હર હર મહાદેવના નાદ સાથે ગુંજ્યું સુરત રેલવે સ્ટેશન: સ્વાભિમાન પર્વમાં સહભાગી થવા સોમનાથ દાદાના દ્વારે જશે હજારો ભક્તો
ભારતની પ્રાચીન સંસ્કૃતિ અને આધ્યાત્મિક ગૌરવના પ્રતીક સમાન સોમનાથ મંદિરમાં સોમનાથ સ્વાભિમાન પર્વની ભવ્ય ઉજવણી શરૂ થઈ ગઈ છે. આ પવિત્ર અવસરે દેશભરમાંથી લાખો શ્રદ્ધાળુઓ મહાદેવના દર્શન માટે ઉમટી રહ્યા છે. ગુરુવારે સુરત રેલવે સ્ટેશન ખાતેથી સુરત-વેરાવળ સ્પેશિયલ ટ્રેનને નાયબ મુખ્યમંત્રી હર્ષ સંઘવીએ લીલી ઝંડી બતાવી પ્રસ્થાન કરાવ્યું હતું. હર હર મહાદેવ અને ઓમ નમઃ શિવાયના ગગનભેદી નાદ સાથે શ્રદ્ધાળુઓ સોમનાથ દાદાના દર્શન માટે રવાના થયા હતા.
સુરત જિલ્લાના અંદાજે ૧૩૦૦ જેટલા વડીલો અને યુવાનો આ સ્પેશિયલ ટ્રેન દ્વારા સોમનાથના દર્શને પહોંચશે. નાયબ મુખ્યમંત્રી હર્ષ સંઘવીએ આ પ્રસંગે જણાવ્યું હતું કે સોમનાથ સ્વાભિમાન પર્વ એ ભારતની ઐતિહાસિક ધરોહર અને સાંસ્કૃતિક પુનરુત્થાનની મજબૂત અભિવ્યક્તિ છે. સમગ્ર મંદિર પરિસર અત્યારે ૭૨ કલાકના સામૂહિક ઓમકાર નાદ અને ઋષિકુમારોના શંખનાદથી ગુંજી ઉઠ્યું છે. તેમણે ટ્રેનમાં સવાર તમામ યાત્રિકોને સુખદ યાત્રા માટે શુભેચ્છાઓ પાઠવી હતી.
આક્રમણના ૧૦૦૦ વર્ષ અને આઝાદીના અમૃતકાળનો સંગમ
સોમનાથનો ઈતિહાસ સંઘર્ષ અને અતૂટ શ્રદ્ધાની સાક્ષી પૂરે છે. ગઝનવીએ સોમનાથ પર કરેલા આક્રમણને ૧૦૦૦ વર્ષ પૂર્ણ થઈ રહ્યા છે અને મંદિરના જીર્ણોદ્ધારને ૭૫ વર્ષ થયા છે, ત્યારે આ સુભગ સમન્વયના ભાગરૂપે સ્વાભિમાન પર્વનું આયોજન કરાયું છે. ૮ થી ૧૦ જાન્યુઆરી દરમિયાન યોજાનારા આ મહોત્સવમાં ભવ્ય શૌર્ય યાત્રા અને રંગારંગ સાંસ્કૃતિક કાર્યક્રમો આકર્ષણનું કેન્દ્ર બનશે. વડાપ્રધાન નરેન્દ્ર મોદી પણ ૧૦ અને ૧૧ જાન્યુઆરીએ આ પર્વમાં સહભાગી થવા સોમનાથ પધારશે.
વહીવટી તંત્ર અને સુરતની જનતાનો ભારે ઉત્સાહ
સુરત રેલવે સ્ટેશન પર યોજાયેલા આ વિદાય સમારંભમાં શહેરના મેયર દક્ષેશ માવાણી, કલેક્ટર ડૉ. સૌરભ પારધી અને પોલીસ કમિશનર અનુપમ સિંહ ગેહલોત સહિતના મહાનુભાવો ઉપસ્થિત રહ્યા હતા. શ્રદ્ધાળુઓ માટે ખાસ સુવિધાઓ સાથેની આ ટ્રેનને વિદાય આપતી વખતે અનેક પદાધિકારીઓ અને સ્થાનિક અગ્રણીઓએ પણ હાજરી આપી હતી. સુરતના ભક્તોમાં સોમનાથ દાદાના દર્શન કરવા માટે અનેરો ઉત્સાહ અને ભક્તિમય વાતાવરણ જોવા મળ્યું હતું.
સામાજિક એકતા અને ભક્તિનો મહાકુંભ
સોમનાથ સ્વાભિમાન પર્વ માત્ર એક ધાર્મિક મહોત્સવ નથી, પરંતુ તે રાષ્ટ્રની એકતા અને સાંસ્કૃતિક ચેતનાને જાગ્રત કરવાનું માધ્યમ બની રહ્યું છે. દેશના ખૂણે ખૂણેથી આવતા શ્રદ્ધાળુઓ સોમનાથની પવિત્ર ભૂમિ પર એકત્રિત થઈ રહ્યા છે, જે ભારતીય પરંપરાની અખંડિતતા દર્શાવે છે. સંતોના સાનિધ્યમાં ચાલી રહેલા મંત્રોચ્ચાર અને આધ્યાત્મિક વાતાવરણથી સમગ્ર પ્રભાસ ક્ષેત્રમાં અત્યારે દિવાળી જેવો માહોલ સર્જાયો છે.
