સફાઈ કામદારના આશ્રિત દિક્ષીત વાઘેલાની સતત શૈક્ષણિક સિદ્ધિ, ધોરણ-૧૨માં રાજ્ય સ્તરે દ્વિતીય ક્રમ

ગુજરાત સફાઈ કામદાર વિકાસ નિગમ દ્વારા દિક્ષીત વાઘેલાને અભિનંદન, ઉજ્જવળ ભવિષ્યની શુભેચ્છા

મોરબી જિલ્લાના વાંકાનેર શહેરના વતની એવા દીક્ષિત રમણભાઈ વાઘેલાએ વર્ષ ૨૦૨૫ની ધોરણ-૧૨ (વિજ્ઞાન પ્રવાહ) ની પરીક્ષામાં ૮૩.૮૩% ગુણ મેળવીને સમગ્ર ગુજરાતનું ધ્યાન ખેંચ્યું છે. ગુજરાત સફાઈ કામદાર વિકાસ નિગમ દ્વારા જાહેર કરાયેલ વિગતો મુજબ, સફાઈ કામદારોના આશ્રિતોમાં દીક્ષિતે સમગ્ર રાજ્યમાં દ્વિતીય સ્થાન પ્રાપ્ત કરીને પરિવાર અને વાંકાનેરનું નામ રોશન કર્યું છે.

ગૌરવશાળી શૈક્ષણિક ઇતિહાસ

દીક્ષિતની આ સફળતા કોઈ આકસ્મિક ઘટના નથી, પરંતુ તેની સતત મહેનતનું પરિણામ છે:

• ધોરણ-૧૦ ની સિદ્ધિ: દીક્ષિતે અગાઉ ધોરણ-૧૦ માં ૮૬.૩૩% ગુણ મેળવીને સફાઈ કામદારોના આશ્રિતોમાં સમગ્ર રાજ્યમાં પ્રથમ સ્થાન મેળવ્યું હતું.

• અભિનંદન પત્ર: ગુજરાત સફાઈ કામદાર વિકાસ નિગમના મેનેજિંગ ડિરેક્ટર શ્રી જે. એમ. તુવાર દ્વારા દીક્ષિતને પ્રમાણપત્ર પાઠવી તેના તેજસ્વી ભવિષ્ય માટે શુભેચ્છાઓ પાઠવવામાં આવી છે.

• સરકારી પ્રોત્સાહન: સામાજિક ન્યાય અને અધિકારીતા વિભાગ દ્વારા પણ આ સિદ્ધિની સરાહના કરવામાં આવી છે.

મહાનુભાવો દ્વારા સન્માન

દીક્ષિત વાઘેલાની આ અસાધારણ સફળતાને બિરદાવવા માટે મોરબી ખાતે એક વિશેષ કાર્યક્રમ યોજાયો હતો. જેમાં ધારાસભ્ય શ્રી જીતુભાઈ સોમાણી અને કલેક્ટર શ્રી કે. બી. ઝવેરીના હસ્તે દીક્ષિતનું જાહેર સન્માન કરવામાં આવ્યું હતું.

આ પ્રસંગે ધારાસભ્ય શ્રી દુર્લભજીભાઈ દેથરિયા, શ્રી પ્રકાશભાઈ વરમોરા, જિલ્લા વિકાસ અધિકારી શ્રી નવલદાન ગઠવી અને નાયબ વન સંરક્ષક ડો. સુનિલ બેરવાલ સહિતના ઉચ્ચ અધિકારીઓ ઉપસ્થિત રહ્યા હતા. ઉપસ્થિત મહાનુભાવોએ જણાવ્યું હતું કે દીક્ષિત જેવા વિદ્યાર્થીઓ સમાજ માટે પ્રેરણારૂપ છે જેઓ પ્રતિકૂળ પરિસ્થિતિઓમાં પણ શિક્ષણના માધ્યમથી ઉચ્ચ સ્થાન પ્રાપ્ત કરી શકે છે.