પરિવહન પોર્ટલ દ્વારા તમારું કામ પૂરું કરી શકો છો.
ઓનલાઇન રિન્યૂ કરાવવાનું સ્ટેપ-બાય-સ્ટેપ પ્રોસેસ
દસ્તાવેજો અપલોડ કરવાથી લઈને ફીની ચુકવણી સુધીની તમામ પ્રક્રિયા હવે ઓનલાઇન ઉપલબ્ધ છે:
- સૌથી પહેલા સત્તાવાર વેબસાઇટ https://sarathi.parivahan.gov.in/ પર જાઓ.
- તમારા રાજ્ય (Gujarat) ની પસંદગી કરો.
- ‘Apply for DL Renewal’ વિકલ્પ પર ક્લિક કરો.
- તમારો DL નંબર, જન્મ તારીખ અને કેપ્ચા કોડ દાખલ કરો.
- જરૂરી વ્યક્તિગત વિગતો ભરો અને સંબંધિત દસ્તાવેજોની સ્કેન કરેલી કોપી (PDF/JPEG) અપલોડ કરો.
- નેટ બેન્કિંગ, UPI અથવા કાર્ડ દ્વારા ઓનલાઇન ફી ચૂકવો.
- જો બાયોમેટ્રિક અથવા ડોક્યુમેન્ટ વેરિફિકેશનની જરૂર હોય, તો નજીકની RTO માં એપોઇન્ટમેન્ટ બુક કરો અને નિયત સમયે ત્યાં હાજર રહો.
- રિન્યૂ થયેલું સ્માર્ટ કાર્ડ લાયસન્સ 15 થી 30 દિવસમાં તમારા રજિસ્ટર્ડ સરનામા પર પોસ્ટ દ્વારા મોકલી દેવામાં આવશે.
કયા દસ્તાવેજોની જરૂર પડશે?
અરજી કરતી વખતે તમારી પાસે નીચેના દસ્તાવેજો હોવા જોઈએ:
- જૂનું (એક્સપાયર થવા આવેલું) ડ્રાઇવિંગ લાયસન્સ.
- ફોર્મ 9 (રિન્યુઅલ અરજી ફોર્મ).
- ફોર્મ 1 (શારીરિક ફિટનેસનું સ્વ-ઘોષણા પત્ર).ફોર્મ 1A (મેડિકલ સર્ટિફિકેટ): જો તમારી ઉંમર 40 વર્ષથી વધુ હોય અથવા તમે કોમર્શિયલ લાયસન્સ રિન્યૂ કરાવી રહ્યા હોવ, તો ડોક્ટર દ્વારા સહી કરેલ મેડિકલ સર્ટિફિકેટ ફરજિયાત છે.
- સરનામા અને ઉંમરનો પુરાવો (જેમ કે આધાર કાર્ડ, વોટર આઈડી, પાસપોર્ટ).
- પાસપોર્ટ સાઈઝ ફોટોગ્રાફ અને ડિજિટલ સિગ્નેચર.
ફી અને દંડનું ગણિત
- સમયસર રિન્યુઅલ: જો તમે એક્સપાયરી પહેલા અથવા 30 દિવસના ગ્રેસ પીરિયડમાં અરજી કરો છો, તો સરકારી ફી અંદાજે 200 થી 400 રૂપિયા (રાજ્ય મુજબ અલગ-અલગ) હોય છે.
- મોડું થવા પર દંડ: 30 દિવસના ગ્રેસ પીરિયડ પછી અરજી કરવા પર 1,000 રૂપિયાનો વધારાનો દંડ અને અન્ય ચાર્જ લાગી શકે છે.
- 5 વર્ષની મર્યાદા: જો તમારું લાયસન્સ 5 વર્ષથી વધુ સમયથી એક્સપાયર થયેલું હોય, તો તેને રિન્યૂ કરી શકાતું નથી; તમારે નવેસરથી અરજી કરવી પડશે અને ફરીથી ડ્રાઇવિંગ ટેસ્ટ આપવો પડી શકે છે.
મહત્વપૂર્ણ નિયમો અને સૂચનો
- ગ્રેસ પીરિયડ: લાયસન્સ એક્સપાયર થયા પછી 30 દિવસનો ગ્રેસ પીરિયડ મળે છે, જેમાં દંડ વગર રિન્યુઅલ શક્ય છે.
- અરજીનો સમય: તમે લાયસન્સ એક્સપાયર થવાના 1 વર્ષ પહેલા પણ રિન્યુઅલ માટે અરજી કરી શકો છો.
- ડિજિટલ કોપી: ટ્રાફિક પોલીસ દ્વારા ચેકિંગ દરમિયાન DigiLocker અથવા mParivahan એપમાં રાખેલ ડિજિટલ DL પણ માન્ય ગણાય છે.
- માન્યતા: ખાનગી લાયસન્સ સામાન્ય રીતે 20 વર્ષ અથવા 40-50 વર્ષની વય સુધી માન્ય રહે છે, જ્યારે કોમર્શિયલ લાયસન્સને દર 3 થી 5 વર્ષે રિન્યૂ કરાવવું પડે છે.
