સ્ટ્રાઈક-રેટ પરની ટીકાઓ સામે તિલક વર્માનો જડબાતોડ જવાબ: ‘જ્યારે ખભા પર ઉપ-કેપ્ટનની જવાબદારી હોય, ત્યારે માત્ર આક્રમક રમી શકાતું નથી’
યુકે પ્રવાસ દરમિયાન ભારતની ટી20I શ્રેણીમાં કથળેલા પ્રદર્શન અને પોતે ધીમી બેટિંગ કરવા માટે ચારેકોરથી ટીકાઓનો સામનો કરી રહેલા યુવા બેટ્સમેન તિલક વર્માએ આખરે મૌન તોડ્યું છે. સંજુ સેમસન અને ઇશાન કિશન જેવા અનુભવી ખેલાડીઓની હાજરી વચ્ચે ૨૩ વર્ષના આ ડાબોડી બેટ્સમેનને ઉપ-કેપ્ટનની મહત્વપૂર્ણ જવાબદારી સોંપવામાં આવી હતી. જોકે, આયર્લેન્ડ અને ઇંગ્લેન્ડ સામેની ટી20I શ્રેણી ભારતીય ટીમ માટે બિલકુલ યાદગાર રહી ન હતી, જ્યાં ભારત એક પણ મેચ જીતી શક્યું નહોતું. હવે ભારત ઝિમ્બાબ્વે સામેની આગામી T20I શ્રેણીમાં કેપ્ટન શ્રેયસ ઐયરની અગ્વાનીમાં જીતનો માર્ગ શોધવાનો પ્રયાસ કરશે.
યુકે પ્રવાસ દરમિયાન તિલક વર્મા ખાસ કરીને સ્પિનરો સામે મુશ્કેલીમાં મુકાતો જોવા મળ્યો હતો અને તેની ધીમી ઇનિંગ્સ તેમજ સ્ટ્રાઈક-રેટ માટે તેની ભારે ટીકા થઈ હતી. પરંતુ, ઝિમ્બાબ્વે સામેની પ્રથમ T20I મેચ પહેલા યોજાયેલી પ્રેસ કોન્ફરન્સમાં તિલકે પોતાની શૈલી અને રમવાની રીતનો બચાવ કરતા કહ્યું કે, ટીમની પરિસ્થિતિ મુજબ રમવું એ તેની પ્રાથમિકતા છે.
“આક્રમક રમત કરતાં દેશ અને ટીમની સ્થિતિ વધારે મહત્વની”
પોતાના સ્ટ્રાઈક-રેટ અંગે સ્પષ્ટતા કરતા તિલકે જણાવ્યું હતું કે, “ટીમમાં તમારે અલગ-અલગ ક્રમાંકે બેટિંગ કરવા ઊતરવું પડે છે અને ખાસ કરીને મુશ્કેલ પરિસ્થિતિઓમાં રન બનાવવાનું સરળ હોતું નથી. હું હંમેશાં એ જ કરું છું જે ટીમ માટે જરૂરી હોય. જો ટીમને જરૂર હોય તો હું પહેલા જ બોલથી મોટા શૉટ્સ રમી શકું છું, પણ જો ટીમને ઇનિંગ્સ સંભાળવાની જરૂર હોય તો મારે એ ભૂમિકા ભજવવી પડે છે.”
તેણે યુકે પ્રવાસની સ્થિતિ વાગોળતા કહ્યું, “જો તમે આયર્લેન્ડ અને ઇંગ્લેન્ડ સામેની મેચો જુઓ, તો આપણી ટીમ પાવરપ્લેમાં કે પ્રથમ ૧૦ ઓવરની અંદર જ ૪ થી ૫ વિકેટો ગુમાવી દેતી હતી. આવી સ્થિતિમાં મેદાન પર જઈને આડેધડ શૉટ્સ રમીને આઉટ થઈ જવાનો કોઈ અર્થ નથી. જ્યારે તમે દેશ માટે રમી રહ્યા હોવ અને ખાસ કરીને તમને ઉપ-કેપ્ટન તરીકેની મોટી જવાબદારી સોંપાઈ હોય, ત્યારે તમારે ગંભીરતા દર્શાવવી પડે છે. ટીમ મેનેજમેન્ટે મારા પર ભરોસો મૂકીને મને જવાબદારી આપી છે, તેથી હું અંગત આંકડાઓ કરતાં ટીમ યોજનાને વધુ મહત્વ આપું છું.”
યુકે પ્રવાસમાં કેવું રહ્યું તિલક વર્માનું પ્રદર્શન?
યુકે પ્રવાસ ભારતીય ટીમ માટે નિરાશાજનક રહ્યો હોવા છતાં, તિલક વર્મા બેટ્સમેન તરીકે શ્રેષ્ઠ સ્કોરર રહ્યો હતો. તેણે આયર્લેન્ડ અને ઇંગ્લેન્ડ સામે રમાયેલી સાત મેચોમાં ૧૭૮ રન બનાવ્યા હતા, જેમાં બે અર્ધશતકનો સમાવેશ થાય છે. તેનો સર્વોચ્ચ સ્કોર ૫૫ રન હતો, જે તેણે આયર્લેન્ડના બેલફાસ્ટમાં રમાયેલી બીજી T20I મેચમાં બનાવ્યો હતો.
આ પ્રવાસમાં શ્રેયસ ઐયરની કેપ્ટનશીપ હેઠળ ભારતને આયર્લેન્ડ સામે ૨-૦થી અને ઇંગ્લેન્ડ સામે ૪-૦થી વાઈટવોશનો સામનો કરવો પડ્યો હતો. હવે ટીમ ઈન્ડિયા તમામ જૂની ભૂલોમાંથી પાઠ શીખીને ઝિમ્બાબ્વે સામે રમાનારી ત્રણ મેચોની T20I શ્રેણીમાં વાપસી કરવા આતુર છે.
