માં શક્તિની ભૂમિ પાટડીમાં વિકાસની નવી ઉડાન, તળાવ બ્યુટિફિકેશનથી યાત્રાધામ વિકાસ સુધી અનેક કામો શરૂ
શક્તિપીઠ તરીકે જાણીતા પાટડી નગરના આંગણે વિકાસનો ઉત્સવ ઉજવવામાં આવ્યો હતો. પ્રભારી મંત્રી અને શહેરી વિકાસ મંત્રી દર્શનાબેન વાઘેલાએ અંદાજે ૪૯.૨૩ કરોડ રૂપિયાના ખર્ચે તૈયાર થયેલા વિવિધ પ્રકલ્પોનું લોકાર્પણ અને ખાતમુહૂર્ત કર્યું હતું. આ તકે તેમણે મા શક્તિના ચરણોમાં વંદન કરી નગરજનોની સુખાકારી માટે પ્રાર્થના કરી હતી. આ કામોથી પાટડીની કાયાપલટ થશે અને સ્થાનિક રહેવાસીઓને પાયાની સુવિધાઓ સાથે આધુનિક માળખાકીય સવલતો પણ ઉપલબ્ધ થશે.
કાંકરિયા જેવું સુંદર બનશે પાટડીનું તળાવ
મંત્રીએ પાટડીના મુખ્ય તળાવના બ્યુટિફિકેશનની કામગીરીને બિરદાવતા જણાવ્યું હતું કે અહીં વોકિંગ ટ્રેક અને સુંદર બગીચો તૈયાર કરવામાં આવ્યો છે. આ તળાવને અમદાવાદના કાંકરિયા જેવું ભવ્ય બનાવવાનું સરકારનું લક્ષ્ય છે, જેના માટે બીજા અને ત્રીજા તબક્કાની કામગીરી ખૂબ જ ઝડપથી પૂર્ણ કરવામાં આવશે. નગરજનો માટે આ સ્થળ મનોરંજન અને સ્વાસ્થ્ય જાળવણીનું ઉત્તમ કેન્દ્ર બની રહેશે. ધારાસભ્ય પી.કે. પરમારના પ્રયાસોથી છેલ્લા ત્રણ વર્ષમાં પાટડીમાં પ્રગતિના નવા દ્વાર ખુલ્યા છે.
યાત્રાધામ વિકાસ અને આધુનિક સાધનોની ભેટ
શક્તિપીઠ મંદિર પાસે થતી ટ્રાફિકની સમસ્યાના કાયમી ઉકેલ માટે બે નવા રસ્તાઓ ખુલ્લા મૂકવામાં આવ્યા છે. મંત્રીએ પાટડીના આ પવિત્ર સ્થળને મોટા યાત્રાધામ તરીકે વિકસાવવાની ખાતરી આપી હતી. આ ઉપરાંત નગરપાલિકાને ફાયર ફાઈટર અને સક્શન મશીન જેવા આધુનિક સાધનો સોંપવામાં આવ્યા છે જેથી સ્વચ્છતા અને સલામતીની કામગીરી વધુ સુદ્રઢ બનશે. સરકાર પાટડીને ‘ડ’ વર્ગમાંથી ‘ક’ વર્ગની નગરપાલિકામાં રૂપાંતરિત કરવા માટે પણ ગંભીરતાથી વિચારણા કરી રહી છે.
૨૦૪૭ના વિકસિત ભારતનો સંકલ્પ
કાર્યક્રમમાં ઉપસ્થિત સાંસદ ચંદુભાઈ શિહોરાએ સ્વદેશી વસ્તુઓ અપનાવી ભારતને ૨૦૪૭ સુધીમાં વિશ્વમાં પ્રથમ ક્રમે લાવવા માટે આહવાન કર્યું હતું. ધારાસભ્યએ પણ આગામી સમયમાં પાટડી વિધાનસભા વિસ્તારમાં થનારા અન્ય વિકાસ કામોની વિગતો આપી હતી. મંત્રીએ ઉમેર્યું હતું કે વર્તમાન સરકાર જે કામનું ખાતમુહૂર્ત કરે છે તેનું લોકાર્પણ પણ પોતાના જ શાસનમાં કરવાની કાર્યશૈલી ધરાવે છે. આ પ્રસંગે નગરપાલિકાના પ્રમુખ અને કલેક્ટર સહિતના વહીવટી અધિકારીઓ અને વિશાળ સંખ્યામાં નગરજનો હાજર રહ્યા હતા.
